أمْثال 18
18
1مُفَارِقْ الْجَمَاعَةْ يِتَابِعْ شَهْوَاتَهْ
وَ يُقُمّ ضِدّ كُلَّ فِكِرْ نَافِعْ.
2الْمَطْمُوسْ مَا يَفْرَحْ بِالرَّايْ الْعَدِيلْ.
هُو يِوَصِّفْ إِلَّا الْقَلْبَهْ يُقُولَهْ لَيَّهْ.
3الْعِصْيَانْ يِجِيبْ الْحُقْرَةْ
وَ الْمُعْيَارْ يِجِيبْ الْعَيْب.
4كَلَامْ الْإِنْسَانْ مِثِلْ أَلْمِي الْغَرِيقْ.
الْحِكْمَةْ مِثِلْ أَلْمِي الْجَارِي مِنْ الْعَيْن.
5مَا عَدِيلْ تَنْصُرْ الْعَاصِي
وَ لَا تَظْلُمْ الصَّالِحْ فِي الشَّرِيعَةْ.
6كَلَامْ الْمَطْمُوسْ يِجِيبْ الْهُرَاجْ
وَ لِسَانَهْ يِجِيبْ الدُّوَاسْ.
7كَلَامْ الْمَطْمُوسْ يَهَلْكَهْ
وَ لِسَانَهْ شَرَكْ لِنَفْسَهْ.
8كَلَامْ الْقَوَّالْ مِثِلْ الْحَلَاوَةْ،
تَاكُلَهْ وَ يَنْزِلْ فِي بَطْنَكْ.
9الْيَخْدِمْ بِكَسَلْ
وَ الْيَخْرِبْ الْعَمَلْ،
هُمَّنْ دَوْل أَخْوَانْ.
10أُسُمْ اللّٰهْ هُو مِثِلْ بَيْت طَوِيلْ وَ قَوِي.
الصَّالِحْ يَطْلَعْ فَوْقَهْ
وَ شَيّءْ مَا يَلْحَقَهْ.
11الْغَنِيْ يِتْوَكَّلْ فِي مَالَهْ
مِثِلْ حِلَّةْ قَوِيَّةْ
وَ مِثِلْ دُرْدُرْ
وَ يَحْسِبْ شَيّءْ مَا يَلْحَقَهْ.
12قَبُلْ الْخَرَابْ، الْإِسْتِكْبَارْ
وَ قَبُلْ الشَّرَفْ، التَّوَاضُعْ.
13الْيُرُدّ فِي الْكَلَامْ قُبَّالْ مَا يَسْمَعَهْ
يِوَصِّفْ نِفَاقَهْ وَ عَيْبَهْ.
14الْقَلِبْ الْمُرْتَاحْ يَحْمَلْ الْمَرَضْ
وَ لَاكِنْ الْقَلِبْ الْحَزْنَانْ، يَاتُو يِشَجِّعَهْ؟
15الْفَاهِمْ لِلْمَعْرَفَةْ يَلْقَاهَا
وَ الْحَكِيمْ كُلَ يِفَتِّشْهَا.
16هَدِيَّةْ الْإِنْسَانْ تِسَهِّلْ لَيَّهْ دَرْبَهْ
وَ مَعَ الْكُبَارَاتْ كُلَ، هِي تِقَابِلَهْ.
17الْيِحَجِّي أَوَّلْ،
النَّاسْ يَحْسُبُوا عِنْدَهْ حَقّ
وَ لَاكِنْ وَكِتْ قَبِيلَهْ يِحَجِّي،
يِكَدِّبَهْ.
18أَمْ عِيَيْدَاتْ تِوَقِّفْ الْهُرَاجْ
وَ تِحَاجِزْ أَمْبَيْنَاتْ الشُّدَادْ.
19زَعَلْ أَخُوكْ زَرِيبَةْ بَيْنَهْ وَ بَيْنَكْ
وَ الْهُرَاجْ يَقْفِلْ قَلْبَهْ مِنَّكْ.
20مِنْ كَلَامْ خَشْمَهْ،
الْإِنْسَانْ يَمْلَا بَطْنَهْ
وَ يَشْبَعْ مِنْ نَتِيجَةْ لِسَانَهْ.
21اللِّسَانْ يِجِيبْ الْمَوْت وَ الْحَيَاةْ.
الْيِحِبّ الْكَلَامْ يِلْحَمَّلْ نَتِيجْتَهْ.
22اللِّقِي زَوْجَةْ لِقِي الْخَيْر
وَ الْمَرَةْ نِعْمَةْ مِنْ اللّٰهْ.
23الْفَقْرِي يَشْحَدْ بِكَلَامْ لَيِّنْ
وَ لَاكِنْ الْغَنِيْ يُرُدّ بِكَلَامْ جَفِي.
24أَخَيْر عِنْدَكْ رَفِيقْ
يِحِبَّكْ زِيَادَةْ مِنْ أَخُوكْ
مِنْ عِنْدَكْ رُفْقَانْ كَتِيرِينْ
الْيُضُرُّوكْ.
Currently Selected:
أمْثال 18: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
