ዬሱሲ ኪቴዳዋንቱ ኦሱዋ 27

ጳዉሎሲ ሮሜ ቤዳ

1ኑኒ ማርካቢያን ፃሊያ ባናው ቆፒ ኡቴዳ ዎዴ፥ ጳዉሎሳኔ ሃራ ኣማሬዳ ቃሼቴዳ ኣሳቱዋ ኣዉጊስፆሳ ዎታዳራቱዋ ጊያዋንቱፔ ኢቲ ዩሊዮሳ ጊያ ፄታቱዋ ካፑዋሲ ኣዴ ኢሜዲኖ። 2ኢሲያ ጋፃን ዴዒያ ጋዳቱዋ ቢያ ኣዲራሚፂዮና ማርካቢያን ጌሊዴ ቤዶ፤ ማቂዶኒያ ኣሳ ጊዲያ ቴሴሎንቄ ኣሪስፂሮኮሲ ኑናና ዴዔ።

3ዎንቲሳ ጋላሲ ኑኒ ሲዶና ጋኪሺን፥ ዩሊዮሲ ጳዉሎሳው ዳሮፔ ኣ፥ «ኔ ዳባቱ ኔና ኮሺያባ ማዳና ማላ፥ ኔኒ ኡንቱንቱኮ ባናው ዳንዳያ» ያጌዳ። 4ሄዋፔ ዴንዲዴ፥ ሲንና ኑ ቦላ ጫርኪያ ዲራው፥ ቆጲሮሳ ሃን ዶዴቴዳ ሳዓን ጫርኬና ባጋ ቤዶ። 5ኪልቂያ ማታኒኔ ጲኒፊሊያ ማታን ዴዒያ ኣባ ፒኒዴ፥ ሊቂያን ዴዒያ ሙራ ጋኬዶ። 6ሄዋን ፄታቱዋ ካፑ ፃሊያ ቢያ ኢስኪንዲሪያ ማርካቢያ ዴሚዴ፥ ኣኒ ኑና ጌሊሴዳ።

7ኑኒ ጮራ ዎዲያ ሎዳን ቢዴ፥ ዳሮ ሜቱዋን ቄኒዶሳ ካታማ ጋኬዶ፤ ሄዋና ባናው ኑና ጫርኩ ዲጊና ሳልሞናና ኣዴ፥ ሃን ዶዴቴዳ ቃርፄሳን ጫርኩዋፔ ቴዔቲዴ ቤዶ። 8ቃሲካ ዳሮ ሜቱዋን ጋፃና ጋፃና ኣዴ፥ ላሲያ ካታማ ማታን ዴዒያ ኣባ ዶናን ማርካቢ ዎፑ ጊዴ ሼምፒያሳ ጌቴቲያሳ ዬዶ።

9ኑኒ ሄዋን ጮራ ዎዲያ ጋሚዔዳዋፔ ጉዪያን፥ ፆማይ ቢሌቲዲጌዳ ዲራው፥ ማርካቢያን ቢያዌካ ሂርጊሺን ጳዉሎሲ ኡንቱንታ ዞሪዴ፥ 10«ኣሳው፥ ኑ ቡሳን ዎልቃማ ቦሻይኔ ዳሮ ባሻይ ዴዓናዌ ታው ቤቴ፤ ባሻይ ዪያዌ ጫና ቦላኔ ማርካቢያ ቦላ ፃላላን ጊዴና፤ ኑ ሼምፑዋ ቦላካ ያናዋ» ያጌዳ። 11ሺን ፄታቱዋ ካፑ ጳዉሎሲ ጌዳዋፔ ኣዴ፥ ማርካቢያን ዴዒያዋንታ ኣዛዚያዌኔ ማርካቢያ ጎዳይ ጊያዋ ኣማኔ። 12ሄ ኣባ ማታ ካታማይ ባልጉዋ ሻጫናው ኡንቱንቶ ሚኬና ካታማ፤ ሄዋ ዲራው፥ ጮራ ኣሳቱ ባሬንቶ ዳንዳዬቶፔ፥ ፒንቄ ጊያ ካታማ ጋኪዴ፥ ባልጉዋ ያኒ ሻጫና ማላ፥ ያፔ ዴንዳናው ዞሬቴዲኖ፤ ፒንቄን ዴዒያ ማርካቢ ሼምፒያ ሚኮ ሳዓይ ዶዬቴዳዌ፥ ኣዋይ ዉሊያሳፔኔ ኡሼቻ ባጋፔ ጊዱዋን፥ ቃሲ ዉሊያሳፔኔ ሃዲርሳፔ ጊዱዋና።

