عَدد 15
15
قوانين قدِّمين الهدايا
1وَ اللّٰهْ حَجَّى لِمُوسَى وَ قَالْ: 2«قُولْ لِبَنِي إِسْرَائِيلْ: ‹كَنْ دَخَلْتُوا فِي الْبَلَدْ النَّنْطِيهَا لَيْكُو وَ سَكَنْتُوا فَوْقهَا، 3وَاجِبْ تِقَدُّمُوا لِلّٰهْ مِنْ بَقَرْكُو أَوْ غَنَمْكُو هَدِيَّةْ مُحَرَّقَةْ أَوْ ضَحِيَّةْ مُحَرَّقَةْ أَوْ ضَحِيَّةْ آخَرَةْ. وَ دَا أَشَانْ تِحَقُّقُوا وَعَدْكُو أَوْ تِقَدُّمُوا هَدِيَّةْ بِنِيِّتْكُو أَوْ وَكِتْ تِلِمُّوا لِلْعِيدْ وَ هُو يَرْضَى بِرِيحِتْهَا.
4«‹وَ الْيِقَدِّمْ الْهَدِيَّةْ دِي لِلّٰهْ، يِقَدِّمْ مَعَاهَا هَدِيَّةْ هَنَا دَقِيقْ كَوْرَوْ مُخَلْبَطْ بِلِيتِرْ هَنَا دِهِنْ. 5وَ بَتَّانْ يِقَدِّمْ لِيتِرْ هَنَا خَمَرْ هَدِيَّةْ شَرَابْ مَعَ أَيِّ خَرُوفْ ضَحِيَّةْ مُحَرَّقَةْ أَوْ ضَحِيَّةْ آخَرَةْ.
6«‹وَ كَنْ لِلْكَبِشْ كَمَانْ، يِشِيلْ مَعَايَهْ هَدِيَّةْ هَنَا دَقِيقْ كَوْرتَيْن مُخَلْبَطْ بِلِيتِرْ وَ نُصّ هَنَا دِهِنْ. 7وَ يِشِيلْ لِيتِرْ وَ نُصّ هَنَا خَمَرْ هَدِيَّةْ شَرَابْ وَ يِقَدِّمْهَا لِلّٰهْ وَ هُو يَرْضَى بِرِيحِتْهَا.
8«‹وَ كَنْ يِقَدِّمْ لِلّٰهْ تَوْر ضَحِيَّةْ مُحَرَّقَةْ أَوْ ضَحِيَّةْ آخَرَةْ لِيِحَقِّقْ وَعَدَهْ أَوْ لِضَحِيَّةْ السَّلَامَةْ، 9يِقَدِّمْ مَعَايَهْ هَدِيَّةْ تَلَاتَةْ كَوْرَوْ هَنَا دَقِيقْ مُخَلْبَطْ بِلِيتْرَيْن هَنَا دِهِنْ. 10وَ يِشِيلْ لِيتْرَيْن هَنَا خَمَرْ هَدِيَّةْ شَرَابْ وَ يِقَدِّمْهَا هَدِيَّةْ مُحَرَّقَةْ لِلّٰهْ وَ هُو يَرْضَى بِرِيحِتْهَا.
11«‹وَ يِسَوِّي مِثِلْ دَا مَعَ أَيِّ هَدِيَّةْ هَنَا تَوْر وَ كَبِشْ وَ خَرُوفْ وَ عَنْزَايْ. 12وَ كَنْ الْبَهَايِمْ الْيِقَدِّمْهُمْ دَوْل كَتِيرِينْ كُلَ، يِسَوِّي مَعَ أَيِّ وَاحِدْ مِثِلْ دَا. 13وَ كَنْ أَيِّ مُوَاطِنْ يِقَدِّمْ الْهَدَايَا الْمُحَرَّقِينْ لِلّٰهْ، خَلِّي يِسَوِّي مِثِلْ دَا وَ اللّٰهْ يَرْضَى بِرِيحِتْهُمْ.
