ዬሱሲ ኪቴዳዋንቱ ኦሱዋ 20

ጳዉሎሲ ማቂዶኒያኔ ጊሪኬ ቤዳ

1ዋላሳይ ኢርፄዳዋፔ ጉዪያን፥ ጳዉሎሲ ካሊያዋንታ ኣሂሲዴ ዞሬዳ፤ ኡንቱንታ፥ «ሳሩዋን ዴዒቴ» ጊዴ፥ ማቂዶኒያ ባናው ኬሴዳ። 2ሄ ጋዲያና ኣዴ፥ ቃላ ኦዲዴ፥ ኣሳ ሎይ ሚኒሴዳዋፔ ጉዪያን፥ ጊሪኬ ጋዴ ዬዳ። 3ኢ ሄዋን ሄዙ ኣጌና ኡቲዴ፥ ማርካቢያን ሶሪያ ባናው ቆፒሺን፥ ኣዪሁዳቱ ባሬና ዎናው ኮዪያዋ ቤዒዴ፥ ማቂዶኒያና ጉዬ ሲማናው ባሬ ቆፋ ቃቼዳ።

4ጳዉሎሳ ሞዪዜዳዋንቱ፥ ቤሪያፔ ጳሪሃሳ ናዓ ሶሲጳፂሮሳ፥ ቴሴሎንቄፔ ኣሪስፂሮኮሳኔ ሲኮንዲሳ፥ ዴርቤፔ ጋዮሳኔ ኢሲያፔ ቲኪቆሳኔ ፂሮፊሞሳ፥ ቃሲ ፂሞቶሳ። 5ሄዋንቱ ሲንው ቢዴ፥ ኑና ፂሮዓዳን ናጊኖ። 6ኑኒ ኡኪ ባላ ጋላሳ ቦንቾዋፔ ጉዪያን፥ ፒሊጲሲዮሳ ጊያ ጋዲያፔ ማርካቢያን ዴንዲዴ፥ ኢቼሹ ጋላሳን ፂሮዓዳን ኡንቱንታ ጋኪዴ፥ ያኒ ላፑ ጋላሳ ኡቴዶ።

ጳዉሎሲ ፂሮዓዳ ቤዳ

7ኑኒ ዎጋ ጋላሲ #20፡7 ዎጋ ጋላሲ፡ ግሪኪያ ማፃፋን፥ ሳምባታቱዋፔ ኢቱዋን ያጌ። ኡኪ ሜንናው ሺቂዴዒሺን፥ ጳዉሎሲ ዎንቲና ባናው ቆፔዳ ዲራው፥ ኡንቱንቶ ቃላ ኦዲዴ፥ ቃማ ቢላሂ ጋካናው ዬዉዋ ኣዱሴዳ። 8ኑኒ ሺቂ ኡቴዳ ፖቂያን ጮራ ፆምፒ ዴዔ። 9ኤዉፂኮሳ ጊያ ኢቲ ዎዳላይ ማስኮቲያ ቦላ ኡቲዴ፥ ዳሪሲ ጌሚዒሼዳ። ጳዉሎሲ ሃሳያ ኣዱሴዳ ዎዴ፥ ኤዉፂኮሲ ጌሚዒሹዋን ሃይሬዳዌ ሄዜንያ ፖቂያፔ ሳዓን ኩንዲዴ ሃይቄዳዋ ኣሳይ ዴንዳ። 10ሺን ጳዉሎሲ ዎዴ፥ ኣ ቦላ ጉፋኔዳ። ኣ ኢዲሚዴ፥ «ኣ ሼምፑ ኬሲቤና ዲራው ሂርጎፒቴ» ያጌዳ። 11ያቲዴ ፑዴ ፖቂያ ኬሲዴ፥ ኡኪ ሜንዴ ሜዳ፤ ሳዓይ ዎንታና ጋካናሲ፥ ዳሮ ዎዲያ ሃሳዬዳዋፔ ጉዪያን ቤዳ። 12ዎዳላይ ፓፂና፥ ሶይ ኣፊዴ፥ ዳሪሲ ናሼቴዲኖ።