ኣባ ቦላን ጎቱ ዴንዴዳ

13ኣዋይ ኬሲያሳ ፄሊያ ዎዴ ኡሼቻ ዱጌሃ ባጋ ጫርኩ ሎዳን ጫርኬዳ ዎዴ፥ ባሬንቱ ቆፔዳዋዳን ሃኔዳዋ ኡንቱንቶ ማላቲና ዴንዴዲኖ፤ ማርካቢ ቤና ማላ ኦይቂያ ቢራታ ፑዴ ዳፊዴ፥ ቃርፄሳ ማታቲዴ፥ ላንቂያና ኣዲኖ። 14ሺን ዳሪ ጋሚዔናን፥ «ኣዉራቂስ» #27፡14 «ኣዉራቂስ» ጌቴቲያ ዎልቃማ ጎቱ ኪሊ ፑዴሃፔ ዉላ ባጋ ጫርኪያዋ ጊዲያዋ ቤሴ። ጊያ ዳሮ ዎልቃማ ጎቱ ሃ ጊዶን ዴዒያ ሳዓፔ ዱጌ ኡንቱንቱ ቦላ ዴንዴዳ። 15ሄ ጎቱ ማርካቢያ ዴቺዴ ኣናን ዲጊና፥ ባናው ኑሲ ዳንዳዬቴናን ኢፄዳ ዲራው፥ ማርካቢያ ኢ ኣፊያሳ ኣጊዴ ቤዶ።

16ኑኒ ቄዳ ጊያ ሃን ዶዴቴዳ ጫርኩዋፔ ጌሜዳ ሳና ኣያ ዎዴ፥ ዳሪሲ ሜቶቲዴ ማርካቢያ ዎንጊሪያን ናጊ ኣሻናው ዳንዳዬዶ። 17ኡንቱንቱ ዎንጊሪያ ፑዴ ኬሴዳዋፔ ጉዪያን፥ ጋዲያን ማርካቢያ ፃፂዴ፥ ሚኒሲ ቃቼዲኖ፤ ሲርፂሳ ጊያ ሻፊ ኩሜዳ ሳን ባሬንታ ኩንዲሳኔንቶኔ ጊዴ ሂርጊዴ፥ ማርካቢያ ኣፊያ ሻራ ዎዴ፥ ጫርኩዋን ማርካቢያ ጮ ዬዲ ኣጌዲኖ።

18ጎቱ ዎልቃሚዴ ኑ ቦላን ዎልቃሜዳ ዲራው፥ ዎንቲሳ ጋላሲ ጫናፔ ኣባን ኦሉዋ ዶሜዲኖ። 19ሄዜንያ ጋላሲካ ማርካቢያን ዴዒያ ሚሻ ኡንቱንቱ ባሬንቱ ኩሺያን ኦሌዲኖ። 20ኑኒ ዳሮ ዎዲያ ኣዋኔ ፆሊንቲያ ቤዔናን፥ ዎልቃማ ኡሹ ኑ ቦላ ቡኪሺን፥ ሲንፔ ያናን ኣቶኮ ጊዴ ቆፔዶ።

