ዬሱሲ ኪቴዳዋንቱ ኦሱዋ 28
28
ጳዉሎሲ ማልታ ጊያ ሃን ዶዴቴዳ ሳዓ ቤዳ
1ኑኒ ጋፃ ሳሮቴን ኬሴዳ ዎዴ፥ ሄ ሃን ዶዴቴዳ ሳዓይ ማልታ ጌቴቲያዋ ኤሬዶ። 2ሃን ዶዴቴዳ ሳዓን ዴዒያ ኣሳቱ ኑሲ ዳሮ ኬካቴ ኬኬዲኖ፤ ኢራይ ቡካናው ዶሜዳ ዲራዉኔ ሜጉዋ ዲራው፥ ታማ ኤዴ፥ ኑና ኡባ ሞኬዲኖ።
3ጳዉሎሲ ዳሮ ቃይፄሪያ ሚ ሚፂዴ ታማን ዬጊሺን፥ ማርዛማ ሾሻይ ሴላ ዲራው ኬሲዴ፥ ኣ ኩሺያን ፃፄቲዴ፥ ኣ ዱኬዳ። 4ሃን ዶዴቴዳ ሳዓን ዴዒያ ኣሳቱ ቂርጫንቲያ ሾሻይ ጳዉሎሳ ኩሺያን ፃፄቴዳዋ ቤዔዳ ዎዴ ኢቱ ኢቱዋሲ፥ «ቱሙ ሃ ቢታኒ ሼምፑዋ ዎያ ኣሳ፤ ሃራይ ኣቶ ኣባፔ ኢ ኣቲናካ ኑ ፆሳ ፒርዳይ ኣ ፓፃ ዴዖ ጊቤና» ያጌዲኖ።
5ሺን ጳዉሎሲ ባሬ ኩሺያፔ ቂርጫንቲያ ሾሻ ዉፃኪዴ፥ ታማን ኦሌዳ፤ ኣ ኣይኔ ኦቤና። 6ኡንቱንቱ፥ «ኣ ቦላይ ጋፌ፤ ዎይ ኣኬኬናን ኩንዲዴ ሃይቄ» ያጊዴ ኣ ናጊኖ፤ ሺን ጮራ ዎዲያ ናጊዴ፥ ኣ ቦላን ኣይኔ ዱማቴዳባይ ዪና፥ «ሃዌ ፆሳ» ያጊዴ ባሬንቱ ቆፋ ባሺ ኣጌዲኖ።
7ሄዋ ሄራን ሃን ዶዴቲ ኡቴዳ ሳዓ ካፑዋ ፑፒሊዮሳ ጊያዋሲ ጋዲ ዴዔ፤ ኢ ኑና ኢማቴ፥ ሄዙ ጋላሳ ሲቁዋን ሞኪ ሞዪዜዳ። 8ፑፒሊዮሳ ኣቡ ቆፁዋ፥ ሴላኔ ኡሉዋ ካ ሳኬቲ ጊሲዴ ዴዔ፤ ጳዉሎሲ ኣ ሶይ ጌሊዴ፥ ኣው ፆሳ ዎሴዳ፤ ባሬ ኩሺያ ኣ ቦላ ዎዴ፥ ኣ ፓዳ። 9ሄዋፔ ጉዪያን፥ ሄ ሃን ዶዴቴዳ ሳዓን ሃርጊያ ሃራ ኡባ ኣሳይካ ቃሲ ዪዴ ፓፄዳ። 10ሄዋፔ ሲሚና ኑና ዳሮ ቦንቹዋ ቦንቼዲኖ፤ ኑኒ ማርካቢያን ባናው ዴንዴዳ ዎዴ፥ ኦጌው ኑና ኮሺያባ ኑሲ ኢሜዲኖ።
ጳዉሎሲ ማልታፔ ሮሜ ቤዳ