ጳዉሎሲ ፂሮዓዳፔ ሚሊፄ ቤዳ

13ሺን ጳዉሎሲ ባሬና ያፔ ኑኒ ሞካና ማላ፥ ኑሲ ኦዴዳ ዲራው፥ ካሴቲዴ ማርካቢያኮ ቢዴ፥ ኣሶሳ ባናው ዴንዴዶ፤ ኣዪሲ ጎፔ፥ ጌዲያን ባናው ኢ ቆፔዳ ዲራው ኑና ሄዋዳን ኣዛዜዳ። 14ኢ ኑናና ኣሶሳን ጋኬቲና፥ ማርካቢያን ኣ ኣኪዴ ሚፂሊኔ ዬዶ። 15ዎንቴ ጋላሲ ያፔ ማርካቢያን ዴንዲዴ፥ ኪዮሳ ሄራ ጋኬዶ፤ ቃሲ ዎንቴ ጋላሲ ሳሞሳ ፒኔዶ፤ ቲሮጊሊዮሜን ኣቂዴ፥ ዎንቲና ሚሊፄ ዬዶ። 16ኣዪሲ ጎፔ፥ ጳዉሎሲ ኢሲያን ዳሪ ጋሚዔናን ኤፌሶኔ ላንቂያና ኣናው ባሬ ቆፋ ቃቼዳ፤ ባሬው ዳንዳዬቶፔ፥ ጴንፄቆስቴ ጌቴቲያ ጋላሲ ዬሩሳላሜ ጋካናው ኤሌሌ።

ጳዉሎሲ ኤፌሶኔ ጪማቶ ዉርሴ ሃሳያ ሃሳዬዳ

17ጳዉሎሲ ሚሊፄፔ ኤፌሶኔ ኪቲዴ፥ ኣማኒያ ኣሳ ካሌያዋንታ ፄጊሴዳ። 18-19ዎሳ ጎሌ ጪማቱ ጳዉሎሳኮ ዪና፥ ኡንቱንታ ኢ ሃዋዳን ያጌዳ፤ «ታኒ ኢሲያ ጌሌዳ ኮይሮ ጋላሳፔ ዶሚን፥ ካዉሻቴኒኔ ዳሮ ኣፎኒ ጎዳሲ ኦዴ፥ ኣዪሁዳቱዋ ሺቁዋፔ ታና ጋኬዳ ፓጬ ጊዴዳ ዎዲያ ኡባን ሂንቴንቱና ዋናዴ ዴዓዲታንቶ ሂንቴንቱ ኤሪታ። 20-21ናጋራፔ ፆሳኮ ሲሚያዋኔ ኑ ጎዳ ዬሱሲ ኪሪስቶሳ ኣማኒያዋ ኣዪሁዳቱዋሲኔ ኣዪሁዳ ጊዴናዋንቶ ማርካታዴ፥ ሺቁዋንካ ሂንቴንቱ ጎሌን ጎሌንካ ሂንቴንቶ ኦዳዴ ታማሪሴዳዋፔ ኣቲን፥ ሂንቴንታ ጎዒያባፔ ኢቲባኔ ፓጪሳ ቤይኬ።

22«ቤዒቴ፤ ሃዒካ ታኒ ጌሻ ኣያናሲ ኣዛዜታዴ፥ ዬሩሳላሜ ባይ፤ ያኒ ታው ኣዬ ኬሳኔንቶኔ ኤሪኬ። 23ጌሻ ኣያናይ ቃሹኔ ዋዪ ታና ናጊያዋ ካታማ ኡባን ታው ኦዴ። 24ሺን ታ ዎ ፖላናዉኔ ጎዳ ዬሱሲ ኪሪስቶሳፔ ታኒ ኣኬዳ ኦሱዋ ፆሳ ኣ ኬካቴ ዎንጋላ ሚሺራቹዋ ማርካቲያዋ ፖላናው፥ ታ ሼምፑዋ ማዴናዋዳን ፓይዳይ።