21ኡንቱንቱ ዳሮ ዎዲያ ቁማ ሜናን ጋሚዔዳዋፔ ጉዪያን፥ ጳዉሎሲ ሄ ዎዴ ኡንቱንቱ ጊዶን ዴንዲ ኤቂዴ፥ ሃዋዳን ያጌዳ፤ «ኣሳው፥ ሂንቴንቱ ታ ዞሪያ ኣኬዴንቶኔ ቃርፄሳፔ ዴንዴናን ኣቴዴንቶ፥ ሃዋ ማላ ባዬይኔ ቆሁ ኑና ጋኬና። 22ሺን ሃዒካ ታኒ ሂንቴንታ ያዮፒቴ ጋዴ ዞራይ፤ ኣዪሲ ጎፔ፥ ሃ ማርካቢ ባያናፔ ኣቲን፥ ሂንቴንቱፔ ኢቲ ኡራ ሼምፑካ ባዬና። 23ኣዪሲ ጎፔ፥ ፆሳ ኪታንቻይ፥ ታና ሞዴዳ ታኒ ጎዪኒያ ፆሳዌ፥ ዚኖ ቃማ ታ ማታን ኤቂዴ፥ 24‹ጳዉሎሳ፥ ያዮፓ፤ ኔኒ ሮሜ ጋዲያ ካቲያ ቄሳራ ሲንን ኤቃናው ቤሴ፤ ቤዓ፥ ፆሳይ ባሬ ኬካቴን ኔናና ቢያ ኣሳ ኡባ ሼምፑዋ ኣሻና› ያጌዳ። 25ሄዋ ዲራው ኣሳው፥ ያዮፒቴ። ኣዪሲ ጎፔ፥ ሄ ኪታንቻይ ታው ኦዴዳዋዳን ሃናናዋ ታኒ ፆሳ ኣማናይ፤ 26ሺን ጫርኩ ኑና ኢቲ ሃን ዶዴቴዳ ሳዓን ኣባ ዶናን ዶምዒሳና» ያጌዳ።

27ታማኔ ኦይዴን ጋላሲ ሜዲቴራኒያ ኣባን ኑና ጫርኩ ያኔ ሃኔ ሱጊሺን፥ ማርካቢያን ኦያዋንቱሲ ቃማ ቢላሂ ቢታኮ ማቴዳዋ ማላቴዳ። 28ኡንቱንቱ ሊኪያ ጋዲያ ፄራን ዴፂያባ ቃቺዴ፥ ሃን ዬጊና፥ ሃይ ኦይታሙ ሚቲሪያ ጪማቴዳዋ ኤሬዲኖ። ጉ ጋሚዒዴ፥ ላዔዋ ዬጊዴ፥ ሃታሙ ሚቲሪያ ጪማቴዳዋ ኤሬዲኖ። 29ኡንቱንቱ ሹቻቲያሳን ኩንዴና ማላ ያዪዴ፥ ማርካቢ ቤና ማላ ኦይቂያ ኦይዱ ቢራታ ማርካቢያፔ ጉዬና ኣባን ዬጊዴ፥ ሳዓይ ዎንታና ማላ፥ ባሬንቱ ፆሳቱዋ ዎሲኖ። 30ማርካቢያን ኦያዋንቱ ማርካቢያፔ ኪቻናው ኮዪዴ፥ ማርካቢ ቤና ማላ ኦይቂያ ኣማሬዳ ቢራታቱዋ ማርካቢያፔ ሲን ባጋና ኣባን ዬጊያዋ ማላቲዴ፥ ዎንጊሪያ ኣባን ዎዳ ዎዴ፥ 31ጳዉሎሲ ፄታቱዋ ካፑዋኔ ዎታዳራቱዋ፥ «ሃዋንቱ ማርካቢያ ጊዶን ዴዓና ዮፔ፥ ሂንቴንቱ ኣታናው ዳንዳይኪታ» ያጌዳ። 32ሄዋፔ ጉዪያን፥ ዎታዳራቱ ዎንጊሪ ቃሼቴዳ ጋዲያ ቃንፂዴ፥ ዬዲ ኣጌዲኖ።

