ሮሚያ 11

ፆሳይ ኢስራዔሊያ ኣሳ ዉርሲ ኦሊቤና

1ያቲና፥ ፆሳይ ባሬ ኣሳ ኢፄዴ ጋዴ ኦቾ? ሄዋ ጊዴና፤ ኣዪሲ ጎፔ፥ ታኒ ታ ሁጴው ኢስራዔሊያ ኣሳ፤ ኣብራሃሜ ዛሬ፤ ቢኒያማ ያራ። 2ፆሳይ ኮይሮ ዶሬዳ ባሬ ኣሳቱዋ ኢፄና፤ ፆሳ ማፃፋይ፥ ኤላሳ ታሪኪያ ጊዶን፥ ኤላሲ ኢስራዔላቱዋ ፆሳ ሲንን ዎቲ ሞቲንቶ፥ ሂንቴ ኤሪታ። 3«ጎዳው፥ ኡንቱንቱ ሄ ሱንን ናባቱዋ ዎዲኖ፤ ኔ ያርሺያሳካ ኮሌዲኖ። ያቲና፥ ታኒ ታ ፃላላይ ኣታዲ። ቃሲ ኡንቱንቱ ታናካ ዎናው ኮዪኖ» ያጌዳ። #1ካት 19፡10፣ 14

4ፆሳይ ኣው ዋጊ ዛሬዴ? «ታኒ ኤቃ ባዓላው ጉልባቲቤና ላፑ ሻዓ ኣሳ ታው ኣሻዲ» ያጌዳ። #1ካት 19፡18

5ሃዋዳንካ ቃሲ ሃ ዎዲያን፥ ፆሳይ ባሬ ኣ ኬካቴን ዶሬዳ ኣማሬዳ ኣሳቱ ዴዒኖ። 6ሺን ኢ ባሬ ኣ ኬካቴን ዶሬዳፔ ኣቲን፥ ኡንቱንቱ ኦሱዋን ኡንቱንታ ዶሪቤና፤ ሄዌ ዮፔ፥ ኣ ኣ ኬካቴይ ቱሙ ኣ ኬካቴ ጊዴና።

7ያቲና፥ ኣዬ? ኢስራዔሊያ ኣሳቱ ባሬንቱ ኮዪያዋ ዴሚቤይኪኖ፤ ሺን ፆሳይ ዶሬዳ ኣማሬዳዋንቱ ዴሜዲኖ። ዮኮንቱ ዎዛናይ ሚኔዳ። 8ሃዋዳንካ፥ ፆሳ ማፃፋይ፥

«ፆሳይ ኡንቱንቱ ባሬንቱ ኣይፊያን ቤዔናዳኒኔ

ባሬንቱ ሃይን ሲሴናዳን፥

ሃዋ ጋካናው ኡንቱንቶ

ኣዛላ ኣያና ኢሜዳ»

ያጌዳ። #ዛር 29፡4፤ ኢሳ 29፡10 9ቃሲ ዳዊቴ ያጌዳ፤

«ኡንቱንቱ ሚያ ጋይታይ ኡንቱንታ ጲሪያዳን ኦይቆ፤

ኡንቱንታ ጉፋን፤ ኡንቱንቶ ኩሺያ ሺሪ ጪጎ። #ማዝ 69፡22-23

10ኡንቱንቱ ፄሌናዳን፥ ኡንቱንቱ ኣይፊ ጎዜቶ፤

ኡባ ዎዴ ባሬንቱ ሜቱዋን ቁኒዴ ዴዒኖ»

ያጌዳ።

11ያቲና፥ ኣዪሁዳቱ ቤቴዳ ዎዴ፥ ዴንዴናዳን ኩንዴዲኖ? ሄዋ ጊዴና፤ ኡንቱንቱ ናጋራ ኦዳ ዲራው፥ ኣቶቴይ ኡንቱንቱ ኣዪሁዳ ጊዴና ኣሳቱዋ ቃናታናዳን፥ ኣዪሁዳ ጊዴና ኣሳው ዬዳ። 12ሺን ኣዪሁዳቱ ናጋራ ኦዳ ዲራው፥ ኣላሜው ዳሮ ኣንጁ ዬዳ፤ ቃሲ ኡንቱንቱ ኩንዴይካ ኣዪሁዳ ጊዴና ኣሳው ዳሮ ኣንጁዋ ኣሄዳ። ያቲና፥ ኣዪሁዳቱ ኡባይ ጉጄቲያ ዎዴ፥ ኣንጁ ዎይሳ ኬና ዳራንዴሻ!

