ዬሱሲ ኪቴዳዋንቱ ኦሱዋ 14

ጳዉሎሲኔ ባርናባሲ ኢቆኒዮኔ ቤዲኖ

1ካሴዋዳንካ ጳዉሎሲኔ ባርናባሲ ኢቆኒዮኔን ኣዪሁዳቱዋ ዎሳ ጎሌ ጌሊዴ፥ ቃላ ኦዴዲኖ፤ ሄዋፔ ጉዪያን ጮራ ኣዪሁዳቱኔ ኣዪሁዳ ጊዴናዋንቱ ኣማኔዲኖ። 2ሺን ኣማኒቤና ኣዪሁዳቱ ኣዪሁዳ ጊዴናዋንቱ ዎዛና ላሚዴ፥ ኢሻቱዋ ቦላ ሃንቄዲኖ። 3ዬሱሲ ኪቴዳዋንቱ ሄዋን ዳሮ ዎዲያ ጋሚዔዲኖ፤ ኡንቱንቱ ጎዳባ ያዬናን ኦዴዲኖ፤ ጎዳይ ማላታኔ ኦራባ ኡንቱንቱ ኦና ማላ፥ ኡንቱንቶ ዎልቃ ኢሜዳዋን ባሬ ኣ ኬካቴ ቃላባይ ቱማ ጊዴዳዋ ማርካቴዳ። 4ሺን ካታማ ኣሳይ ሻኬቲ፥ ባጋይ ኣዪሁዳቱዋኮ፥ ባጋይ ዬሱሲ ኪቴዳዋንቱኮ ሲሜዲኖ።

5ኣዪሁዳ ጊዴናዋንቱኔ ኣዪሁዳቱ ባሬንቱ ካፓቱዋና ኢቲፔ ዬሱሲ ኪቴዳዋንታ ቆሃናዉኔ ሹቻን ጫዳናው ቆፔዳ ዎዴ፥ 6ዬሱሲ ኪቴዳዋንቱ ሄዋ ኤሪዴ፥ ሊስፂራኔ ዴርቤ ጌቴቲያ ሊቃዖኒያ ካታማቱዋኔ ኡንቱንቱ ሄራን ዴዒያ ጋዲያ ቢ ኣጌዲኖ፤ 7ሄዋን ዎንጋላ ሚሺራቹዋ ኦዲኖ።

8ባሬ ዳዪ ኡሉዋፔ ዬሌቶዴፔ ዶሚዴ፥ ላዑ ጌዲ ሲሊና፥ ኡባካ ሃሜቴና ኢቲ ቢታኒ ሊስፂራን ዴዔ። 9ሄ ቢታኒ ጳዉሎሲ ኦዲሺን ሲሴ፤ ጳዉሎሲ ኣ ጫዲ ፄሊያ ዎዴ፥ ፓፃናው ኣው ኣማኑ ዴዒያዋ ቤዒዴ፥ 10ኮሻ ቂሲዴ ኣ፥ «ሲቲ ጋዴ ኔ ጌዲያን ኤቃ» ያጌዳ፤ ጉፒ ዴንዲዴ፥ ሃሜታ ዶሜዳ።

11ጳዉሎሲ ኦዳዋ ኣሳይ ቤዒዴ፥ ባሬ ኮሻ ሊቃዖኒያ ቃላን ቁ ኦዴ፥ «ፆሳቱ ኣሳ ማላቲዴ ኑኮ ዎዲኖ» ያጌዳ። 12ኣሳይ ባርናባሳ፥ «ዲያ» #14፡12 ዲያ፡ ጉሳይ ግሪካቱዋ ፆሳቱዋ ኡባቱዋፔ ቦላ ጌቴቲ ፓይዴቲያ ኡንቱንቱ ኤቃ። ጊዴ፥ ጳዉሎሲ ሃሳያሲ ዋናቲያ ዲራው፥ ኣ፥ «ሄርሜሳ» ጊዴ ሱንዳ። 13ጌሻ ጎሊ ካታማ ማታን ዴዒያ ዲያ ቄሳይኔ ኣሳይ ኮሩማቱዋኔ ዳሪ ሎዒያ ጪሻቱዋ ዬሱሲ ኪቴዳዋንቱሲ ያርሹዋ ያርሻናው ኮዪዴ፥ ፔንጊያ ኣሄዲኖ።

