ዬሱሲ ኪቴዳዋንቱ ኦሱዋ 16

ፂሞቶሴ ጳዉሎሳናኔ ሲላሴና ጋኬቴዳ

1ጳዉሎሲ ቃሲ ዴርቤኔ ሊስፂራ ቤዳ፤ ሄዋን ፂሞቶሳ ጌቴቲያ ካሊያዌ፥ ኢቲ ኣማኒያ ኣዪሁዳ ሚሺራቲ ናዓይ ዴዔ፤ ኣ ኣቡ ጊሪኬ ኣሳ። 2ሊስፂራኒኔ ኢቆኒዮኔን ዴዒያ ኢሻቱ ፂሞቶሳባ ሎይ ማርካቴዲኖ። 3ጳዉሎሲ ፂሞቶሳ ባሬናና ኣፋናው ኮዪዴ፥ ኣ ኣቡ ጊሪኬ #16፡3 ኣ ኣቡ ግሪኬ … ኣ ኦይቂዴ ቃፃሬዳ፡ ግሪኬ ኣሳይ ባሬንቱ ናና ቃፃሪኪኖ። ሺን ፂሞቶሴ ቃፃሬታና ዮፔ፥ ኣዪሁዴ ኣሳይ ኣ ኣኬና ዲራው፥ ጳዉሎሲ ኣ ኦይቂዴ ቃፃሬዳ። ኣሳ ጊዴዳዋ ሄዋን ዴዒያ ኣዪሁዳ ኡባይ ኤሪያ ዲራው፥ ኣ ኦይቂዴ ቃፃሬዳ። 4ኡንቱንቱ ካታማቱዋና ቢዴ፥ ዬሱሲ ኪቴዳ ዬሩሳላሜን ዴዒያዋንቱኔ ጪማቱ ዎዳ ሂጊያ ኣማኒያዋንቱ ናጋና ማላ፥ ኡንቱንቶ ኦዲዴ ኣዲኖ። 5ሄዋ ዲራው፥ ኣማኒያዋንቱ ኣማኑዋን ሚኒ፥ ፓይዱዋንካ ጋላሳፔ ጋላሳን ዳሪ ዳሪ ቤዲኖ።

ጳዉሎሲ ማቂዶኒያ ባናዳን ፄጌቴዳ

6ኢሲያን ቃላ ኦዴና ማላ፥ ጌሻ ኣያናይ ኡንቱንታ ዲጌዳ ዲራው፥ ፒርጊያ ጋዲያናኔ ጋላቲያ ጋዲያና ኣዲኖ። 7ኡንቱንቱ ሚሲያ ዛዋ ጋኬዳ ዎዴ፥ ቢቲኒያ ባናው ኮዬዲኖ፤ ሺን ዬሱሳ ኣያናይ ኡንቱንታ ዲጌዳ። 8ሄዋ ዲራው፥ ኡንቱንቱ ሚሲያ ማታና ኣዴ፥ ፂሮዓዳ ዎዲኖ። 9ጳዉሎሲ ቃማ ሳፃን ኢቲ ማቂዶኒያ ቢታኒ ባሬና፥ «ማቂዶኒያ ፒናዴ ኑና ማዳሪኪ» ያጊዴ ኤቂ ዎሲሺን ቤዔዳ። 10ሳፃ ኢ ቤዔዳዋፔ ጉዪያን፥ ኑኒ ኤሌካ ማቂዶኒያ ባናው ኮዬዶ፤ ኣዪሲ ጎፔ፥ ዎንጋላ ሚሺራቹዋ ያኒ ዴዒያ ኣሳሲ ኦዳናው፥ ፆሳይ ኑና ፄሴዳዋ ኑሲ ማላቴዳ።

ሊዲያ ፒሊጲሲዮሳን ኪሪስቶሳ ኣማናዱ

11ሄዋ ዲራው፥ ፂሮዓዳፔ ዴንዲዴ፥ ሲቲ ጊዴ ማርካቢያን ሳሞቲራቄ ቤዶ፤ ዎንቴ ጋላሲ ናጱሌ ቤዶ። 12ሄዋፔ ፒሊጲሲዮሳ ቤዶ፤ ፒሊጲሲዮሲ ማቂዶኒያ ቢታው ሁጴ ካታማ፤ ቃሲ ሮሜ ኣሳይ ዴዒያ ካታማ፤ ኑኒ ሄ ካታማን ኣማሬዳ ጋላሳ ኡቴዶ።

13ሳምባታ ጋላሲ፥ ካታማፔ ጋፃን ሻፋ ዶናን ኣዪሁዳቱ ፆሳ ዎሲያ ሳዓይ ዴዒያዋ ኣኬኪዴ ቤዶ፤ ሄዋን ኡቲዴ ሺቄዳ ማጫ ኣሳሲ ቃላ ኦዴዶ።

