ዬሱሲ ኪቴዳዋንቱ ኦሱዋ 25

ጳዉሎሲ ሮሜ ካቲያኮ ባሬ ዬዉዋ ኣኪዴ ባናው ኦቼዳ

1ፒስፆሲ ኣዉራጃ ጌሌዳ ሄዜንያ ጋላሳፔ ጉዪያን፥ ቂሳሪያፔ ዬሩሳላሜ ቤዳ። 2ያኒ ቄሳቱዋ ካፓቱኔ ኣዪሁዳቱዋ ካሌያዋንቱ ጳዉሎሳ ሞቴዲኖ። 3ኡንቱንቱ ጳዉሎሳ ዎናው ኦጊያን ቆሴቲ ኡታናው፥ ባሬንቶ ሎዖባ ኡዲዴ ኣ ዬሩሳላሜ ኣሃና ማላ፥ ፒስፆሳ ዎሴዲኖ። 4ፒስፆሲ ኡንቱንቶ፥ «ጳዉሎሲ ቂሳሪያን ቃሼቲ ኡቴዳ፤ ታኒ ታ ሁጴዉካ ኤሌካ ያ ጉዬ ሲማናው ቆፓ ኡታዲ። 5ሄዋ ዲራው፥ ኢ ኣዬንቶ ባዪዜዳዌ ዴዖፔ፥ ሂንቴንቱ ጊዶን ኣዎቲያዋንቱ ታናና ቂሳሪያ ቢዴ፥ ኣ ሞቲኖ» ያጊዴ ዛሬዳ።

6ፒስፆሲ ዬሩሳላሜን ሆስፑን ዎይ ታሙ ጋላሳፔ ኣናን ኡቲዴ፥ ቂሳሪያ ቤዳ፤ ዎንቲሳ ጋላሲ ፒርዲያሳን ኡቲዴ፥ ጳዉሎሳ ኣሃና ማላ ኣዛዜዳ። 7ኢ ጋኬዳ ዎዴ፥ ዬሩሳላሜፔ ዬዳ ኣዪሁዳቱ ኣ ማታን ዩዪ ኣ ኤቂዴ፥ ባሬንቶ ሻቲማናው ዳንዳዬቴና ዳሮ ዴፆ ሞቱዋ ኣ ቦላ ዎዲኖ። 8ጳዉሎሲ ሞቴቲዴ፥ «ታኒ ኣዪሁዳቱዋ ሂጊያካ ጌሻ ጎሊያካ ሮሜ ካቲያ ቄሳራካ ኣይኔ ናቃቤይኪ» ያጌዳ።

9ፒስፆሲ ኣዪሁዳቱዋ ናሼቻናው ኮዪዴ ጳዉሎሳ፥ «ፑዴ ዬሩሳላሜ ኬሳዴ፥ ሃ ዬዉዋባ ያኒ ታ ሲንን ኦሼታናው ኮያይ?» ያጊዴ ኦቼዳ።

10ሺን ጳዉሎሲ፥ «ታኒ ኦሼታናው ቤሲያ ቄሳራ ፒርዳ ጎሌን ኤቃዲ። ኔኒካ ሎይ ኤሪያዋዳን፥ ታኒ ኣዪሁዳቱዋ ኣይኔ ናቃቤይኪ። 11ሲሚ ታኒ ናቄዳዋ ዎይ ሃይቃናው ቤሲያዋ ኦዳዋ ጊዶፔ፥ ሃይቁዋፔ ኣታና ጊኬ፤ ሺን ኡንቱንቱ ታና ሞቲያ ሞቱ ሜላ ጊዴዳዋፔ ሂኒ ባጋን፥ ኦኒኔ ታና ኡንቱንቶ ኣዴ ኢማናው ዳንዳዬና፤ ቄሳሬ ታባ ፒርዶ ጋዴ ኦቻይ» ያጌዳ።

12ሄዋፔ ጉዪያን፥ ፒስፆሲ ባሬናና ዞሬቲያዋንቱና ዞሬቲ ሲሚዴ ኣ፥ «ኔኒ ቄሳሬ ታባ ፒርዶ ጋዴ ኦቻዳ፤ ቄሳራኮ ባናሳ» ያጊዴ ዛሬዳ።

ፒስፆሲ ጳዉሎሳባ ኣግሪጳና ማቄቴዳ

13ኣማሬዳ ጋላሳፔ ጉዪያን፥ ካቲያ ኣግሪጳይኔ ባሪኒቄ ፒስፆሳ ሳሮታናው ቂሳሪያ ቤዲኖ። 14ያኒ ኡንቱንቱ ጮራ ጋላሳ ኡቲ ዴዒሺን፥ ፒስፆሲ ካቲያሲ ጳዉሎሳባ ሃዋዳን ያጊዴ ኦዴዳ፤ «ሃዋን ፊሊኪሴ ቃቺዴ ባሺ ቤዳ ኢቲ ቢታኒ ዴዔ። 15ታኒ ዬሩሳላሜን ዴዒሺን፥ ቄሳቱዋ ካፓቱኔ ኣዪሁዳ ጪማቱ ኣ ቦላ ፒርዳና ማላ፥ ታና ዎሲዴ፥ ኣባ ታው ኦዴዲኖ። 16ታኒ፥ ‹ሞቴቴዳ ኡራይ ባሬና ሞቲያዋንቱና ኢቲፔ ኤቄናኒኔ ባሬና ሞቴዳ ዬዉዋሲ ዛሩዋ ኢሜናን፥ ኦና ጊዶፔኔ ኣዴ ኢሚያዌ ሮሜ ኣሳሲ ዎጋ ጊዴና› ያጋዴ ኡንቱንቶ ዛራዲ።