33ሳዓይ ዎንታና ሃኒሺን፥ ጳዉሎሲ ኡባይ ቁማ ማና ማላ፥ ሃዋዳን ያጊዴ ዎሴዳ፤ «ሂንቴንቱ ሃቼና ታማኔ ኦይዱ ጋላሳ ናጌዲታ፤ ቃሲ ሄ ኡባንካ ቁማ ሚቤይኪታ። 34ሄዋ ዲራው፥ ጉ ቁማ ሂንቴንቱ ማና ማላ፥ ታኒ ሂንቴንታ ዎሳይ፤ ኣዪሲ ጎፔ፥ ሂንቴንቱ ፓፃ ዴዓናው ጉ ቁማ ማና ኮሼ፤ ሃራይ ኣቶ ሂንቴንቱ ሁጲያ ቢናናፔ ኢቱካ ባዬና» ያጌዳ። 35ጳዉሎሲ ሃዋ ጊዴ፥ ኡኪ ኣኪዴ፥ ኡባ ሲንን ፆሳ ጋላቴዳ፤ ሜን ሙሳ ዶሜዳ። 36ሄዋፔ ጉዪያን ኡባይ ሎይ፥ ባሬንቶ ቃሲ ቁማ ሜዲኖ። 37ኑኒ ማርካቢያን ዴዒያዋንቱ ላዑ ፄታኔ ላፑን ታማኔ ኡሱፑና። 38ኡንቱንቱ ሚዴ ካሌዳ ዎዴ፥ ጫና ዛርጋ ኣባን ኦሊዴ ማርካቢያ ዴፁዋ ካዉሺሴዲኖ።

ማርካቢያ ሜዑሳ

39ሳዓይ ዎንቴዳ ዎዴ፥ ማርካቢያን ኦያዋንቱ ጋዲያ ኤሪቤይኪኖ፤ ሺን ሃይ ጎጊዴ ኣባን ጌሌዳሳ ሚዪያን ዴዒያ ሻፊያ ኣኬካን ፄሌዲኖ። ባሬንቱሲ ዳንዳዬቲንቶ፥ ማርካቢያ ሄ ሻፊያኮ ላጋናው ባሬንቱ ቆፋ ቃቼዲኖ። 40ያቲዴ ማርካቢ ቤና ማላ ኦይቂያ ቢራታቱዋ ቢሊዴ፥ ኣባ ጊዶ ዬጌዲኖ፤ ሄ ዎዴ፥ ማርካቢያ ኮዬዳሳ ዛሪዴ ላጊያ ሚ ቃቼዳ ጋዲያ ቢሌዲኖ፤ ሄዋፔ ጉዪያን፥ ጫርኩ ማርካቢያ ሲንው ሱጋና ማላ፥ ማርካቢያ ኣፊያ ሻራ ሲን ባጋና ቁ ኡዲዴ፥ ቡሳ ዶሜዲኖ። 41ሺን ማርካቢ ጪሙ ዴዒያሳፔ ኣዴ ሃን ዶዴቴዳ ሳዓ ማታን ዴዒያ ዴሳን ዶምዔቲ ኤቄዳ፤ ማርካቢያሲ ጉዬ ባጋይ ቤታ ሱጌን ሜዔሬቲሺን፥ ሲን ባጋይ ዱጌ ሼቲዴ፥ ቃፄናን ኢፂ ኣጌዳ።

42ዎታዳራቱ ቃሼቴዳ ኣሳፔ ኢቱኔ ሃ ዋዴ ኬሲ ኣኪ ቤና ማላ፥ ኡንቱንታ ዎናው ዞሬቴዲኖ። 43ሺን ፄታቱዋ ካፑ ጳዉሎሳ ኣሻናው ኮዪዴ፥ ዎታዳራቱዋ ማቁዋ ኢፄዳ፤ ሃ ዋ ኤሪያ ኡባይ ማርካቢያፔ ሃን ጉፒ ጉፒዴ ካሴቲዴ ጋፃ ኬሳና ማላ ኣዛዜዳ። 44ኣቴዳዋንቱፔ ኣማሬዳዋንቱ ሳንቃን፥ ኣማሬዳዋንቱ ቃይ ማርካቢያ ሜዑዋን ኬሳና ማላ ኣዛዜዳ፤ ሄዋዳን ኡባቱካ ጋፃ ሳሮቴን ኬሴዲኖ።

Currently Selected:

ዬሱሲ ኪቴዳዋንቱ ኦሱዋ 27: dwrENT

Highlight

Copy

Compare