ሮሚያ 9

ፆሳይ ካሴ ዶሬዳ ኢስራዔሊያ ኣሳ

1ታኒ ቱሙዋ ሃሳያይ፤ ታኒ ኪሪስቶሳሳ፤ ቃሲ ዎርዶቲኬ። ጌሻ ኣያናይ ሞዲያ ታ ቲላ ዎዛናይ ታኒ ዎርዶቴናዋ ታው ማርካቴ። 2-3ታው ኣሹዋን ዛሬ ጊዲያ ታናዳን ኣማኒያዋንቶ፥ ታ ዎዛናን ዳሮ ቃሬታይኔ ኣጌና ቆፋይ ዴዔ። ኣዪሲ ጎፔ፥ ታኒ ታ ሁጴው ኡንቱንቱ ዲራው፥ ፆሳ ሼቃፔ ጋርሳና ዴዓሪኪታሻ! ቃሲ ኪሪስቶሳፔካ ሻኬታሪኪታሻ! 4ኡንቱንቱ ኢስራዔሊያ ኣሳቱዋ፤ ፆሳይ ኡንቱንታ ባሬ ናና ኡዲዴ፥ ባሬ ቦንቹዋ ኡንቱንቱና ሻኬዳ። ኡንቱንቱና ቃላ ጌሊዴ፥ ሂጊያ ኡንቱንቶ ኢሜዳ። ኡንቱንቱ ፆሳው ቤሲያ ኦጊያን ጎዪኒኖ፤ ቃሲ ፆሳይ ኢማና ጌዳዋካ ኣኬዲኖ። #ኬስ 4፡22 5ኡንቱንቱ ዜሬኒ ካሴ ኣዋቱዋ ዛሬ፤ ቃሲ ኪሪስቶሲካ ኣሹዋን ኡንቱንቱ ዛሬ። ኢ፥ ኡባፔ ቦላ ጊዲዴ ሞዲያ፥ ሜናው ጋላቴቴዳዌ ፆሳ። ኣሜንዒ።

6ሺን ታኒ፥ «ፆሳይ ኢማና ጌዳዌ ኣታና» ያጊኬ። ኣዪሲ ጎፔ፥ ኢስራዔሊያ ኣሳ ኡባቱ ፆሳይ ዶሬዳዋንታ ጊዲኪኖ። 7ቃሲ ኣብራሃሜ ዜሬቱ ኡባቱ ፆሳ ናና ጊዲኪኖ። ፆሳይ ኣብራሃሞሲ፥ «ኔ ዜሬይ ዪሳቃ ባጋና ፄሴታናዋ» ያጌዳ። #ዶም 21፡12 8ሄዋ ጉሳይ ኡንቱንቱ ፆሳይ ኢማና ጌዳ ኦጊያን ዬሌቴዳ ናናይ ዛሪያዳን ፓይዴታና፤ ሺን ኣሳ ቆፋዳን ዬሌቴዳዋንቱ ፆሳ ናና ጊዲኪኖ ጉሳ። 9ኣዪሲ ጎፔ፥ ፆሳይ ኢማና ጊዴ ሃሳዬዳዌ ሃዋ፤ «ታኒ ሃ ጌቴቴዳዋዳን ሄዎዴ ያና፤ ሳራካ ኣቱማ ናዓ ዬላና» ያጌዳ። #ዶም 18፡10

10ሄዋ ፃላላካ ጊዴና፤ ኢርቢቃ ዬሌዳ ማንቴ ናና ኣዉ ኢቱዋ፤ ኢካ ኑ ኣዉዋ ዪሳቃ። 11-12ሺን ኢቲ ናዓ ዶሬዳ ፆሳይ ባሬ ሁጴው ቆፔዳዋ ጊዳናዳን፥ ፆሳይ ኢርቢቂው፥ «ባይራይ ቴፋው ኣዛዜታና» ያጌዳ፤ ኢ ሄዋ ኡንቱንቱ ዬሌታናፔኔ ኢታባ ዎይ ሎዖባ ኣይኔ ኦናፔ ካሴና ጌዳ። ሄዋ ዲራው፥ ፆሳ ዶሩ ኣ ፄሴዳዋዳኒፔ ኣቲን፥ ኡንቱንቱ ኦዳዋና ጊዴና። #ዶም 25፡33 13ፆሳ ማፃፋይ፥ «ያዪቆባ ሲቃዲ፤ ሺን ኤሳ ኢፃዲ» ያጌ።

14ያቲና፥ ኑኒ ዋጋኔ? ፆሳይ ዴሺሲዴ ፒርዲ? ሄዋ ጊዴና። 15ኣዪሲ ጎፔ፥ ሙሴው ኢ፥

«ታኒ ማራናው ኮዪያዋንታ ማራና፤

ቃሲ ቃሬታናው ኮዪያዋንቱሲካ ቃሬታና»

ያጌዳ። #ኬስ 33፡19 16ሲሚ ፆሳይ ኣሳ ማሪያዌ ኢ ማራናው ኮዪያ ዲራሳፔ ኣቲን፥ ኣሳይ ኮዪያ ዎይ ኦያ ዲራሳ ጊዴና።

17ኣዪሲ ጎፔ፥ ፆሳ ማፃፋይ ጊብፄ ካቲያሲ፥ «ታኒ ታ ዎልቃ ኔናን ቤሳናዉኔ ታ ሱንይ ኣላሚያ ኡባን ኦዴታናው፥ ሄዋሲ ታኒ ኔና ካዉዲ» ያጌ። #ኬስ 9፡16 18ሲሚ ፆሳይ ማራና ኮዪያዋ ማሬ፤ ቃሲ ዎዛና ጎርዳና ኮዪያዋ ዎዛና ጎርዴ።

