ዬሱሲ ኪቴዳዋንቱ ኦሱዋ 17

ቴሴሎንቄን ዴንዴዳ ዋላሳ

1ጳዉሎሲኔ ሲላሴ፥ ኣምፒጶሊሳናኔ ኣጶሎኒያና ኣዴ፥ ቴሴሎንቄ ዬዲኖ፤ ቴሴሎንቄን ኣዪሁዳ ዎሳ ጎሊ ዴዔ። 2ጳዉሎሲ ባሬ ዶያዳንካ ያ ጌሌዳ፤ ሄዋን ሄዙ ሳምባታ ጋላሳቱዋን ፆሳ ማፃፋቱዋፔ ኣሳና ሃሳዬዳ፤ 3ኪሪስቶሲ ዋዪያ ኣካናዉኔ ሃይቁዋፔ ዴንዳናው ቤሲያዋ ኡንቱንቶ ቢሊዴ ኦዲዲኔ ቱማ ጊዴዳዋካ ኡንቱንታ ኤሪሲዴ፥ «ዬሱሲ ሃ ታኒ ሂንቴንቶ ኦዲያዌ ኪሪስቶሳ» ያጌ። 4ኡንቱንቱፔ ኢቱ ኢቱ ዬዉ ቱማ ጊዴዳዋ ኣኬኪዴ፥ ጳዉሎሳናኔ ሲላሴና ጋኬቴዲኖ፤ ሃዋዳንካ፥ ፆሳሲ ጎዪኒያ ጮራ ጊሪኬ ኣሳይኔ ጮራ ቦንቼቴዳ ማጫዋንቱ፥ ጳዉሎሳናኔ ሲላሴና ጋኬቴዲኖ።

5ሺን ኣዪሁዳቱ ቃናቲዴ፥ ኢቲ ኢቲ ኦሱ ባዪና ኢታ ኣሳቱዋ ቆጫፔ ሺሺዴ ካታማ ኣሳ ዋላሴዲኖ፤ ጳዉሎሳኔ ሲላሳ ኣሳኮ ኬሳና ማላ ኮዪዴ፥ ያሶና ጎሊያ ዶዴዲኖ። 6ጳዉሎሲኔ ሲላሴ ኡንቱንቶ ቤቴናን ኢፂና፥ ያሶናኔ ኢቲ ኢቲ ኢሻቱዋ ካታማ ካፓቱዋኮ ኣፊዴ፥ «ሃዋንቱ ጋዲያ ኡባ ሜቶዳዋንቱ፥ ሃዋካ ዬዲኖ። 7ያቲና ያሶኒ ኡንቱንታ ባሬ ሶዪን ዎዳ፤ ሃዋንቱ ኡባይ፥ ‹ዬሱሳ ጊያ ሃራ ካቲ ዴዔ› ጊዴ ቄሳሬ ኣዛዙዋ ሚኒሲኖ» ያጊዴ፥ ኮሻ ቂሲዴ ሃሴዬዲኖ።

8ሺቄዳ ኣሳይኔ ካታማ ካፓቱ ሄዋ ሲሲዴ ሜቶቴዲኖ። 9ካፓቱ ያሶናኔ ሃራቱዋ ዋሲያን ቢሌዲኖ።

ጳዉሎሲኔ ሲላሴ ቤሪያ ቤዲኖ

10ኣማኒያዋንቱ ጳዉሎሳኔ ሲላሳ ሳዓይ ቃሚያዋኒ ኤሌካ ቤሪያ ዬዴዲኖ። ያ ጋኪዴ፥ ኣዪሁዳ ዎሳ ጎሌ ጌሌዲኖ። 11ቤሪያ ኣሳቱ ቴሴሎንቄን ዴዒያ ኣሳቱዋፔካ ኣ ዶዬቶ ዎዛናይ ዴዒያ ዲራው፥ «ጳዉሎሲ ጌዳዌ ቱሜንቶኔ» ያጊዴ፥ ኡባ ጋላሲ ፆሳ ማፃፋቱዋ ታማሪዴ፥ ቃላ ኩሜን ላሞታን ኣኬዲኖ። 12ሄዋ ዲራው፥ ኡንቱንቱፔ ጮራቱ፥ ጊሪካቱዋፔ ቦንቼቴዳ ጮራ ማጫዋንቱኔ ጮራ ኣቱማ ኣሳቱ ኣማኔዲኖ።

