لاوِيِّين 6
6
1 # 6:1 الفصُل 6 آية 1 بالعربي هو الفصُل 5 آية 20 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ اللّٰهْ حَجَّى لِمُوسَى وَ قَالْ: 2أَكُونْ نَادُمْ سَوَّى ذَنِبْ وَ عِصِي اللّٰهْ بِسَبَبْ هُو غَشَّ أَخُوهْ فِي شَانْ أَمَانَةْ أَوْ دَيْن أَوْ سِرْقَةْ أَوْ قَلَعْ بِقُوءْ 3وَلَّا هُو كَدَبْ بِسَبَبْ شَيّءْ وَدَّرْ وَ هُو لِقِيهْ وَلَّا هُو حَلَفْ بِكِدِبْ فِي عَمَلْ وَاحِدْ مِثِلْ الذُّنُوبْ دَوْل. 4النَّادُمْ السَّوَّى الذَّنِبْ دَا، هُو خَاطِي وَ وَاجِبْ يِقَبِّلْ الشَّيّءْ الْهُو سِرْقَهْ أَوْ قَلَعَهْ بِقُوءْ مِنْ أَخُوهْ أَوْ الْأَمَانَةْ وَلَّا الشَّيّءْ الْوَدَّرْ وَ هُو لِقِيهْ 5أَوْ أَيِّ شَيّءْ الْهُو حَلَفْ بِكِدِبْ فِي شَانَهْ. وَاجِبْ هُو يِقَبِّلْ الشَّيّءْ دَا كَامِلْ لِسِيدَهْ وَ يِزِيدْ فَوْقَهْ خُمُسْ تَمَنَهْ. وَ دَا فِي نَفْس الْيَوْم الْهُو يِقَدِّمْ فَوْقَهْ ضَحِيَّةْ لِكَفَّارَةْ الْخَطَا. 6وَ هُو يِجِيبْ لِلّٰهْ ضَحِيَّةْ كَفَّارَةْ الْخَطَا وَ الضَّحِيَّةْ دِي تُكُونْ كَبِشْ الْمَا عِنْدَهْ أَيِّ عَيْب الْيِشِيلَهْ مِنْ الْغَنَمْ التَّمَنَهْ يِسَاوِي حَسَبْ التَّمَنْ الْوَاجِبْ لِضَحِيَّةْ كَفَّارَةْ الْخَطَا. 7وَ رَاجِلْ الدِّينْ يِسَوِّي لَيَّهْ كَفَّارَةْ قِدَّامْ اللّٰهْ وَ هُو يَلْقَى الْغُفْرَانْ، كَنْ ذَنْبَهْ دَا مِثِلْ شُنُو كُلَ.
هديّة الدقيق
8وَ اللّٰهْ حَجَّى لِمُوسَى وَ قَالْ: 9أَنْطِي الْأَمُرْ دَا لِهَارُونْ وَ ذُرِّيّتَهْ وَ قُولْ لَيْهُمْ: «دَاهُو الْقَانُونْ هَنَا الضَّحِيَّةْ الْمُحَرَّقَةْ. الضَّحِيَّةْ الْمُحَرَّقَةْ تَقْعُدْ فِي نَارْ الْمَدْبَحْ طُولْ اللَّيْل لَحَدِّي فَجُرْ وَ نَارْ الْمَدْبَحْ تَحْرِقْهَا. 10وَ رَاجِلْ الدِّينْ يَلْبَسْ خَلَقَهْ هَنَا الْكَتَّانْ وَ يَلْبَسْ سُرْوَالَهْ الْقِصَيِّرْ هَنَا كَتَّانْ. وَ يَمْرُقْ الرُّمَادْ الْمُدَهَّنْ هَنَا الضَّحِيَّةْ الْمُحَرَّقَةْ مِنْ الْمَدْبَحْ وَ يُخُطَّهْ جَنْب الْمَدْبَحْ. 11وَ هُو يِسِلّ خُلْقَانَهْ وَ يَلْبَسْ خُلْقَانْ آخَرِينْ أَشَانْ يِوَدِّي الرُّمَادْ الْمُدَهَّنْ بَرَّا مِنْ الْفَرِيقْ فِي بَكَانْ طَاهِرْ. 12وَ النَّارْ مُقَبِّضَةْ فِي الْمَدْبَحْ أَبَداً مَا تُمُوتْ. وَ كُلِّ صَبَاحْ رَاجِلْ الدِّينْ يِزِيدْ حَطَبْ الْمَدْبَحْ وَ يُخُطّ فَوْقَهْ الضَّحِيَّةْ الْمُحَرَّقَةْ وَ يِحَرِّقْ الشَّحَمْ هَنَا ضَحِيَّةْ السَّلَامَةْ. 13وَ النَّارْ مُقَبِّضَةْ دَايْماً فِي الْمَدْبَحْ أَبَداً مَا تُمُوتْ.
