1 VEIGAUNA 15
15
Sa kauta na kato ki Jerusalemi ko Tevita.
1A sa tara eso na nona vale ko Tevita e na nona koro, ka sa vakarautaka e dua na tikina me kenai tutu ni kato ni Kalou, ka birika kina na kena vale laca. 2Sa qai kaya ko Tevita, Sa sega ni dodonu me colata na kato ni Kalou ko ira na tani, ko ira ga na Livai; ni sa digitaki ira ko Jiova me ra colata na kato ni Kalou, ka me ra qaravi koya tikoga ka tawa mudu.
3A sa vakasoqoni ira kecega na Isireli ki Jerusalemi ko Tevita, me ra kauta mai na kato i Jiova ki na kena tikina, sa vakarautaka ko koya. 4Ka sa vakasoqoni ira vata na luve i Eroni kei ira na Livai ko Tevita: 5Vei ira na luve i Koaca ka tagane: ko Urieli ka liu, kei ira na wekana era sa le dua na drau ka ruasagavulu; 6vei ira na luve i Mirari ka tagane: ko Asaia ka liu, kei ira na wekana era sa le rua na drau ka ruasagavulu; 7vei ira na luve i Kerisomi ka tagane: ko Joeli ka liu, kei ira na wekana era sa le dua na drau ka tolusagavulu; 8vei ira na luve i Elisafani ka tagane: ko Semaia ka liu, kei ira na wekana era sa le rua na drau; 9vei ira na luve i Epironi ka tagane: ko Ilieli ka liu, kei ira na wekana era sa le walusagavulu; 10vei ira na luve i Usieli ka tagane: ko Aminatapi ka liu; kei ira na wekana era sa le dua na drau ka mani tinikarua.
11A sa kacivi rau na bete ko Setoki kei Epaiaca ko Tevita, kei ira na Livai, ko Urieli, ko Asaia, kei Joeli, ko Semaia, kei Ilieli, kei Aminatapi, 12ka kaya vei iratou, Oi kemudou sa nodra qase turaga na Livai; dou vakasavasavataki kemudou, koi kemudou kei ira talega na wekamudou, mo dou kauta mai na kato i Jiova na nodra Kalou na Isireli ki na tikina ka'u sa vakarautaka: 13Ia ni dou a sega ni kitaka eliu, sa vakacacani keda kina ko Jiova na noda Kalou, ni da a sega ni vakasaqarai koya me vaka na kenai valavala sa dodonu.
14A ra sa vakasavasavataki ira ko ira na bete kei ira na Livai me ra kauta mai na kato i Jiova na nodra Kalou na Isireli. 15A ra sa colata na kato ni Kalou ko ira na Livai e na kenai vua, me vaka sa kaya ko Mosese, ka vaka na vosa i Jiova.
16A sa kaya ko Tevita kivei ira sa liu vei ira na Livai, me ra lesi ira na wekadra me ra dau-ni-sere, kei na ka domo vinaka, na api, kei na soliteri kei na sibali, ka tabalaka na domodra e na marau. 17Ia ko ira na Livai, era sa lesi Imani na luve i Joeli ka tagane; kei ira eso na wekana, ko Esafa ka tagane na luve i Perekaia: ka so vei ira na wekadra na luve i Mirari era tagane, ko Icani, ka tagane na luve i Kusaia; 18a sa tiko vata kei ira eso na wekadra sa uasivi sobu: ko Sakaraia, ko Peni, kei Jeesieli, kei Simiramoci, kei Jieli, kei Uni, ko Iliapi, kei Pinaia, kei Meesea, kei Maticaia, kei Elifileu, kei Mikiniaia, kei Opeti-itomi, kei Jieli, era sa kenai vakatawa ni katuba. 19Ia ko iratou na dau-ni-sere, ko Imani, ko Esafa, kei Icani, me sausau me rogo levu na sibali parasa; 20kei Sakaraia, kei Asieli, kei Simiramoci, kei Jieli, kei Uni, kei Iliapi, kei Meesea, kei Pinaia, e na soliteri vaka na domo ni yalewa; 21ia ko Maticaia, kei Elifileu, kei Mikiniaia; kei Opeti-itomi, kei Jieli, kei Asasaia, e na api vakadomoilevu me liu.
22A sa domo-ni-sere ko Kinanaia, ko koya sa liu vei ira na Livai; ka sa dauvakatavulica na sere, ni sa vuku ko koya. 23Ka sai vakatawa ni katuba ni kato ko Perekaia, kei Elikana.
24Ia ko Sipanaia, kei Jiosafati, kei Nicaneli, kei Amasai, kei Sakaraia, kei Pinaia, kei Eliesa, ko iratou na bete, eratou sa uvu davui e na mata ni kato ni Kalou: ka sai vakatawa ni katuba ni kato ko Opeti-itomi kei Jiaia.
25A sa lako ko Tevita, kei ira na nodra qase na Isireli, kei ira na turaga ni yayaudolu, me ra kauta cake mai e na marau na kato ni veiyalayalati i Jiova, mai na vale i Opeti-itomi. 26Ia ni sa vukei ira na Livai na Kalou e na nodra colata na kato ni veiyalayalati i Jiova era sa vakacabora kina na pulumokau e vitu, kei na sipi tagane e vitu. 27A sa vakaisulu ko Tevita e nai sulu lineni matailalai, kei ira kece talega na Livai era sa colata na kato, kei ira na dau-ni-sere, kei Kinanaia na domo-ni-sere, kei ira na dau-ni-sere: a sa vakaefoti lineni ko Tevita. 28A ra sa kauta mai na kato ni veiyalayalati i Jiova ko ira kece na Isireli e na kaikaila, kei na domo ni koneti kei na davui, kei na sibali kei na soliteri, kei na api.
29Ia ni sa yaco na kato ni veiyalayalati i Jiova ki na koro i Tevita, sa vakararai tiko mai na katuba e cake ko Maikali na luve i Saula ka yalewa, a sa kunei Tevita ni sa meke ka qiriqiri tiko; a sa beci koya e na yalona.
Currently Selected:
1 VEIGAUNA 15: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