13ሺን ቴሴሎንቄን ዴዒያ ኣዪሁዳቱ ጳዉሎሲ ፆሳ ቃላ ቤሪያንካ ኦዴዳዋ ሲሴዳ ዎዴ፥ ቤሪያ ዪዴ፥ ኣሳ ኣናና ዋላሴዲኖ። 14ሄዋፔ ጉዪያን፥ ኢሻቱ ኤሌካ ጳዉሎሳ ኣባ ማታን ዬዲ ኣጌዲኖ፤ ሺን ሲላሴኔ ፂሞቶሴ ቤሪያን ኣቴዲኖ። 15ጳዉሎሳ ሞዪዜዳ ኣሳቱ ኣቴና ጋዲኖ፤ ሄ ኣሳቱ ሲላሴኔ ፂሞቶሴ ባሬንቶ ዳንዳዬቴዳዋዳን፥ ኤሌካ ባሬኮ ያና ማላ፥ ጳዉሎሲ ኪቴዳ ኪታ ኣኪዴ፥ ቤሪያ ሲሜዲኖ።

ጳዉሎሲ ኣቴና ቤዳ

16ጳዉሎሲ ኣቴናን ሲላሳኔ ፂሞቶሳ ናጊዴ፥ ካታማን ኤቃይ ኩሜዳዋ ቤዒዴ ዪሎቴዳ። 17ሄዋ ዲራው፥ ኣዪሁዳ ዎሳ ጎሊያን ኣዪሁዳቱዋናኔ ፆሳሲ ጎዪኒያ ኣዪሁዳ ጊዴና ኣሳቱዋና ፓሉሜቴ፤ ቃሲ ኡባ ጋላሲ ጌያን ባሬናና ጋኬቲያ ኣሳናካ ፓሉሜቴ። 18ቃሲ ኤፒቆሮሳፔኔ #17፡18 ኤፒቆሮሳ፡ ሃዌ ጋዲያ ጊዲዴ፥ ሃ ጋዲያን ዴዒያ ኣሳቱ ናሼቺያ ኣሳ ዴዑዋሲ ኮይሮ ሳዓ ኦይቄዳ ያጊ ታማሪሲያ ኤፒቆሮሳ ጊያ ቢታኒያ ቲሚርቲያ ካሊያዋንታ። ኢስፆዒኪያፔ #17፡18 ኢስፆዒኪያ፡ ሃዌካ ጋዲያ ጊዲዴ፥ ሃ ጋዴን ዴዒያ ኣሳቱ፥ ባሬና ሞዱሳኔ ባሬ ቆፋን ካሌሴቲያዋ ኣሳይ ታማራና ቤሴ፥ ያጊያ ቲሚርቲያ ታማሪሲያ ዜኖ ያጌቲያ ቢታኒያ ቲሚሪቲያ ካሊያዋንታ። ዬዳ ኢቲ ኢቲ ኤራንቻቱ ጳዉሎሳና ፓሉሜቴዲኖ፤ ኡንቱንቱፔ ኢቱ ኢቱ፥ «ሃ ቶፊናይ ኣያ ሃሳያናው ኮዪ?» ያጌዲኖ።

ሃራቱ ጳዉሎሳ ዬሱሳባኔ ሃይቁዋፔ ኢ ዴንዴዳዋ ባሬንቶ ኦዲያ ዲራው፥ «ኦራ ፆሳቱባ ኦዲያዋ ማላቴ» ያጌዲኖ።

19-20ጳዉሎሳ ኦይቂዴ፥ «ሃ ኔኒ ታማሪሲያ ኦራ ዬዉ ኣዬንቶ ኑና ኤሪሳሪኪ? ኣዪሲ ጎፔ፥ ኔኒ ኑሲ ኦራባ ኦዳሳ፤ ሲሚ ሃዌ ኣዬንቶ ኑኒ ኤራናው ኮዬቶ» ያጊዴ ጳዉሎሳ ኣሪዮስፓጎሳ ጌቴቲያሳ ኣፌዲኖ። 21ኣቴና ኣሳይ ኡባይኔ ሄዋን ዴዒያ ኢማቱ ኦራባ ሃሳዪዲኔ ሲሲዴ ፔሺያዋፔ ኣቲን፥ ሃራባን ፔሺኪኖ።