25«ቤዒቴ፤ ታኒ ሃዒካ ፆሳ ካዉቴባ ኦዳዴ፥ ሂንቴንቱ ኡባ ጊዶን ዩያዲ፤ ሲሚ ሃዋፔ ሲንው ሂንቴንቱፔ ኦኒኔ ታና ቤዔናዋ ኤራይ። 26ሄዋ ዲራው፥ ሂንቴንቱፔ ኢቲ ኡራይ ባዮፔካ ታኒ ሄዋን ጌሌናዋ ሃቼ ሂንቴንቶ ጌሻዴ ኦዳይ። 27ኣዪሲ ጎፔ፥ ፆሳይ ኦናው ቆፔዳዋ ኡባ ሂንቴንቶ ኣይኔ ኣሼናን ኦዳዲ።

28«ዬሱሲ ባሬ ሱን ዎዜዳ ፆሳ ኣማኒያዋንታ ናጊቴ፤ ቃሲ ጌሻ ኣያናይ ሂንቴንታ ካፓቱዋ ኦዴ ሱንዳ ዉዲያ ኡባኔ ሂንቴንቱ ሁጲያ ናጊቴ። 29-30ታኒ ቤዳዋፔ ጉዪያን፥ ዉዲያሲ ቃሬቴና ኢታ ዎራካናቱ ሂንቴንቱ ጊዶ ጌላናዋንታኔ፥ ካሊያዋንታ ባሬንቱ ጌዱዋ ካሌናው ዎርዱዋ ሃሳዪያ ኣሳቱ ሂንቴንቱ ጊዶፔ ዴንዳናዋ ኤራይ። 31ሄዋ ዲራው፥ ታኒ ሄዙ ላይ ቃማኔ ጋላሳ ኣፎኒ ሂንቴንታ ሁጲያን ሁጲያን ሚኒሲያዋ ኣጋቤናዋ ቆፒዴ ጌንጪቴ።

32«ሃዒካ ሂንቴንታ ሚኒሳናዉኔ ጌሻ ኣሳ ኡባ ጊዶን ላቲሳናው ዳንዳዪያ ፆሳሲኔ ኣ ኣ ኬካቴ ቃላሲ ሂንቴንታ ሃዳራ ኢማይ።

33«ታኒ ኦፔኔ ቢራ ዎይ ዎርቃ ዎይ ማዩዋ ኣሞታቤይኪ፤ 34ታኒ ሃ ታ ኩሺያን ታናኔ ታናና ኢቲፔ ዴዒያዋንታ ኮሼዳዋ ኦዳዋ ሂንቴንቱ ሂንቴንቱ ሁጴው ኤሪታ። 35ሂንቴንቱ ሃዋዳን ዳቡሪ ኦዴ፥ ዳቡራንቻቱዋ ማዳናሲኔ ጎዳ ዬሱሲ ባሬ ሁጴው፥ ‹ኣኪያዋፔ ኢሚያዌ ኣንጄቴዳዋ› ጌዳዋዳን፥ ኣ ቃላ ሂንቴንቱ ዎዛና ኣናው ቤሲያዋ ታኒ ጮራ ኦጊያን ሂንቴንታ ቤሳዲ» ያጌዳ።

36ጳዉሎሲ ሄዋ ሃሳይ ዉርሲዴ፥ ኡንቱንቱ ኡባና ኢቲፔ ጉልባቲዴ፥ ፆሳ ዎሴዳ። 37ኡንቱንቱ ኡባይ ጳዉሎሳ ኢዲሚዴ፥ ዬኪዴ ዬሬዲኖ። 38ኡባፔ ኢ፥ «ታና ላዔዋ ኡባካ ቤዒኪታ» ያጌዳ ቃላይ ኡንቱንታ ዳሮ ቃሬና ማርካቢያ ጋካናው ኣ ሞዪዜዲኖ።

Currently Selected:

ዬሱሲ ኪቴዳዋንቱ ኦሱዋ 20: dwrENT

Highlight

Copy

Compare