14ኢቲ ሊዲያ ጌቴቴዉና፥ ቲያፂሮና ካታማፔ ያዴ ፆሳ ኣማኔዉና፥ ዞዖ ማዩዋ ዛሊዒያ ሚሺራታ፥ ኑኒ ኦዲያዋ ሲሳዱ፤ ጳዉሎሲ ኦዲያዋካ ኢዛ ሲሳና ማላ ፆሳይ ኢ ዎዛና ዶዬዳ። 15ሊዲያ ባሬ ሶይ ኣሳና ኢቲፔ ፃማቄቴዳዋፔ ጉዪያን ኑና፥ «ሂንቴንቱ ታና ጎዳ ቱማቴን ኣማናው ጊዴ ቆፖፔ፥ ታ ሶዪን ዴዒሺቴ» ጋዴ ዎሳዱ፤ ሚኒሳዴ ሾባዱ።

ጳዉሎሲኔ ሲላሴ ቃሼቴዲኖ

16ኑኒ ፆሳ ዎሲያሳ ቢሺን፥ ኢታ ኣያናይ ኢዚ ቦላ ኣቂና ካዪያ ኢቲ ኣሺካሬ ናታ ኑናና ጋኬታዱ፤ ሄ ናታ ካያዴ ዳሮ ሚሻ ባሬ ጎዳቱዋሲ ዴማዱ። 17ጋኬታዴ ጳዉሎሳኔ ኑና ካላዴ፥ «ሃዋንቱ ሂንቴንቶ ኣታና ኦጊያ ኦዲያዋንቱ፥ ኡባፔ ቦላ ፆሳ ኣይሌቱዋ» ጋዴ ኮሻ ቁ ኦዴ ሃሳያው።

18ኡባ ጋላሲ ሄዋዳን ጋው፤ ሺን ጳዉሎሲ ዪሎቲዴ ጉዬ ሲሚ፥ ሄ ኢታ ኣያና፥ «ኔኒ ኢፔ ኬሳና ማላ ዬሱሲ ኪሪስቶሳ ሱንን ኔና ኣዛዛይ» ያጌዳ፤ ሄ ማንዒያንካ ኢታ ኣያናይ ኢፔ ኬሲ ኣጌዳ።

19ሺን ኢዚ ጎዳቱ ባሬንቱ ሚሻ ዴማና ኦጊ ዬዳዋ ቤዒዴ፥ ጳዉሎሳኔ ሲላሳ ኦይቂዴ፥ ጌያ ሳዓን ዴዒያ ዳናቱዋ ሲን ጎቺ ኬሴዲኖ። 20ዳናቱዋ ሲን ኡንቱንታ ኣፊዴ፥ «ሃዋንቱ ኣዪሁዳ ኣሳ ጊዲዴ፥ ኑ ካታማ ኣሳ ሎይ ሜቶኖ። 21ኑኒ ሮሜ ጋዲያ ኣሳ ጊዲዴ፥ ኣካናዉኔ ኦናው ዎጋ ጊዴናባ ታማሪሲኖ» ያጌዲኖ።

22ኣሳይ ኢቲ ባጋ ጊዲዴ፥ ጳዉሎሳ ቦላኒኔ ሲላሳ ቦላ ዴንዴዳ፤ ዳናቱካ ኡንቱንቱ ማዩዋ ቃሪ ኣኪዴ፥ ፃምዓን ኡንቱንታ ሾጫና ማላ ኣዛዜዲኖ። 23ኡንቱንቱ ዳሪሲ ዋዳዋፔ ጉዪያን፥ ቃሾ ጎሊያን ዬጌዲኖ። ቃሾ ጎሊያ ናጊያዌካ ኡንቱንታ ሚኒሲ ናጋናዳን ኣዛዜዲኖ። 24ቃሾ ጎሊያ ናጊያዌ ሄ ኣዛዙዋ ኣኪዴ፥ ጳዉሎሳኔ ሲላሳ ቃሾ ጎሊያ ቆልዖ ጌሊሴዳ፤ ኡንቱንቱ ጌዲያካ ሚና ጋ ዳራፂዴ ቃቼዳ።

25ሺን ቃማ ቢላሄ ጊዲያ ሄራን ጳዉሎሲኔ ሲላሴ ፆሳ ዎሲዴ፥ ማዚሙሪያ ዬፂዴ ፆሳ ጋላቲኖ፤ ቃሼቶ ኣሳይ ኡንቱንቱ ጊያዋ ሲሴ። 26ቃሾ ጎሊያ ፃጱ ቃፃና ጋካናው ዎዛና ኣናን ቢታይ ዳሪሲ ቃፄዳ፤ ሄ ማንዒያንካ ፔንጊካ ኡባይ ዶዬቲ ኣጊና፥ ቃሼቴዳ ኣሳ ኡባ ሳንላታይ ቢሌቲ ዎዳ። 27ቃሾ ጎሊያ ናጊያዌ ጌሚዒሹዋፔ ቤጎቲያ ዎዴ፥ ቃሾ ጎሊያ ፔንጊካ ኡባይ ዶዬቴዳዋ ቤዒዴ፥ ቃሼቶ ኣሳይ ኬሲ ኣኪዴ ቢዲጌዳዋ ኣው ማላቲና፥ ባሬና ዎናው ቆፒዴ፥ ጩቢያ ኣኬዳ። 28ሺን ጳዉሎሲ ኮሻ ቁ ኦዴ፥ «ኔኒ ኔና ኣያኔ ኡዶፓ፤ ኣዪሲ ጎፔ፥ ኑኒ ኡባይ ሃዋን ዴዔቶ» ያጌዳ።