22ጳዉሎሲ ኣሪዮስፓጎሳን ዴዒያ ሺቁዋ ሲንን ኤቂዴ፥ ሃዋዳን ያጌዳ፤ «ኣቴና ኣሳቶ፥ ፆሳቱዋሲ ኡባባኒ ሂንቴንቱ ዳሪ ያዪያዋ ታኒ ቤዓይ። 23ኣዪሲ ጎፔ፥ ታኒ ሂንቴንቱ ጎዪኒያዋ ፄላዴ ኣሺን፥ ‹ኤሬቴና ፆሳሲ› ጌቴቲዴ ፃፌቴዳ ያርሹዋ ሳዓ ቃሲ ዴማዲ፤ ሄዋ ዲራው፥ ሃ ሂንቴ ኤሬናን ጎዪኒያዋ ታኒ ሂንቴንቶ ኦዳይ።

24«ኣላሚያኔ ኣላሚያን ዴዒያ ኡባባ ሜዳ ፆሳይ ሳሉዋኔ ሳዓ ጎዳይ፥ ኣሳይ ኬፄዳ ጌሻ ጎሊያን ዴዔና። #1ካት 8፡27፤ ኢሳ 42፡5፤ ኪት 7፡48 25ኣዬንቶ ፓጬዳ ኣሳዳን፥ ኣሳ ኩሺያ ኢ ፄሌና፤ ኣዪሲ ጎፔ፥ ኢ ባሬ ሁጴው ዴዑዋ ሼምፑዋኔ ኡባባ ኣሳ ኡባው ኢሜዳ። 26ፆሳይ ኣሳ ዛሪያ ኡባ ኢቲ ኡራፔ ሜዴ፥ ጋዲያ ኡባን ዎዳ፤ ኢ ባሬ ሁጴው ኡንቱንቱ ዴዓና ዎዲያኔ ሳዓ ካሴ ዛዋዬዳ።

27«ኢ ሄዋ ኦዳዌ ኡንቱንቱ ኦይቂ ኦይቂ ፄሊዴ፥ ባሬና ኮዪዴ፥ ኦኒ ኤሪ ዴማናዋንቴሻ ጊያዋና፤ ጊዶፔኔ፥ ፆሳይ ኑፔ ኦሲኔ ሃኮ ጊዴና። 28ኣዪሲ ጎፔ፥ ሂንቴንቱፔ ኢቲ ኢቲ ኤራንቻቱ፥ ‹ኑኒ ኣ ናና› ጌዳዋዳን፥ ኑኒ ኣኒ ፓፃ ዴዔቶኔ ቃፄቴቶ። 29ሲሚ ኑኒ ፆሳ ናና ጊዴዳ ዲራው፥ ፆሳይ ኣሳ ጪንጫቴኒኔ ቆፋን ዎርቃፔ ዎይ ቢራፔ ዎይ ሹቻፔ ኦሴቴዳዋ ማላቴ ያጊዴ፥ ቆፓናው ቤሴና። 30ሄዋ ዲራው፥ ፆሳይ ኣሳይ ኤሪቤና ዎዲያ ኣዳ፤ ሺን ሃዒ ኡባሳን ኣሳይ ኡባይ ናጋራፔ ሲማና ማላ ኣዛዜዳ። 31ኣዪሲ ጎፔ፥ ፆሳይ ዎዲያ ኬሪ ዎዳ፤ ሄ ዎዲያን ባሬ ዶሬዳ ኡራን ሳዓን ዴዒያ ኣሳ ኡባ ቦላ ፂሎ ፒርዳ ኢ ፒርዳና፤ ኣሳ ኡባው ሃይቁዋፔ ዬሱሳ ዴንዳዋን ሄዋ ቱማዬዳ» ያጌዳ።

32ኡንቱንቱፔ ኢቲ ኢቲ ኣሳቱ ሃይቁዋፔ ዴንዱዋባ ጳዉሎሳፔ ሲሲዴ፥ ኣ ቦላ ቂሊጬዲኖ፤ ሺን ሃራ ኣሳቱ ኣ፥ «ኑኒ ሃዋ ኔፔ ጉጂዴ ሲሳና ኮዬቶ» ጌዲኖ። 33ሄዋ ዲራው፥ ጳዉሎሲ ኡንቱንቱ ጊዶፔ ኬሴዳ። 34ሺን ኢቲ ኢቲ ኣቱማ ኣሳቱ ጳዉሎሳና ጋኬቲዴ ኣማኔዲኖ፤ ኡንቱንቱ ጊዱዋን ኣሪዮስፓጎሳን ዴዒያ ፒርዳ ጎሌ ዳናይ ዲዮናሲዮሲ፥ ዳማሪሶ ጌቴቲያ ኢቲ ሚሺራቲና ሃራ ኣሳቱ ዴዒኖ።

Currently Selected:

ዬሱሲ ኪቴዳዋንቱ ኦሱዋ 17: dwrENT

Highlight

Copy

Compare