14ሺን ዬሱሲ ኪቴዳ ባርናባሲኔ ጳዉሎሲ ሄዋ ሲሴዳ ዎዴ ባሬንቱ ማዩዋ ፔዴ፥ ኣሳ ጊዶ ዎፂዴ፥ 15ባሬንቱ ኮሻ ቁ ኦዴ፥ ሃዋዳን ያጌዲኖ፤ «ኣሳው፥ ሃዋ ኣዪሲ ኦቴ? ኑኒካ ሂንቴንቱዋዳን ሜቴዳ ኣሳ፤ ሃ ፓና ዬዉዋፔ ሳሉዋኔ ሳዓ፥ ኣባኔ ኡንቱንቱ ጊዶን ዴዒያ ኡባባ ሜዳ ዴዑዋ ፆሳኮ ሂንቴ ሲማና ማላ፥ ሂንቴንቶ ኑኒ ዎንጋላ ሚሺራቹዋ ኦዴቶ። #ኬስ 20፡11፤ ማዝ 146፡6 16ኢ ቤኒ ኣሳ ዜሬይ ኡባይ ባሬንቱ ኦጊያ ባና ማላ ዬዲ ኣጌዳ። 17ሂንቴንቶ ኢራ ሳሉዋፔ ቡኪሴዳ፤ ካካ ኢ ዎዲያን ኢሜዳ፤ ቃሲ ቁማ ኢሚዴ፥ ሂንቴንታ ሎይ ናሼቼ፤ ያቲዴ ሂንቴንቶ ሎዖባ ኦዴ፥ ኡባ ዎዴካ ባሬው ማርካ ዪቤና» ያጌዲኖ። 18ዬሱሲ ኪቴዳዋንቱ ሄዋ ጊዴ፥ ባሬንቶ ኣሳይ ያርሼና ማላ፥ ሜቶቲዴ ዲጌዲኖ።

19ኣንፆኪያፔኔ ኢቆኒዮኔፔ ዬዳ ኣዪሁዳቱ ኣሳ ባሬንቱ ባጋ ዛሪዴ፥ ሹቻን ጳዉሎሳ ጫዴዲኖ፤ ኡንቱንቶ ሃይቄዳዋ ማላቲና፥ ካታማፔ ካሬው ኣ ጎቺ ኬሴዲኖ። 20ሺን ካሊያዋንቱ ኣ ማታን ዩዪ ኣዴ ኤቂሺን፥ ኢ ዴንዲዴ፥ ካታማ ጌሌዳ። ዎንቴ ጋላሲ ባሪናባሳና ኢቲፔ ዴርቤ ቤዳ።

ጳዉሎሲኔ ባርናባሲ ኣንፆኪያ ሲሜዲኖ

21-22ኡንቱንቱ ዴሪቤ ካታማን ዎንጋላ ሚሺራቹዋ ኦዲዴ፥ ጮራ ኣሳይ ዬሱሳ ኣማናና ማላ ኦዳዋፔ ጉዪያን፥ ሊስፂራ፥ ኢቆኒዮኔኔ ጲሲዲያን ዴዒያ ኣንፆኪያ ሲሜዲኖ፤ ያቲዴ ሄዋን ካሊያዋንታ ሚኒሲዴኔ ኡንቱንቱ ኣማኑዋን ሚኒ ዴዓና ማላ ዞሪዴ፥ «ኑኒ ፆሳ ካዉቴ ጌላናው ሎይ ዋዬታና ቤሴ» ያጌዲኖ። 23ቃሲ ኣማኒያዋንቶ ዴዒያሳን ዴዒያሳን ጪማቱዋ ዶሪዴ፥ ፆሜዳዋፔኔ ዎሴዳዋፔ ጉዪያን፥ ኡንቱንቱ ኣማኔዳ ጎዳሲ ኡንቱንታ ሃዳራ ኢሜዲኖ።

24ጲሲዲያ ጋዲያፔ ኣዴ፥ ጲኒፊሊያ ዬዲኖ፤ 25ጴርጌን ቃላ ኦዴዳዋፔ ጉዪያን፥ ኣፃሊያ ቤዲኖ። 26ሄዋፔ ኡንቱንቱ ባሬንቱ ፖሌዳ ኦሱዋ ዲራው፥ ኣሳይ ኡንቱንቱ ሃዳራ ፆሳ ኣ ኬካቴው ኢሜዳ ኣንፆኪያ ማርካቢያን ሲሜዲኖ።

27ኣንፆኪያ ጋኬዳ ዎዴ ኣማኒያ ኣሳ ሺሺዴ፥ ፆሳይ ባሬንቱና ኢቲፔ ኦዳ ኡባባኔ፥ ኣዪሁዳ ጊዴና ኣሳይ ኣማናና ማላ፥ ኡንቱንቶ ፔንጊያ ዶዬዳዋ፥ ኣሳው ኦዴዲኖ። 28ያቲዴ ሄዋን ካሊያዋንቱና ዳሮ ዎዲያ ጋሚዔዲኖ።

Currently Selected:

ዬሱሲ ኪቴዳዋንቱ ኦሱዋ 14: dwrENT

Highlight

Copy

Compare