14«‹وَ كَنْ نَادُمْ أَجْنَبِي قَاعِدْ مَعَاكُو مُدَّةْ طَوِيلَةْ وَ يِدَوْر يِقَدِّمْ هَدِيَّةْ مُحَرَّقَةْ لِلّٰهْ وَ هُو يَرْضَى بِرِيحِتْهَا، خَلِّي يِسَوِّي مِثِلْ إِنْتُو قَاعِدِينْ تِسَوُّوهْ. 15وَ دَا يَبْقَى لَيْكُو شَرْط دَايِمْ مِنْ ذُرِّيَّةْ لِذُرِّيَّةْ لِإِنْتُو كُلُّكُو وَ لِلْأَجْنَبِي الْقَاعِدْ مَعَاكُو كُلَ. وَ تِسَوُّوا مِثِلْ دَا سَوَا سَوَا قِدَّامْ اللّٰهْ. 16وَ دَا يَبْقَى قَانُونْ وَاحِدْ وَ شَرْط وَاحِدْ لَيْكُو إِنْتُو وَ لِلْأَجْنَبِي الْقَاعِدْ مَعَاكُو.›»
ضحيّة لكفّارة الذنِب
17وَ اللّٰهْ حَجَّى لِمُوسَى وَ قَالْ: 18«حَجِّي لِبَنِي إِسْرَائِيلْ وَ قُولْ لَيْهُمْ: ‹كَنْ دَخَلْتُوا فِي الْبَلَدْ النِّوَدِّيكُو فَوْقهَا 19وَ كَنْ تَاكُلُوا مِنْ خُبْزِتْهَا، قَدُّمُوا مِنْهَا هَدِيَّةْ لِلّٰهْ. 20وَ مِنْ أَوَّلْ دَقِيقْكُو، سَوُّوا خُبْزَةْ وَ قَدُّمُوهَا لَيِّ هَدِيَّةْ مِثِلْ الْهَدِيَّةْ الْإِنْتُو تِقَدُّمُوهَا لَيِّ وَكْت الْقَطِعْ هَنَا زِرَاعِتْكُو. 21وَ مِنْ ذُرِّيَّةْ لِذُرِّيَّةْ، قَدُّمُوا لَيِّ هَدِيَّةْ مِنْ أَوَّلْ دَقِيقْكُو.
22«‹وَ كَنْ إِنْتُو كُلُّكُو بَلَا رَايْكُو بَسْ مَا طَبَّقْتُوا وَاحِدْ مِنْ وَصَايَا اللّٰهْ الْقَالَاهُمْ لِمُوسَى، 23يَعْنِي كُلَّ الْوَصَايَا الْأَمَرَاكُو بَيْهُمْ اللّٰهْ بِوَاسِطَةْ مُوسَى مِنْ أَوَّلْ يَوْم وَ بَعَدْ دَا مِنْ ذُرِّيَّةْ لِذُرِّيَّةْ، 24وَ كَنْ مُجْتَمَعْ بَنِي إِسْرَائِيلْ سَوَّوْا ذَنِبْ بَلَا رَايْهُمْ وَ كُلُّهُمْ مَا عِرْفَوْه، خَلَاصْ كُلُّهُمْ يِقَدُّمُوا تَوْر ضَحِيَّةْ مُحَرَّقَةْ لِلّٰهْ وَ هُو يَرْضَى بِرِيحِتْهَا. وَ يِقَدُّمُوا هَدِيَّةْ هَنَا دَقِيقْ وَ هَدِيَّةْ شَرَابْ مِثِلْ فِي الْقَانُونْ وَ تَيْس ضَحِيَّةْ لِكَفَّارَةْ الذَّنِبْ. 25وَ رَاجِلْ الدِّينْ يِسَوِّي كَفَّارَةْ لِذُنُوبْ كُلَّ مُجْتَمَعْ بَنِي إِسْرَائِيلْ وَ هُمَّنْ يَلْقَوْا الْغُفْرَانْ. أَشَانْ الذَّنِبْ دَا سَوَّوْه بَلَا رَايْهُمْ وَ هُمَّنْ جَابَوْا ضَحِيَّةْ مُحَرَّقَةْ لِلّٰهْ وَ قَدَّمَوْا ضَحِيَّةْ لِكَفَّارَةْ الذَّنِبْ. 26وَ الْغُفْرَانْ دَا لِكُلَّ مُجْتَمَعْ بَنِي إِسْرَائِيلْ وَ لِلْأَجْنَبِي السَّاكِنْ مَعَاهُمْ أَشَانْ الذَّنِبْ السَّوَّوْه بَلَا رَايْهُمْ دَا بُخُصّ كُلَّ الشَّعَبْ.
