1 VEIGAUNA 18
18
Sa gumatua ko Tevita vei ira na veimatanitu eso, 1-8. Sa tala na luvena vei Tevita ko tui Emaci, 9-11. Sa qali vua ko Itomi, 12,13. O ira na tamata turaga i Tevita, 14-17.
1Sa oti oqo, sa mokuti ira na kai Filisitia ko Tevita, ka vakamalumalumutaki ira, a sa tauri Kaca kei na kena veikoro maivei ira na kai Filisitia.
2A sa samuti Moapi ko koya; a ra sa tauri kina ko ira na kai Moapi me ra sa qali vei Tevita, a ra sa daukauta vua nai vakacavacava.
3A sa mokuti Etareseri na tui Sopa ka yaco ki Emaci ko Tevita, ni sa lako ko koya me vakadinadinataka na nona kaukauwa mai na uciwai ko Uferetisi. 4A sa kovea maivua ko Tevita e dua na udolu na qiqi-ni-valu, ka le vitu na udolu na tamata sa vodo ose, ka le rua na oba na tamata i valu sa lako e yavadra: ka sa tava na tularua ni ose ni qiqi-ni-valu kecega ko Tevita, sa maroroya ga na ose me rauta e dua na drau na qiqi-ni-valu.
5Ia ni ra sa lako mai ko ira na kai Siria mai Tamasiko, me totaki Etareseri na tui Sopa, sa mokuta ko Tevita e le rua na oba ka rua na udolu vei ira na kai Siria. 6A sa lesia ko Tevita nai valu i vakatawa eso ki Siria-tamasiko; a ra sa tauri ko ira na kai Siria me ra sa qali vei Tevita; ka ra sa daukauta vua nai vakacavacava. A sa vakabulai Tevita ko Jiova e na veiyasana sa lako kina ko koya. 7A sa tokitaka ko Tevita na veisasabai koula era sa taura ko ira na tamata i Etareseri, ka sa kauta ki Jerusalemi. 8Sa kauta mai ko Tevita mai Tipaci, kei Kuni, a koro ka nei Etareseri, e dua na ka levu sara na parasa, sa bulia kina ko Solomoni na taqi levu parasa, kei na veiduru, kei na veiyaya parasa.
9Ia ni sa rogoca ko Tou na tui Emaci, ni sa mokuta oti ko Tevita na mataivalu taucoko nei Etareseri na tui Sopa; 10sa talai Atorami na luvena tagane kivei Tevita na tui, me vakacegui koya, ka me vosa vinaka vua ni sa veivaluti kei Etareseri, ka mokuti koya ni rau sa veivala tiko ko Etareseri kei Tou; a sa kauta vata kaya na bilo kecega sa dui caka e na koula, kei na siliva, kei na parasa. 11Oqori talega ka vakatabuya ko Tevita na tui me nei Jiova, kei na siliva kei na koula sa kauta mai ko koya mai na veimatanitu kecega; mai Itomi, mai Moapi, ka maivei ira na luve i Amoni, ka maivei ira na kai Filisitia, ka maivei ira na Amalekaiti.
12Ia ko Apisai, ka tagane na luve i Seruaia, sa yavita e le tinikawalu na udolu vei ira na kai Itomi, e na buca ni masima. 13A sa vakatikora nai valu i vakatawa e Itomi, a ra sa tauri ko ira kecega na kai Itomi me ra qali vei Tevita. A sa vakabulai Tevita ko Jiova e na veiyasana sa lako kina.
14A sa nodra tui na Isireli kecega ko Tevita, a sa lewa tiko vakadodonu vei ira kecega na nona tamata. 15A sa lewai ira nai valu ko Joapi na luve i Seruaia; a sa dauvola nai tukutuku kei na matanitu ko Jiosafati na luve i Eiilute. 16Ia erau sa bete ko Setoki na luve i Eiitupi, kei Apimeleki na luve i Epaiaca, a sa vunivola ko Savisa; 17ka sa lewai ira na Kireci kei ira na Pileci ko Pinaia na luve i Jioiata; a sa liu ko iratou na luve i Tevita ka tagane vei ira era sa voleka vua na tui.
Currently Selected:
1 VEIGAUNA 18: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