ኣዪሁዳ ጊዴና ኣሳይ ኣታና ኣቶቴ

13ሺን ታኒ ሃዒ ሂንቴንቶ፥ ኣዪሁዳ ጊዴና ኣሳው ሃሳያይ፤ ታኒ ኣዪሁዳ ጊዴና ኣሳው ዬሱሲ ኪቴዳዋ ጊዲያ ዲራው፥ ታ ኦሱዋ ቦንቻና። 14ታኒ ታ ዛሬ ጊዲያ ኣሳቱዋ ቃናታንቻቱዋ ኡዶፔ፥ ኦኒ ኤሪ ኡንቱንቱፔ ኣማሬዳዋንታ ኣሼናን ኣጊኬ። 15ኣዪሲ ጎፔ፥ ፆሳይ ኡንቱንታ ኢፄዳ ዎዴ፥ ሃ ኣላሚ ፆሳና ሲጌቴዳ። ያቲና ፆሳይ ኡንቱንታ ሺሺ ኣኪያ ዎዴ፥ ሃይቄዳዌ ዴዑዋ ዴማናፔ ኣቲን፥ ኣዬ ሃናኔ?

16ኮይሮ ኣይፌ ባጋ ሙናቃይ ኣንጄቴዳዋ ጊዶፔ፥ ሙሜ ሙናቃይካ ቃሲ ኣንጄቴዳዋ ጊዳና፤ ኢቲ ሚ ፃጱ ኣንጄቴዳዋ ጊዶፔ፥ ሃይይ ኡባይካ ቃሲ ኣንጄቴዳዋ ጊዳና። 17ሺን ዎራን ዶሌዳ ዎጋራ ሚ ቃንካፔ ኢቱዋ ኢቱዋ ካሬዳሳን፥ ኔና ዎራን ዶሌዳ ዎጋራ ሚ ማላ ሄ ዎጋራና ጋ ቃቼዶ፤ ኔኒ ቃሲ ዛይቲ ኬሲያ ዎጋራ ሚ ፃጱዋና ኢቲፔ ዴዓ። 18ሲሚ ኔኒ ሄ ካሬቲ ዎዳ ቃንካቱዋ ቦላን ኦቶሬታናው ቤሴና፤ ሺን ኔኒ ኦቶሬቲያዋ ጊዶፔካ፥ ፃጱ ኔና ቶኬፔ ኣቲን፥ ኔኒ ፃጱዋ ቶኬናዋ ኣኬካ።

19ሄዋ ዲራው ኔኒ፥ «ኤ፤ ሺን ቃንካቱ ታኒ ኡንቱንቱ ሳዓን ጌላናዳን ካሬቴዲኖ» ያጋና። 20ሄዌ ቱማ፤ ኡንቱንቱ ኣማኒቤና ዲራው፥ ካሬቴዲኖ፤ ኔኒ ኣማኔዳ ዲራው፥ ሄ ሳዓን ኤቃዳ። ሺን ያያፔ ኣቲን፥ ኦቶሮ ቆፋ ቆፖፓ። 21ኣዪሲ ጎፔ፥ ፆሳይ ሜታ ቃንካ ማላቲያዋንቶ፥ ኣዪሁዳቶ ቃሬቲቤናዋ ጊዶፔ፥ ኔው ቃሬቲያዋ ማላቲ?

22ሲሚ ፆሳ ኬካቴኔ ፃላቴ ቤዓ። ኩንዴዳዋንቶ ኢ ፃላ፤ ሺን ኔኒ ኣ ኬካቴኒ ሚናዴ ዴዖፔ፥ ኢ ኔው ኬካ፤ ሄዌ ዮፔ፥ ኔኒካ ቃሲ ካሬታና። 23ኣዪሁዳቱካ ቃሲ ኣማኔናን ኢፂያዋ ኣጎፔ፥ ፆሳይ ካሴ ኡንቱንቱ ዴዒያሳን ዛሪዴ ዎና፤ ኣዪሲ ጎፔ፥ ኢ ኡንቱንታ ዛሪዴ ዎናው ዳንዳዬ። 24ኣዪሲ ጎፔ፥ ፆሳይ ሂንቴንታ ዎራን ዴዒያ ኮይሮ ሜታ ዎጋራ ሚፔ ቃንፂዴ፥ ሂንቴንቱ ሜታን ዎራን ዶሎዋንቱዳን ጊዴናን ጋዴን ቶኬዳ ዎጋራ ሚና ጋ ኦይዳዋ ጊዶፔ፥ ያቲና፥ ሄ ካሬቲ ዎዳ ኮይሮ ሜታ ቃንካቱዋ ዛሬዴ፥ ኡንቱንታ ኮይሮ ሜታን ዶሌዳ ባሬንቱ ዎጋራ ሚና ጋ ቃቻናው፥ ኣ ኣዬ ፆናናዌ?