14«وَ دَاهُو الْقَانُونْ هَنَا هَدِيَّةْ الدَّقِيقْ. ذُرِّيَّةْ هَارُونْ يِقَدُّمُوهَا قِدَّامْ اللّٰهْ مُقَابِلِينْ الْمَدْبَحْ. 15وَ رَاجِلْ الدِّينْ يِشِيلْ مَلْيَةْ إِيدْ مِنْ الدَّقِيقْ وَ الدِّهِنْ وَ كُلَّ اللُّبَانْ الْقَاعِدْ فِي الْهَدِيَّةْ وَ يِحَرِّقْهُمْ فِي النَّارْ وَ دِي هَدِيَّةْ ذِكْرَةْ هَنَا دَقِيقْ الرِّيحِتْهَا اللّٰهْ يَرْضَى بَيْهَا. 16وَ هَارُونْ وَ ذُرِّيّتَهْ يَاكُلُوا الْفَضَّلْ مِنْ الْهَدِيَّةْ. وَ هُمَّنْ يَاكُلُوهْ بَلَا تَوَّارَةْ فِي بَكَانْ مُقَدَّسْ. وَ يَاكُلُوهْ فِي الْفَضَايْ هَنَا خَيْمَةْ الْإِجْتِمَاعْ. 17وَ مَا يِرَكُّبُوهْ بِتَوَّارَةْ. وَ دَا، حَقُّهُمْ الْأَنَا أَنْطَيْتَهْ لَيْهُمْ مِنْ الْهَدَايَا الْمُحَرَّقِينْ الْيِقَدُّمُوهُمْ لَيِّ. وَ الْهَدِيَّةْ دِي مُقَدَّسَةْ مَرَّةْ وَاحِدْ مِثِلْ الْفَضْلَةْ هَنَا ضَحِيَّةْ لِكَفَّارَةْ الذَّنِبْ أَوْ ضَحِيَّةْ لِكَفَّارَةْ الْخَطَا. 18وَ كُلِّ دَكَرْ مِنْ ذُرِّيَّةْ هَارُونْ يَاكُلْ مِنْهَا. وَ دَا، شَرْط دَايِمْ مِنْ ذُرِّيَّةْ لِذُرِّيَّةْ الْبُخُصّ الْهَدَايَا الْمُحَرَّقِينْ لِلّٰهْ. وَ كُلَّ شَيّءْ الْيِلَمِّسْ الْهَدَايَا دَوْل يَبْقَى مُقَدَّسْ.»
