عَدد 30
30
قوانين النذِر
1وَ مُوسَى كَلَّمْ لِكُبَارَاتْ قَبَايِلْ بَنِي إِسْرَائِيلْ وَ قَالْ: «دَاهُو أَمُرْ اللّٰهْ الْقَالَهْ. 2كَنْ رَاجِلْ يِسَوِّي نَذِرْ لِلّٰهْ وَ يَحْلِفْ وَ يُقُولْ يِتِمّ حَلِيفْتَهْ، وَاجِبْ الرَّاجِلْ دَا مَا يَفْشُلْ مِنْ النَّذِرْ وَ يِطَبِّقْ سَوَا سَوَا الْكَلَامْ الْهُو قَالَهْ.
3«وَ كَنْ بِنْت صَبِيَّةْ قَاعِدَةْ فِي بَيْت أَبُوهَا وَ تِسَوِّي نَذِرْ لِلّٰهْ وَ تَحْلِفْ وَ تُقُولْ تِتِمّ حَلِيفِتْهَا، 4كَنْ أَبُوهَا سِمِعْ بِنَذِرْهَا وَ حَلِيفِتْهَا وَ مَا قَالْ شَيّءْ، خَلَاصْ نَذِرْهَا دَا هِي مَسْؤُولَة مِنَّهْ وَ حَلِيفِتْهَا كُلَ هِي مَسْؤُولَة مِنْهَا. 5وَ لَاكِنْ كَنْ فِي نَفْس الْيَوْم وَكِتْ أَبُوهَا سِمِعْ بَسْ دَحَرْهَا، خَلَاصْ هِي مَا مَسْؤُولَة مِنْ النَّذِرْ وَ لَا مِنْ الْحَلِيفَةْ وَ اللّٰهْ يَغْفِرْ لَيْهَا أَشَانْ أَبُوهَا دَحَرْهَا.
6«وَ كَنْ الْبِنْت دِي سَوَّتْ نَذِرْهَا وَ الْكَلَامْ الْهِي حَلَفَتْ بَيَّهْ وَ بَعَدْ دَا أَخَدَتْ، 7كَنْ رَاجِلْهَا سِمِعْ وَ مَا قَالْ شَيّءْ، خَلَاصْ نَذِرْهَا دَا هِي مَسْؤُولَة مِنَّهْ وَ حَلِيفِتْهَا كُلَ هِي مَسْؤُولَة مِنْهَا. 8وَ لَاكِنْ كَنْ فِي نَفْس الْيَوْم وَكِتْ رَاجِلْهَا سِمِعْ بَسْ دَحَرْهَا، خَلَاصْ هُو يِبَطِّلْ النَّذِرْ وَ الْحَلِيفَةْ السَّوَّتْهُمْ وَ بَيْدَا، اللّٰهْ يَغْفِرْ لَيْهَا.
9«وَ كَنْ لِلْمَرَةْ الْأَرْمَلَةْ أَوْ الْمُطَلَّقَةْ، كَنْ سَوَّتْ نَذِرْ أَوْ حَلِيفَةْ، هِي مَسْؤُولَة مِنَّهْ.
10«وَ لَاكِنْ كَنْ الْمَرَةْ فِي بَيْت رَاجِلْهَا بَسْ هِي سَوَّتْ نَذِرْ وَ حَلَفَتْ وَ قَالَتْ تِسَوِّي شَيّءْ 11كَنْ رَاجِلْهَا سِمِعْ وَ مَا قَالْ شَيّءْ وَ مَا دَحَرْهَا، خَلَاصْ نَذِرْهَا دَا هِي مَسْؤُولَة مِنَّهْ وَ حَلِيفِتْهَا كُلَ هِي مَسْؤُولَة مِنْهَا. 12وَ لَاكِنْ كَنْ رَاجِلْهَا يِبَطِّلْ كَلَامْهَا فِي نَفْس الْيَوْم وَكِتْ هُو سِمِعْ، خَلَاصْ هِي مَا عِنْدَهَا نَذِرْ وَ لَا عِنْدَهَا حَلِيفَةْ أَشَانْ رَاجِلْهَا بَطَّلَاهُمْ وَ اللّٰهْ يَغْفِرْ لَيْهَا.
13«وَ أَيِّ نَذِرْ أَوْ حَلِيفَةْ هَنَا صِيَامْ، رَاجِلْهَا بَسْ يِبَطِّلَهْ أَوْ يِأَكِّدَهْ. 14وَ كَنْ رَاجِلْهَا مَا قَالْ شَيّءْ لَحَدِّي أَمْبَاكِرْ، خَلَاصْ هُو سَوَّاهَا مَسْؤُولَة مِنْ النَّذِرْ أَوْ الْحَلِيفَةْ أَشَانْ هُو مَا قَالْ شَيّءْ فِي الْيَوْم الْأَوَّلْ وَكِتْ هُو سِمِعْ. 15وَ لَاكِنْ كَنْ هُو بَطَّلْ النَّذِرْ أَوْ الْحَلِيفَةْ دِي بَعَدْ يَوْم مِنْ هُو سِمِعْ، خَلَاصْ هُو يِشِيلْ مَسْؤُولِيَّةْ الْخَطَا هَنَا مَرْتَهْ.»
16وَ دَوْل الْقَوَانِينْ الْاللّٰهْ أَمَرْ بَيْهُمْ مُوسَى وَ بُخُصُّوا الرَّاجِلْ وَ مَرْتَهْ أَوْ الْأَبُو وَ بِنْتَهْ الصَّبِيَّةْ وَكِتْ هِي لِسَّاعْ قَاعِدَةْ مَعَايَهْ فِي بَيْتَهْ.
Currently Selected:
عَدد 30: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