17«ሄዋ ዲራው፥ ኡንቱንቱ ሃዋን ሺቄዳ ዎዴ፥ ታኒ ጋሚዔናን ዎንቲሳ ጋላሲ፥ ፒርዳ ጎሌ ጌላዴ ጳዉሎሳ ኣሃና ማላ ኣዛዛዲ። 18ኣ ሞቲያዋንቱ ኤቂዴ፥ ኢታባን ኣ ሞቴናን ኣጊኪኖ ጋዴ ታኒ ቆፔዳዋዳን፥ ኣይኔ ኣ ሞቲቤይኪኖ። 19ሺን ኡንቱንቱ ባሬንቱ ኣማኔዳባንቱባኔ ጳዉሎሲ፥ ‹ፓፃ ዴዔ› ጊያ ሃይቄዳ ኢቲ ዬሱሳ ጌቴቲያ ቢታኒያባ ኣናና ፓሉሜቴዲኖ። 20ታኒ ሃ ዬዉዋ ዎታዴ ቢዳ ዴማኒታንቶ፥ ቆፋ ቃቼናን ዴዓዴ፥ ጳዉሎሲ ዬሩሳላሜ ቢዴ፥ ሃ ዬዉዋ ያኒ ኦሼታናው ኮዪንቶኔ ጋዴ ኣ ኦቻዲ፤ 21ሺን ጳዉሎሲ ባሬ ዬዉዋ ኣዉጊስፆሴ ቄሳሬ ኦጊያ ኦይና ጋካናው ናጌታናዳን ኦቺና፥ ታኒ ኣ ቄሳራኮ ዬዳና ጋካናሲ፥ ኢ ቃሼታና ማላ ኣዛዛዲ» ያጌዳ።

22ሄዋፔ ጉዬ ኣግሪጳይ ፒስፆሳ፥ «ታኒ ታ ሁጴዉካ ቃሲ ሄ ቢታኒ ጊያዋ ሲሳና ኮያይ» ያጌዳ።

ፒስፆሲ ኣ፥ «ኔኒ ዎንቲ ኢ ጊያዋ ሲሳናሳ» ያጌዳ።

23ዎንቲሳ ጋላሲ፥ ኣግሪጳይኔ ባሪኒቄ ዳሮ ቦንቹዋን ኦላ ካፓቱዋናኔ ካታማን ዴዒያ ዎልቃማ ኣሳና ዪዴ፥ ፒርዳ ጎሌ ጌሌዲኖ፤ ፒስፆሲ ጳዉሎሳ ኣሃና ማላ ኣዛዚና ኣሄዲኖ። 24ፒስፆሲ ሃዋዳን ያጌዳ፤ «ካቲያ ኣግሪጳ፥ ሃዋን ኑናና ዴዒያ ኣሳ ኡባው፥ ኣዪሁዳ ኣሳይ ኡባይ ዬሩሳላሜኒካ ሃዋንካ ዋሲዴ፥ ‹ኢ ሃዋፔ ሲንው ፓፃ ዴዓናው ቤሴና› ያጊዴ፥ ታና ዎሴዳ ቢታኒያ ሃዋ ቤዒታ። 25ሺን ኢ ኣይኔ ሃይቃናው ቤሲያዋ ኦዳዋ ታኒ ዴማቤይኬ፤ ኢ ባሬ ሁጴው፥ ‹ኣዉጊስፆሴ ቄሳሬ ታባ ፒርዶ ያጋዴ ኦቻዲ› ጌዳ ዲራው፥ ቄሳራኮ ኣ ዬዳናው ታኒ ቆፓዲ። 26ታኒ ኣባ ታ ጎዳ ኣዉጊስፆሴ ቄሳሬሲ ፃፋናው ቱሙ ዬዉ ታው ኣይኔ ባዋ፤ ሄዋ ዲራው፥ ኢ ሎይ ኦሼቶዋፔ ጉዪያን፥ ታኒ ፃፊያባ ዴማና ማላ፥ ሂንቴንቱ ሲን፥ ካቲያ ኣግሪጳ፥ ኡባ ኔ ሲን ኣ ኣሃዲ። 27ኣዪሲ ጎፔ፥ ቃሼቴዳ ኡራ ኪቲያ ዎዴ፥ ኣ ኣያው ሞቴዴንቶ፥ ኤሪሴናን ጮዑ ጊ ባሺያዌ ታው ኤያቴ ማላቴ» ያጌዳ።

Currently Selected:

ዬሱሲ ኪቴዳዋንቱ ኦሱዋ 25: dwrENT

Highlight

Copy

Compare