11ሄዙ ኣጌናፔ ጉዪያን፥ ሃን ዶዴቴዳ ሳዓን ባልጉዋ ኣዴ፥ «ማንቴ ፆሳ» #28፡11 ማንቴ ፆሳ፡ ሃዋንቱ ላዑ ኣቱማ ናናቱ፥ ካስቶሪኔ ፓሎኪሳ ጌቴቲያዋንቱ ዜዉሴ ናናቱዋ ጊዲዴ፥ ማርካቢያን ዴዒያ ኣሳቱዋ ናጊያ ፆሳቱዋ ጌቴቲዴ ፄሴቲኖ። ጊያ ኢስኪንዲሪያ ማርካቢያን ባናው ዴንዴዶ። 12ኑኒ ሲራኩሴ ጊያ ካታማ ጌሊዴ፥ ያኒ ሄዙ ጋላሳ ኡቴዶ። 13ሄዋፔ ዩዪዴ፥ ሬጊዩሜ ጊያ ካታማ ጋኬዶ። ኢቲ ጋላሳፔ ጉዪያን፥ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋ ጫርኩ ጫርኪና፥ ዎንቲሳ ጋላሲ ፑቲያሉሳ ጊያ ካታማ ዬዶ። 14ሄዋን ኑኒ ኢቲ ኢቲ ኣማኒያዋንታ ዴሚና፥ ባሬንቱና ላፑ ጋላሳ ኡታና ማላ፥ ኑና ዎሴዲኖ፤ ሄዋፔ ቃሲ ሮሜ ዬዶ።
15ሮሜን ዴዒያ ኣማኒያዋንቱ ኑባ ሲሲዴ፥ ኣፊያሳ ጌያኔ «ሄዙ ኣቂያሳ ጌቴቲያሳ» ጋካናሲ ኑና ሞካናው ዬዲኖ፤ ጳዉሎሲ ኡንቱንታ ቤዔዳ ዎዴ ፆሳ ጋላቲዴ፥ ዎዛናን ሚኒሴዳ።
ጳዉሎሲ ሮሜን ታማሪሴዳ
16ኑኒ ሮሜ ጌሌዳ ዎዴ፥ ጳዉሎሲ ባሬና ናጊያ ዎታዳራና ባሬካ ዴዓናዳን ኡዴቴዳ።
17ሄዙ ጋላሳፔ ጉዪያን፥ ጳዉሎሲ ኣዪሁዳቱዋ ካፓቱዋ ባሬኮ ፄሴዳ፤ ኡንቱንቱ ሺቄዳ ዎዴ፥ ኡንቱንታ ሃዋዳን ያጌዳ፤ «ታናዳን ኣማኒያዋንቶ፥ ታኒ ኑ ኣሳ ዎይ ኑ ኣዋቱዋ ዎጋ ኢታባ ኣይኔ ኦናን፥ ታና ዬሩሳላሜን ቃቺዴ፥ ሮሜ ኣሳሲ ኣዴ ኢሜዲኖ። 18ኡንቱንቱ ታና ቢዴዳዋፔ ጉዬ፥ ሃይቃናው ቤሲያባይ ታ ቦላ ኣይኔ ባዪና ዲራው፥ ታና ቢላናው ኮዬዲኖ። 19ሺን ሄዋ ኣዪሁዳቱ ኤኖ ጌናን ኢፄዳ ዎዴ፥ ‹ታባ ቄሳሬ ፒርዶ› ጋናዌ ታና ኮሼዳፔ ኣቲን፥ ታኒ ታ ዛሪያ ሞቲያባይ ታው ዴዒና ጊዴና። 20ታኒ ሂንቴንቱና ጋኬታናዉኔ ሃሳያናው ሂንቴንታ ፄሴዳዌ ሄዋሳ፤ ኣዪሲ ጎፔ፥ ኢስራዔሊያ ኣሳይ ናሼቻን ናጊያዋ ዲራው ታኒ ሃ ሳንላታን ቃሼታዲ» ያጌዳ።
21ኣዪሁዳ ጪማቱ ጳዉሎሳ፥ «ኑኒ ዪሁዳፔ ኔባው ዳቢዳቢያ ኣኪቤይኮ። ኑ ኢሻቱዋፔካ ሃራይ ኣቶ፥ ኢቱካ ዪዴ፥ ኔባ ኦዲቤና፤ ዎይ ኔ ሱን ባዪዚዴ፥ ኑሲ ኦዲቤና። 22ሺን ሄ ኣሳ ሱን ኡባሳን ኣሳይ ባዪዚዴ ሃሳዪያዋ ኑኒ ኤሪያ ዲራው፥ ኔ ቆፋ ሲሳናው ኮዬቶ» ያጌዲኖ።
