1 VEIGAUNA 28
28
Sa tatau ko Tevita vei ira na Isireli, vei Solomoni talega na luvena; ka solia vei Solomoni na ka ka vakarautaka ko koya, kei nai vakatakarakara ni vale ni soro.
1A sa vakasoqoni ira kecega na turaga ni Isireli ki Jerusalemi ko Tevita, ko ira era sa turaga ni veimataqali, kei ira na turaga ni veimataivalu era sa veitaravi me qarava na tui, kei ira na turaga ni yayaudolu, kei ira na turaga ni yayadrau, kei ira na nona dau-ni-yau ka lewa na nona manumanu na tui kei na nodratou na luvena, kei ira na nona talai, kei ira na tamata rogo, kei ira kecega na tamata qaqa.
2A sa tu cake ko Tevita na tui, ka kaya, Dou rogoci au, koi kemuni na wekaqu, kei na noqu tamata: Sa tu e lomaqu me'u tara e dua na vale me vakacegu kina na kato ni veiyalayalati i Jiova, kei nai tutu-ni-yavana na noda Kalou, au sa vakarautaka talega na ka ni vale: 3ia sa kaya vei au na Kalou, O na sega ni tara e dua na vale ki na yacaqu, ni ko sa tamata i valu, ka sa vakadave dra. 4Ia sa digitaki au maivei ira kece na mataqali ni tamaqu ko Jiova na nodra Kalou na Isireli, me'u tui vei ira na Isireli, ka tawa mudu: ni sa digitaki ira na Juta ko koya, me lewa; ia vei ira na mataqali i Juta, na mataqali ni tamaqu; ia sa vinakati au vei iratou na luve i tamaqu, me'u buli me'u tui vei ira kecega na Isireli. 5Ia vei ira kece na luvequ, (ni ra sa lewe vuqa na gonetagane sa solia vei au ko Jiova,) sa digitaki Solomoni na luvequ me tiko e nai tikotiko vakaturaga ni matanitu i Jiova, me lewai ira na Isireli. 6A sa kaya vei au ko koya, Ena tara na noqu vale kei na noqu rara vakabai ko Solomoni na luvemu, ni ka'u sa digitaki koya me luvequ, ia ka'u na tamana koi au. 7Au na vakataudeitaka talega na nona matanitu ka tawa mudu, kevaka sa lomadei ko koya me muria na noqu vunau, kei na noqu lewa, me vaka e na siga edaidai. 8Ia oqo, e na matadra kece na Isireli, na nona soqoni levu ko Jiova, ni sa rogoca talega ko koya na noda Kalou, mo ni vakabauta ka goleva matua na vunau kece i Jiova na nomuni Kalou: mo ni taukena tiko kina na vanua vinaka oqo, ka laiva vei ira na luvemuni ni kemuni sa mate me ra taukena, ka tawa mudu.
9Ia ko iko, Solomoni na luvequ, mo kila na Kalou i tamamu, ka qaravi koya e na yalo dina, kei na loma e marautaka: ni sa vakatovolea na yalo kece ko Jiova, ka kila kece na nanuma ni lomada: kevaka ko na vakasaqarai koya, ko na kunei koya; ia kevaka ko sa biuti koya, ena biuti iko ko koya ka tawa mudu. 10Ia mo kila: ni sa digitaki iko ko Jiova mo tara e dua na vale me vale tabu: mo kaukauwa ga, ka mo cakava.
11A sa solia ko Tevita kivei Solomoni na luvena nai vakatakarakara ni varada, kei na kena veivale, kei na kena veivale ni yau, kei na kenai taba loma-ni-vale e cake, kei na kena veiloqi eloma, kei na yasana me tiko kina nai cabocabo-ni-bulubulu, 12kei nai vakatakarakara ni ka kecega sa tukuna vua na yalo, na rara vakabai ni vale i Jiova, kei na veitaba-ni-vale kecega e cake sa volita, kei na veivale ni yau ni vale ni Kalou, kei na veivale ni yau ni ka sa vakatabui: 13kei nai valavala ni nodra veitaravi na bete kei ira na Livai, kei na cakacaka kecega ni ka sa caka e na vale i Jiova, kei nai yaya kece e yaga e na cakacaka ni vale i Jiova: 14na koula sa vakatovolei na kena bibi me caka kina nai yaya koula me dui yaga e na cakacaka kecega; kei na siliva talega sa vakatovolei na kena bibi, me caka kina nai yaya kecega sa dui yaga e na cakacaka kecega: 15io, na kena bibi ni veitutu-ni-cina koula, kei na kena veicina koula, na kena bibi ni tutu-ni-cina yadua, kei na kedra veicina: kei na kena bibi ni veitutu-ni-cina siliva, ia nai tutu-ni-cina kei na kena veicina, me vaka sa yaga me caka kina nai tutu-ni-cina yadua: 16kei na koula sa vakatovolei na kena bibi me caka kina na tepeli ni madrai dauyatuni, io na tepeli yadua; kei na siliva me caka kina na tepeli siliva: 17na koula dina talega me caka kina nai qila ni lewe ni manumanu, kei na peseni, kei na bilo ni gunu, sa vakatovolei na kena bibi ki na peseni yadua; ia me caka na peseni siliva sa vakatovolei na kena bibi ki na peseni yadua: 18ia na koula dina sa vakatovolei na kena bibi me caka kina nai cabocabo ni ka boi vinaka; kei na koula me caka kina nai vakatakarakara ni qiqi ni jerupi e rua sa vakatetaba, ka ubia na kato ni veiyalayalati i Jiova. 19Sa vakatakila ko Jiova na ka kecega oqo e nai vola, ni sa tiko vei au na ligana, io nai valavala kecega ni vakatakarakara oqo.
20A sa kaya kivei Solomoni na luvena ko Tevita, Mo kaukauwa ga ka yalodoudou, ka kitaka: kakua ni rere, se taqaya: ni na tiko vata kei iko ko Jiova na Kalou, na noqu Kalou, ena sega ni weletaki iko ko koya, se biuti iko, mo vakaotia mada na kena ka kecega sa yaga e na cakacaka ni nona vale ko Jiova. 21Ia raica, na nodra matabete era veitaravi kei ira na Livai, me ra kitaka na cakacaka kece ni vale ni Kalou: ia ena tiko vata kei iko, na tamata kecega era sa vuku e na cakacaka vakamatai kecega, ka sa gu kina na yalodra, me ra kitaka na cakacaka kece: ena vakarorogo talega vei iko ko ira na turaga, kei ira kecega na tamata.
Currently Selected:
1 VEIGAUNA 28: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