27«‹وَ كَنْ الذَّنِبْ دَا سَوَّاهْ نَادُمْ وَاحِدْ بَسْ، هُو يِقَدِّمْ عَنْزَايْ بِنْت سَنَةْ ضَحِيَّةْ لِكَفَّارَةْ الذَّنِبْ. 28وَ رَاجِلْ الدِّينْ يِسَوِّي كَفَّارَةْ لِلذَّنِبْ هَنَا النَّادُمْ السَّوَّاهْ بَلَا رَايْه قِدَّامْ اللّٰهْ. وَ وَكِتْ رَاجِلْ الدِّينْ يِسَوِّي كَفَّارَةْ، النَّادُمْ دَا يَلْقَى الْغُفْرَانْ. 29كَنْ النَّادُمْ مِنْ بَنِي إِسْرَائِيلْ أَوْ كَنْ نَادُمْ أَجْنَبِي سَاكِنْ مَعَاهُمْ كُلَ، الْقَانُونْ هَنَا الذَّنِبْ الْيِسَوُّوهْ بَلَا رَايْهُمْ دَا وَاحِدْ بَسْ.
30«‹وَ كَنْ نَادُمْ مِنْ بَنِي إِسْرَائِيلْ أَوْ أَجْنَبِي قَاعِدْ مَعَاهُمْ كُلَ كَنْ سَوَّى ذَنِبْ بِنِيّتَهْ، النَّادُمْ دَا سَوَّى جَرِيمَةْ ضِدّ اللّٰهْ. وَ بِسَبَبْ دَا، وَاجِبْ يَفْصُلُوهْ مِنْ أَهَلَهْ. 31أَشَانْ هُو أَبَى كَلَامْ اللّٰهْ وَ خَالَفْ وَصِيَّاتَهْ. وَ بَيْدَا، وَاجِبْ يَفْصُلُوهْ وَ يِلْحَمَّلْ عِقَابَهْ.›»
الرجِم لحدي المَوْت
32وَ يَوْم وَاحِدْ فِي الصَّحَرَاء، بَنِي إِسْرَائِيلْ لِقَوْا نَادُمْ وَاحِدْ قَاعِدْ يِلَقِّطْ حَطَبْ فِي يَوْم السَّبْت. 33وَ هُمَّنْ كَرَبَوْه لِلنَّادُمْ دَا وَ وَدَّوْه قِدَّامْ مُوسَى وَ هَارُونْ وَ كُلَّ مُجْتَمَعْ بَنِي إِسْرَائِيلْ. 34النَّادُمْ دَا خَطَّوْه فِي السِّجِنْ أَشَانْ فِي الْوَكِتْ دَاكْ، قَانُونْ الْيِحَاكُمُوهْ بَيَّهْ كَيْ مَا فِيهْ. 35وَ خَلَاصْ بَعَدْ دَا، اللّٰهْ قَالْ لِمُوسَى: «خَلِّي كُلَّ مُجْتَمَعْ بَنِي إِسْرَائِيلْ يِلِمُّوا بَرَّا مِنْ الْفَرِيقْ وَ يَرْجُمُوا النَّادُمْ دَا لَحَدِّي الْمَوْت.» 36وَ خَلَاصْ، كُلَّ الْمُجْتَمَعْ وَدَّوْه لِلنَّادُمْ دَا بَرَّا مِنْ الْفَرِيقْ وَ رَجَمَوْه لَحَدِّي مَاتْ. وَ دَا مِثِلْ اللّٰهْ أَمَرْ بَيَّهْ مُوسَى.
الشنْشلي البيه يذّكّروا
37وَ بَتَّانْ اللّٰهْ قَالْ لِمُوسَى: 38«حَجِّي لِبَنِي إِسْرَائِيلْ وَ قُولْ لَيْهُمْ: ‹مِنْ ذُرِّيَّةْ لِذُرِّيَّةْ تِسَوُّوا شَنْشَلِي فِي دَايِرْ خُلْقَانْكُو وَ خَيُّطُوهْ بِخَيْط ظَهْرِي. 39وَ وَكِتْ تِشِيفُوا الشَّنْشَلِي دَا، تِذَّكَّرَوْا كُلَّ وَصَايَا اللّٰهْ وَ تِطَبُّقُوهُمْ. وَ بَيْدَا، مَا تِتَابُعُوا شَهْوَاتْ قُلُوبْكُو وَ عُيُونْكُو الْيِوَدُّوكُو فِي الْعِصْيَانْ. 40وَ مِثِلْ دَا، تِذَّكَّرَوْا كُلَّ وَصِيَّاتَهْ وَ تِطَبُّقُوهُمْ وَ تُكُونُوا أُمَّةْ اللّٰهْ الصَّالْحَةْ. 41وَ تَعَرْفُوا أَنَا بَسْ اللّٰهْ إِلٰـهْكُو الْمَرَقْتُكُو مِنْ بَلَدْ مَصِرْ لِنَبْقَى إِلٰـهْكُو. وَ أَنَا بَسْ اللّٰهْ إِلٰـهْكُو.›»
Currently Selected:
عَدد 15: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
