1 VEIGAUNA 13
13
Sa kauta na kato ko Tevita mai Kiriaci-jiarimi; a sa kauta ki na vale i Opeti-itomi.
1A sa bose vata ko Tevita kei ira sa turaga ni yayaudolu kei na yayadrau, kei ira kece era sa dauliu. 2A sa kaya ko Tevita vei ira na nodra i soqosoqo taucoko na Isireli, Kevaka sa vinaka kivei kemuni, ka sa vuna ko Jiova na noda Kalou, me da vakatadu mata vei ira na wekada e na veiyasana kecega, ko ira sa vo e na vanua kece nei Isireli, kivei ira talega na bete kei ira na Livai era sa tiko e na veikoro sa vakavanua veico ka volita, me ra soqoni ira vata mai kivei keda: 3ia me da kauta tale mai kivei keda na kato ni veiyalayalati ni noda Kalou: ni da sa sega ni taroga kina e na gauna i Saula. 4A ra sa kaya ko ira nai soqosoqo taucoko ni ra na kitaka vakakina: ni sa dodonu na ka oqo vei ira kecega na tamata.
5A sa vakasoqoni ira kece vata na Isireli ko Tevita, mai Siori mai Ijipita, ka yaco ki nai curucuru ki Emaci, me ra kauta mai na kato ni Kalou mai Kiriaci-jiarimi. 6A sa lako cake ko Tevita, kei ira kecega na Isireli, ki Peala, io ki Kiriaci-jiarimi, mai Juta, me kauta cake maikina na kato ni Kalou ko Jiova, o koya sa tiko e na kedrau maliwa na jerupi, o koya sa cavu kina na Yacana. 7A ra sa vakavodoka na kato ni Kalou ki na dua na qiqi-ni-yaya vou, mai na vale i Epinatapi, a rau sa tubera na qiqi ni yaya ko Usa kei Eiio. 8A sa qiriqiri vagumatua ko Tevita kei ira kece na Isireli, e na mata ni Kalou, e na api, kei na soliteri, kei na tibereli, kei na sibali, kei na davui kaukamea kei na sere. 9Ia ni ra sa yaco ki na rara ni buturaki sila ka nei Kitioni, sa dodoka yani na ligana ko Usa me taura na kato, ni sa tarabe na pulumokau. 10A sa tubu mai na cudru i Jiova vei Usa, a sa vakamatei koya, ni sa tara na kato e na ligana: a sa mate maikea e na mata ni Kalou. 11A sa rarawa na loma i Tevita ni sa vakamatei Usa ko Jiova; a sa vakayacana na yasana ko ya ko Peresi-usa, ka yacova na siga oqo. 12A sa rerevaka na Kalou ko Tevita e na siga ko ya, a sa kaya, Au na kauta mai vei au vakaevei na kato ni Kalou? 13A sa sega kina ni kauta kivei koya na kato ko Tevita, ki na koro i Tevita, ia sa kauta vakatikitiki tani ga ki na vale i Opeti-itomi na kai Kaca.
14A sa tiko kei Opeti-itomi kei na nona vuvale na kato ni Kalou, ka vula tolu e na nona vale. Ka sa vakalougatataki ira e na vale i Opeti-itomi ko Jiova, kei na nona ka kecega.
Currently Selected:
1 VEIGAUNA 13: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