ፆሳ ሃንቁዋኔ ማሮታ

19ሲሚ ሂንቴ ታና፥ «ሄዌ ቱማ ጊዶፔ፥ ፆሳይ ኣሳ ባዪዙዋሲ ኣያው ቶሺ? ፆሳይ ጌዳዋ ኢፃዲ ጋናዌ ኦኔ?» ያጋናው ዳንዳዪታ።

20ሺን ታ ላጌው፥ ፆሳሲ ዛራናው ኔኒ ኦኔ? ኡርቃፔ ሜቴዳ ሚሻይ ጉዬ ዛሪዴ ባሬና ሜዳዋ፥ «ታና ሃዋዳን ኣዪሲ ሜዲ?» ጊዴ ኦቻናው ዳንዳይ? #ኢሳ 29፡16፤ 45፡9 21ዎይ ኡርቃ ሜያዌ ባሬ ሜያ ኡርቃ ባሬ ኮዪያዋዳን ኦናዉኔ ኢቲ ማላ ኡርቃፔ ኢቱዋ ቦንቾ ሚሻ ኡዲዴ፥ ቃሲ ኢቱዋ ቶሼቴዳ ኦሱዋ ኦያ ሚሻ ኡዲዴ ሜናው ኣው ማቲ ባዌ?

22ፆሳይ ኦዳዌ ሃዋና ኢቱዋ። ኢ ባሬ ሃንቁዋ ቤሳናዉኔ ባሬ ዎልቃ ኤሪሳናው ኮዬዳ፤ ኢ ባሬ ሃንቁዋን ፒርዳናዋንታ፥ ባዪዛናው ጊጊ ኡቴዳዋንታ፥ ዳሮ ጌንጩዋን ዳንዳዬዳ። 23ቃሲ ኢ ማሬዳዋንቶ፥ ባሬ ቦንቹዋ ኣካናው ጊጊሲ ዎዳዋንቱሲ ኢ ኣይ ኬና ቦንቼቲንቶኔ ቤሳናው ኮዬዳ። 24ኑኒ ኢ ፄሴዳዋንታ፤ ሺን ኣዪሁዳ ኣሳ ፃላላፔ ጊዴናን፥ ኣዪሁዳ ጊዴና ኣሳ ጊዶፔካ ፄሴዳ።

25ሆሴዓ ማፃፋን ኢ ጊያዌ ሃዋ፤

«ታ ኣሳ ጊዴናዋንታ፥

‹ታ ኣሳ› ጋዴ ፄሳና።

ታኒ ሲቃቤና ዛሪያካ፥

‹ታ ሲቃቶ› ጋዴ ፄሳና። #ሆስ 2፡23

26‹ሂንቴንቱ ታ ኣሳ ጊዲኪታ› ጊያዋ

ኡንቱንቱ ሲሴዳ ሄ ሳዓን፥

ኡንቱንቱ፥ ‹ዴዑዋ ፆሳ ናና› ጌቴቲዴ ፄሴታናዋንታ»

ያጌ። #ሆስ 1፡10 27ኢሲያሲ ኢስራዔሊያ ኣሳባ ያጊዴ ሃሳዬዳ፤

«ኢስራዔሊያ ኣሳይ ኣባ ማታን

ዴዒያ ሻፊያ ኬና ጊዶፔካ፥

ኡንቱንቱፔ ኣማሬዳዋንቱ ፃላላይ ኣታና። #ኢሳ 10፡22-23

28ኣዪሲ ጎፔ፥ ጎዳይ ሳዓ ቦላን

ዴዒያ ኣሳ ኡባ ቦላ

ኤሌካ ፒርዳና»

ያጌዳ። 29ኢሲያሲ ካሴቲዴ፥

«ኡባፔ ዎልቃማ ጎዳይ ኑሲ

ኣማሬዳ ዜሬ ኣሼኔንቶ፥

ኑኒ ሶዶማ ካታማዳኒኔ

ጋሞራ ካታማዳን ሃኔዶሺን»

ያጊ ሃሳዬዳ። #ኢሳ 1፡9

30ያቲና፥ ኑኒ ዋጋኔ? ፂሎቴ ኮዪቤና ኣዪሁዳ ጊዴና ኣሳይ ኣማኑዋን ፂሌዳ፤ 31ሺን ኢስራዔሊያ ኣሳይ ባሬንታ ፂሊሲያ ሂጊያ ኮዬዳዋንቱ ሄ ሂጊያ ዴሚቤይኪኖ። 32-33ኣዪሲ ዴሚቤይኪኖ? ኡንቱንቱ ኦሱዋናፔ ኣቲን፥ ኣማኑዋን ፂሎቴ ኮዪቤና ዲራሳ። ኡንቱንቱ ፆሳ ማፃፋይ፥

«ኣኬኪቴ፤ ታኒ ፂዮኔን ኣሳ ቢያ ሹቻ፥

ኡንቱንቱ ኦጊያን ዛላ ዎና።

ሺን ኣኒ ኣማኒያ ኦኒኔ ዬላቴና»

ያጊዴ ፃፌቶዋዳን ቢያ ሹቻን ቤቴዲኖ። #ኢሳ 28፡16

Currently Selected:

ሮሚያ 9: dwrENT

Highlight

Copy

Compare