29ቃሾ ጎሊያ ናጊያዌ ፆምፒያ ዎሲ ኣኪዴ፥ ኤሌካ ቆልዖ ዎፄዳ፤ ኮኮሪዴ ጳዉሎሳ ሲንኒኔ ሲላሴ ሲንን ጉፋኔዳ፤ 30ኡንቱንታ ካሬ ኬሲዴ፥ «ታ ጎዳቶ፥ ታኒ ኣታናው ኣያ ኦና ቤሲ?» ያጌዳ።

31ጳዉሎሲኔ ሲላሴ ኣ፥ «ጎዳ ዬሱሲ ኪሪስቶሳ ኣማና፤ ኔኒ ኣታና፤ ኔ ሶይ ኣሳይካ» ያጌዲኖ። 32ኡንቱንቱ ኣዉኔ ኣ ሶዪን ዴዒያ ኡባው ጎዳ ቃላ ኦዴዲኖ። 33ቃማ ሄ ሳቲያንካ ቃሾ ጎሊያ ናጊያዌ ኡንቱንታ ኣፊዴ ኡንቱንቱ ማይ ሜጬዳ፤ ሄ ማንዒያንካ ባሬ ሶይ ኣሳ ኡባና ፃማቄቲ ኣጌዳ። 34ጳዉሎሳኔ ሲላሳ ፑዴ ባሬ ሶይ ኣፊዴ፥ ኡንቱንቶ ቁማ ኣዳ፤ ኢ ባሬ ሶይ ኣሳ ኡባና ፆሳ ኣማኔዳ ዲራው፥ ናሼቴዳ።

35ዎንቲና ዳናቱ፥ «ሄ ኣሳቱዋ ቢላ» ያጊዴ፥ ፖሊሲያ ካፓቱዋ ኣኮ ኪቴዲኖ። 36ሄዋፔ ጉዬ ቃሾ ጎሊያ ናጊያዌ፥ «ሂንቴንቱ ቢሌታና ማላ፥ ዳናቱ ታው ኪቴዲኖ፤ ሲሚ ሃዒ ኬሲዴ ሳሮቴን ቢቴ» ያጊዴ ሄ ኪታ ጳዉሎሳው ኦዴዳ።

37ሺን ጳዉሎሲ ሄ ፖሊሲያ ካፓቱዋ፥ «ኑኒ ሮሜ ጋዴ ኣሳ #16፡37 ሮሜ ጋዴ ኣሳ፡ ሮሜ ካዉቴን ኤሬቲዴ ዴዒያ ጉ ኣሳይ ሄ ጋዴ ኣሳቱዋ ጌቴቲኖ። ሄዋንቶካ ቃይ ሃራቱዋፔ ዱማቲያ ማታይኔ ካጫይ ዴዔ። ጊዲሺን፥ ኡንቱንቱ ኑና ፒርዳይ ባይናን ኣሳ ሲንን ዋዴ፥ ቃሾ ጎሊያን ዬጌዲኖ። ሃዒ ኑና ጌማን ኬሲ ዬዲኖ? ሃኔና፤ ኡንቱንቱ ባሬንቱ ሁጴው ዪዴ፥ ኑና ኬሲኖ» ያጌዳ።

38ፖሊሲያ ካፓቱ ዳናቱዋሲ ሄዋ ኦዲና፥ ጳዉሎሲኔ ሲላሴ ሮሜ ጋዴ ኣሳ ጊዴዳዋ ሲሴዳ ዎዴ፥ ያዬዲኖ። 39ሄዋ ዲራው፥ ዳናቱ ዪዴ ኡንቱንታ፥ «ኑኒ ሂንቴንታ ናቄዶ» ጌዲኖ። ቃሾ ጎሊያፔ ካሬ ኡንቱንታ ኬሲዴ፥ ካታማፔ ኬሲዴ ባና ማላ ዎሴዲኖ። 40ጳዉሎሲኔ ሲላሴ ቃሾ ጎሊያፔ ኬሲዴ፥ ሊዲያ ሶይ ቤዲኖ፤ ያኒ ኢሻቱዋና ጋኬቲዴ፥ ኡንቱንታ ሚኒሲዴ ሄዋፔ ቤዲኖ።

Currently Selected:

ዬሱሲ ኪቴዳዋንቱ ኦሱዋ 16: dwrENT

Highlight

Copy

Compare