ዬሱሲ ኪቴዳዋንቱ ኦሱዋ 24

ጳዉሎሳ ኣዪሁዳቱ ሞቴዲኖ

1ኢቼሹ ጋላሳፔ ጉዪያን፥ ቄሳቱዋ ኡባቱዋ ካፑ፥ ሃናኒያ፥ ጪማቱዋናኔ ፃርፃሉሳ ጊያ ኢቲ ፃባቃና ዱጌ ቂሳሪያ ዎዳ፤ ኡንቱንቱ ጋዲያ ሞዲያዋ ቦላ ጳዉሎሳ ሞቴዲኖ። 2-3ጳዉሎሲ ፄሴቴዳ ዎዴ፥ ፃርፃሉሴ ኣ ሃዋዳን ያጊዴ፥ ሞቱዋ ዶሜዳ።

«ቦንቼቴዳ ፊሊኪሳ፥ ኑኒ ኔ ባጋና ዳሮ ሳሮቴ ዴሜዶሺን፥ ኔ ቆፋን ሃ ጋዲያሲ ኡባባኒ ኡባሳንካ ሎዖ ላሚ ቤቲያዎ ኔና ሎይ ጋላቲዴ፥ ሃዋ ኣኬቶ። 4ሺን ታኒ ኔና ጋሚዔናን፥ ዶያ ጊዴዳ ኔ ኬካቴን ኑባ ኔኒ ቃንን ሲሳና ማላ፥ ኔና ዎሳይ። 5ኣዪሲ ጎፔ፥ ሃ ቢታኒ ቦ ጊዲዴ፥ ሳዓ ኡባን ዴዒያ ኣዪሁዳቱዋ ጊዶን ዋላሳ ዴንዳ፥ ናዚራዋቱ ባጋ ኣሳ ካሌያዋ ጊዴዳዋ ኤሬዶ። 6ሃራይ ኣቶ ጌሻ ጎሊያካ ቱኒሳናው ኮዪሺን ኣ ኦይቂዴ፥ ኑ ሂጊያዳን፥ ኣ ቦላ ፒርዳናው ቆፔዶ፤ 7ሺን ኦላ ካፑዋ ሉሲዮሲ ዪዴ፥ ዎልቃን ኑ ኩሺያፔ ኣ ዎ ኣኬዳ። 8ኣ ሞቲያዋንቱካ ኔኮ ያና ማላ ኣዛዜዳ፤ ኔኒ ኔ ሁጴው ሃ ቢታኒያ ቢዳዴ፥ ኑኒ ኣ ሞቲያ ዬዉዋ ኡባ ኤራናው ዳንዳያ» ያጌዳ።

9ኣዪሁዳቱካ ቃሲ፥ «ሃ ዬዉ ቱማ» ጊዴ፥ ኣ ቆፋ ኣኬዲኖ።

ጳዉሎሲ ፊሊኪሳ ሲንን ሞቶ ዛሩዋ ኢሜዳ

10ጋዲያ ሞዲያዌ ጳዉሎሳ ያናዳን ዉቲና፥ ኢ ሃዋዳን ያጊዴ ዛሬዳ፤ «ኔኒ ዳሮ ዎዲያፔ ዶማዴ፥ ሃ ኣሳሲ ፒርዳዴ ዴዒያዋ ታኒ ኤራዴ፥ ታ ዬዉዋ ናሼቻን ዛራይ። 11ታኒ ዬሩሳላሜ ጎዪናናው ኬሶዴፔ ታማኔ ላዑ ጋላሳፔ ዳሬናዋ ኔኒ ኔ ሁጴው ኤራና ዳንዳያ። 12ኣዪሁዳቱ ታና ጌሻ ጎሊያን ጊዲና፥ ኣዪሁዳ ዎሳ ጎሌን ጊዲና፥ ካታማን ጊዲና፥ ኦናናኔ ፓሉሜቲሺን ዎይ ኣሳ ሺሻዴ ማቂሺን፥ ኢቲ ኡራናኔ ቤዒቤይኪኖ። 13ኡንቱንቱ ሃዒካ ታና ሞቲያዋ ሻቲማናው ዳንዳይኪኖ።

14«ሺን ታኒ ሃዋ ኔው ኦዳይ፤ ታኒ ሙሴ ሂጊያን ዴዒያዋኔ ናባቱ ፃፌዳ ኡባባ ኣማናናዳን፥ ኑ ኣዋቱዋ ፆሳሲ ኡንቱንቱ ዎርዶ ጊያ ኦጊያን ጎሼታይ። 15ሃዋንቱ ባሬንቱ ሁጴው፥ ‹ኣሳይ ኡባይ፥ ዎርዱካ ፂሉካ ሃይቁዋፔ ዴንዳናዋንታ› ጊያዋዳን፥ ታኒካ ኡንቱንቱ ዴንዲያዋ ፆሳኒ ሂዶታ ዎዴ ኣሙዋኒ ናጋይ። 16ሄዋ ዲራው፥ ታኒ ቃሲ፥ ፆሳ ሲንኒኔ ኣሳ ሲንን ኡባ ዎዴ፥ ፖኩ ባይና ቲላ ዎዛናይ ታው ዴዓና ማላ ሚናይ።