هديّة المسحان
19وَ اللّٰهْ حَجَّى لِمُوسَى وَ قَالْ: 20وَ دَاهُو الْهَدِيَّةْ الْيِقَدُّمُوهَا هَارُونْ وَ ذُرِّيّتَهْ، فِي يَوْم يَمْسَحَوْا وَ يِدَرُّجُوا وَاحِدْ مِنْهُمْ. هُو يِقَدِّمْ لِلّٰهْ هَدِيَّةْ كُلَّ يَوْم كَوْرَوْ هَنَا دَقِيقْ، نُصَّهَا بِفَجُرْ وَ نُصَّهَا بِعَشِيَّةْ. 21وَ يِخَلْبُطُوهَا بِدِهِنْ وَ يِنَجُّضُوهَا فِي سَاجَةْ وَ يِقَدُّمُوهَا هَدِيَّةْ مُنَجَّضَةْ وَ مُقَطَّعَةْ الرِّيحِتْهَا اللّٰهْ يَرْضَى بَيْهَا. 22وَ رَاجِلْ دِينْ مِنْ ذُرِّيَّةْ هَارُونْ الْيَمْسَحَوْه وَ يِدَرُّجُوهْ مِنْ بَعَدَهْ، هُو يِقَدِّمْ الْهَدِيَّةْ دِي. وَ دَا حَقّ دَايِمْ لِلّٰهْ وَ يِحَرُّقُوهْ كُلَّ. 23وَ كُلِّ هَدِيَّةْ هَنَا دَقِيقْ الْيِقَدِّمْهَا رَاجِلْ دِينْ، يِحَرُّقُوهَا كُلَّهَا، مَا يَاكُلُوا مِنْهَا شَيّءْ.
ضحيّة لكفّارة الذنِب
24وَ اللّٰهْ حَجَّى لِمُوسَى وَ قَالْ: 25حَجِّي لِهَارُونْ وَ ذُرِّيّتَهْ وَ قُولْ لَيْهُمْ: «دَاهُو الْقَانُونْ هَنَا ضَحِيَّةْ كَفَّارَةْ الذَّنِبْ. وَ فِي الْبَكَانْ الْيَدْبَحَوْا فَوْقَهْ الضَّحِيَّةْ الْمُحَرَّقَةْ بَسْ، يَدْبَحَوْا فَوْقَهْ الضَّحِيَّةْ لِكَفَّارَةْ الذَّنِبْ قِدَّامْ اللّٰهْ. وَ دَا شَيّءْ مُقَدَّسْ مَرَّةْ وَاحِدْ. 26وَ رَاجِلْ الدِّينْ الْيِقَدِّمْ الضَّحِيَّةْ يَاكُلْهَا. وَ هُو يَاكُلْهَا فِي بَكَانْ مُقَدَّسْ وَ دَا فِي الْفَضَايْ هَنَا خَيْمَةْ الْإِجْتِمَاعْ. 27وَ أَيِّ شَيّءْ الْيِلَمِّسْ لَحَمْهَا يَبْقَى مُقَدَّسْ. وَ كَنْ الدَّمّ رَشَّ فِي خَلَقْ، وَاجِبْ يِغَسُّلُوا الْبَكَانْ الرَّشَّ فَوْقَهْ الدَّمّ فِي بَكَانْ مُقَدَّسْ. 28وَ الْبُرْمَةْ هَنَا الطِّينَةْ الرَّكَّبَوْا فَوْقهَا اللَّحَمْ، وَاجِبْ يِكَسُّرُوهَا. وَ لَاكِنْ كَنْ رَكَّبَوْه فِي بُرْمَةْ هَنَا نَحَاسْ، وَاجِبْ يُحُكُّوهَا وَ يِغَسُّلُوهَا بِأَلْمِي. 29وَ أَيِّ رَاجِلْ مِنْ رُجَالْ الدِّينْ يَاكُلْ اللَّحَمْ دَا وَ اللَّحَمْ دَا مُقَدَّسْ مَرَّةْ وَاحِدْ. 30وَ لَاكِنْ أَيِّ ضَحِيَّةْ الْيِقَدُّمُوهَا لِلذَّنِبْ وَ يِوَدُّوا دَمَّهَا فِي خَيْمَةْ الْإِجْتِمَاعْ لِكَفَّارَةْ الذَّنِبْ، يِحَرُّقُوهَا، مَا يَاكُلُوا مِنْهَا شَيّءْ.»
Currently Selected:
لاوِيِّين 6: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