ፆሳ ማሮታይ ኡባሳ

25ታናዳን ኣማኒያዋንቶ፥ ታኒ ሂንቴ ኤራናዳን ኮዪያ ቱሙ ፁራ ዬዉ ዴዔ፤ ሄዌ ሂንቴ ሂንቴንታ ሂንቴሬካ፥ ኑኒ ኣዳ ኤራንቻ ያጊዴ ቆፒያዋ ዲጌ፤ ኢስራዔሊያ ኣሳፔ ባጋይ ሲሴናን ኢፄዳ፤ ሺን ሄ ሲሴናን ኢፂያዌ ኣዪሁዳ ጊዴና ኣሳ ኩሜን ፓይዱ ፆሳኮ ጋካናሲ ጋሚዓና። 26ሃዋዳንካ፥ ኢስራዔሊያ ኣሳይ ኡባይ ኣታና፤ ፆሳ ማፃፋይ ሃዋዳን ያጌ፤

«ኣሺያዌ ፂዮኔ ጌቴቲያ ካታማፔ

ዪዴ፥ ናጋራ ኦሱዋ ኡባ ያዪቆባ ዛሪያፔ ዲጋና። #ኢሳ 59፡20

27ታኒ ኡንቱንቱ ናጋራ ኣቶ ያጊያ ዎዴ፥

ኡንቱንቱና ጌላና ቃላ ጫቁ ሃዋ»

ያጌ። #ኤርም 31፡33-34

28ኣዪሁዳ ጊዴና ኣሳቶ፥ ኣዪሁዳቱ ዎንጋላ ሚሺራቹዋ ባጋና ሂንቴ ዲራው፥ ፆሳና ሞርኬ፤ ሺን ፆሳ ዶሩዋ ባጋና ኣዋቱዋ ዲራው፥ ኡንቱንቱ ኢ ሲቂያዋንታ። 29ኣዪሲ ጎፔ፥ ፆሳይ ባሬ ኢሜዳዋ ጉዬ ኣኬና፤ ቃሲ ባሬ ፄሴዳዋ ኢፃዲ ጌና። 30ኣዪሁዳ ጊዴናዋንቶ፥ ፆሳው ሂንቴ ካሴና ኣዛዜቲቤይኪታ፤ ሺን ኣዪሁዳቱ ኣዛዜቴናን ኢፄዳ ዲራው፥ ፆሳ ማሮቴ ሃዒ ሂንቴ ኣኬዲታ። 31ሃዋዳን፥ ሂንቴ ኣኬዳ ማሮቴ ዲራው፥ ኣዪሁዳቱ ቃሲ ፆሳ ማሮቴ ሃዒ ኣካናዳን፥ ፆሳው ኣዛዜቴናን ኢፄዲኖ። 32ኣዪሲ ጎፔ፥ ፆሳይ ኣሳ ኡባ ማራና ማላ፥ ኣሳይ ኡባይ ኣው ኣዛዜቴናን ኢፂያ ሃኖታን ቃቼዳ።

33ፆሳ ዱሬቴይ ዎይሳ ኬና ዳሬ? ኣ ኣ ኤራቴይኔ ኣ ኤራቴይ ዎይሳ ኬና ጪሜ? ኣ ፒርዳ ኦዳናዌ ኦኔ? ኢ ባሬ ኦያዋ ኣዪሲ ኦንቶ፥ ኦኔ ኣኬኪያዌ? #ኢሳ 55፡8 34ሄዋ ፆሳ ማፃፋይ፥ «ጎዳ ዎዛና ኤሪያዌ ኦኔ? ኣ ዞራናው ዳንዳዪያዌ ኦኔ? #ኢሳ 40፡13 35ዎይ ባሬ ኩሺያ ዛራና ማላ፥ ኣው ኢቲባ ኢሜዳዌ ዴዒ?» ያጌ። #ዮብ 41፡11

36ኣዪሲ ጎፔ፥ ኡባባ ኢ ሜዳ፤ ቃሲ ኡባባይካ ኣ ማታኒኔ ኣዉኔ ዴዔ፤ ፆሳው ሜናው ቦንቹ ጊዶ። ኣሜንዒ። #1ቆር 8፡6

Currently Selected:

ሮሚያ 11: dwrENT

Highlight

Copy

Compare