23ኡንቱንቱ ባሬንቱ ያና ጋላሳ ጳዉሎሳው ኬሪዴ፥ ሄ ጋላሲ ጮሪዴ ኢ ዴዒያሳ ዬዲኖ፤ ኢካ ኡንቱንቶ ፆሳ ካዉቴባ ማርካቴዳ። ቃሲ ኡንቱንቱ ዬሱሳባ ኣማናና ማላ፥ ሙሴ ሂጊያፔኔ ናባቱ ፃፌዳዋፔ ኣኪዴ ኡንቱንታ ታማሪሲዴ፥ ዎንታፔ ኦማርሲ ጋካናው ሎይ ኦዴዳ። 24ባጋቱ ጳዉሎሲ ጌዳዋ ኣማኔዲኖ፤ ሺን ባጋቱ ኣማኒቤይኪኖ። 25ኡንቱንቱ ባሬንቱ ጊዶን ዬዉዋ ኤኖ ጌናን ኢፄዳ ዎዴ፥ ጳዉሎሲ ኢቲባ ጌዳዋፔ ጉዪያን ቤዲኖ፤ ኢ ሃዋዳን ያጌዳ፤ «ጌሻ ኣያናይ ኑ ኣዋቱዋሲ ናቢያ ኢሲያሳ ማፃፋን፥
26‹ኔኒ ሄ ኣሳኮ ባዴ ሃዋዳን ጋ፤
«ሂንቴንቱ ሲሳ ሲሳና፥
ሺን ሂንቴንቶ ጌሌና፤
ሂንቴንቱ ፄላ ፄላና፥
ሺን ቤዒኪታ።
27ኣዪሲ ጎፔ፥ ሃ ኣሳ ዎዛናይ ጉዙሜዳ፤
ባሬንቱ ሃይ ቱሊሴዲኖ፤
ባሬንቱ ኣዪፊያካ ጪሉሜዲኖ።
ሄዌ ባዌንቶ፥ ባሬንቱ ኣይፊያን ቤዓና፤
ኡንቱንቱ ሃይይካ ሲሳና፤
ኡንቱንቱ ዎዛናይካ ኣኬካና፤
ኡንቱንቱ ታኮ ፆሳኮ ሲማና።
ቃሲ ታኒካ ኡንቱንታ ፓና»
ያጋ› ያጌዳ። #ኢሳ 6፡9-10
28«ሲሚ ሃዌ ፆሳ ኣቶቴይ፥ ኣዪሁዳ ጊዴናዋንቶ ኪቴቴዳዌ ሂንቴንቶ ኤሬቶ። ቃሲ ኡንቱንቱካ ሲሳና» ያጌዳ።
29[ጳዉሎሲ ሄዋ ጌዳዋፔ ጉዪያን፥ ኣዪሁዳቱ ባሬንቱ ጊዶን ዳሮ ፓሉሜቲዴ ቤዲኖ።] #28፡29 ዱማ ዱማ ማፃፋቱ ሃዋ ጉጂያዌ፥ ጳዉሎሲ ሃዋ ጌዳዋፔ ጉዪያን ጊያዋና።
30ጳዉሎሲ ኪራ ጎሊያን ላዑ ላይ ኩሜን ዴዒዴ፥ ባሬኮ ዪያ ኡባ ሞኬ። 31ባሬና ኦኒኔ ዲጌናን ፆሳ ካዉቴባኔ ጎዳ ዬሱሲ ኪሪስቶሳባ ኦዲዴ፥ ያዬናን ዳሪ ቆንጪሲዴ ታማርሴዳ።
Currently Selected:
ዬሱሲ ኪቴዳዋንቱ ኦሱዋ 28: dwrENT
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