17«ታኒ ዬሩሳላሜፔ ኬሶዴፔ ጮራ ላይፔ ጉዪያን፥ ታ ጋዴ ሂዬሳሲ ሚሻ ኢማናዉኔ ያርሹዋ ያርሻናው ዬሩሳላሜ ባዲ። 18ሄዋ ኦሺን፥ ኣሳይ ሺቄናን፥ ዋላሳይ ዴንዴናን፥ ታኒ ጌሻ ጎሊያን ጌዪሺን፥ ኡንቱንቱ ታና ዴሜዲኖ። 19ሺን ኢሲያፔ ዬዳ ኢቲ ኢቲ ኣዪሁዳቱ ሄዋን ዴዒኖ፤ ኡንቱንቱ ታ ቦላ ዬዉዋ ኮዮፔ፥ ዪዴ ታና ኔ ቦላን ሞታናው ቤሴ። 20-21ዎይ ታኒ ኡንቱንቱ ጊዶን ኤቃዴ፥ ‹ሃይቄዳዋንቱ ዴንዳናዋ ኣማኒያ ዲራው፥ ሃቼ ሂንቴ ሲንን ታ ቦላ ፒርዲኖ› ጋዴ ሃ ቂሳዴ ሃሳዬዳ ኢቲ ቃላፔ ኣቲን፥ ሺቁዋ ሲንን ኤቂሺን፥ ታ ቦላ ኢቲ ባዪዙዋ ዴሜዳዋ ጊዶፔ፥ ሃዋንቱ ባሬንቱ ሁጴው ሃዋን ኦዳናዋንታ» ያጌዳ።

22ሺን ፊሊኪሴ ፆሳ ኦጊያባ ጌሺ ኤሬዳ ዲራው፥ «ታኒ ሂንቴ ዬዉዋ ኦላ ካፑዋ ሉሲዮሲ ዪያ ዎዴ ኦጊያ ኦይና» ያጊዴ፥ ፒርዲያ ዎዲያ ሲንው ኬሬዳ። 23ፊሊኪሴ ቃሲ ጳዉሎሳ ቃቼናን ናጋና ማላኔ ኣ ዳባቱዋፔ ኦኒኔ ኣው ኦሺን፥ ዎይ ኣኮ ዪሺን ዲጌና ማላ፥ ፄታቱዋ ካፑዋ ኣዛዜዳ።

ጳዉሎሲ ፊሊኪሳኔ ዲሩሲላ ሲን ሺቄዳ

24ኣማሬዳ ጋላሳፔ ጉዪያን፥ ፊሊኪሴ ኣዪሁዳ ኣሳ ዛሬ ጊዴዳ ባሬ ማቻቲ ዲሩሲሊና ዪዴ፥ ጳዉሎሳ ኪቲ ኣሂሲዴ፥ ዬሱሲ ኪሪስቶሳን ኣማኒያ ኦጊያ ኢ ሃሳዪሺን ሲሴዳ። 25ጳዉሎሲ ፂሎቴባ፥ ባሬ ሁጲያ ናጉዋባኔ ያና ፒርዳባ ሃሳዪሺን፥ ፊሊኪሴ ያዪዴ፥ «ኔኒ ሃዒው ባ፤ ታው ሚኬዳ ዎዴ፥ ኔና ኪታዴ ፄጊሳና» ያጌዳ። 26ሄ ዎዴ ቃሲ ጳዉሎሲ ቢሌታናው፥ ባሬው ማጋንፃ ኢማንዴሻ ጊዴ ቆፔዳ፤ ሄዋ ዲራው፥ ዳሮ ዎዴ ኣ ኣሂሲ ኣሂሲዴ፥ ኣናና ሃሳዬ።

27ላዑ ላይ ኩሜዳዋፔ ጉዪያን፥ ፊሊኪሳ ኮታ ጶርቂዮሳ ፒስፆሲ ኣኬዳ። ፊሊኪሴ ኣዪሁዳቱዋ ናሼቻናው ኮዪዴ፥ ቃሾ ጎሌን ጳዉሎሳ ባሺ ኣጌዳ።

Currently Selected:

ዬሱሲ ኪቴዳዋንቱ ኦሱዋ 24: dwrENT

Highlight

Copy

Compare