جامِعة 5
5
ما تِحجّي كتير قِدّام الربّ
1 # 5:1 الفصُل 5 آية 1 بالعربي هو الفصُل 4 آية 17 بالفرنساوي. لاكن ما زاد و لا نقص شيّء إلّا النِمر بس ألبدّلوا. أَحْفَضْ نَفْسَكْ،
وَكِتْ تَمْشِي فِي بَيْت اللّٰهْ.
قَرِّبْ لِتَسْمَعْ،
دَا أَخَيْر مِنْ تِقَدِّمْ ضَحِيَّةْ الْمَطَامِيسْ.
أَشَانْ هُمَّنْ مَا يَعَرْفُوا
كَدَرْ قَاعِدِينْ يِسَوُّوا الْفَسَالَةْ.
2مَا تِسَّعْجَلْ فِي كَلَامَكْ
وَ خَلِّي كَلَامْ قَلْبَكْ مَا يَمْرُقْ عَجَلَةْ
قِدَّامْ الرَّبّ.
أَشَانْ الرَّبّ قَاعِدْ فِي السَّمَاءْ
وَ إِنْتَ قَاعِدْ فِي الْأَرْض.
وَ فِي شَانْ دَا، خَلِّي كَلَامَكْ
مَا يَبْقَى كَتِيرْ.
3أَشَانْ كَتَرَةْ الشَّغَلَةْ
تِجِيبْ الْحِلِمْ
وَ كَتَرَةْ الْكَلَامْ
تِجِيبْ الطَّمَاسَةْ.
4وَكِتْ تِسَوِّي نَذِرْ لِلرَّبّ،
مَا تِأَخِّرْ لِتِتِمَّهْ.
أَشَانْ الرَّبّ مَا يَرْضَى
بِالْمَطَامِيسْ.
خَلَاصْ، حَقِّقْ كُلَّ نَذْرَكْ
السَّوَّيْتَهْ.
5أَخَيْر لَيْك مَا تِسَوِّي نَذِرْ
مِنْ تِسَوِّيهْ وَ مَا تِحَقِّقَهْ.
6مَا تِخَلِّي كَلَامَكْ يِسَوِّيكْ مُذْنِبْ
وَ تُقُولْ لِرَاجِلْ الدِّينْ:
«مَا نَقْدَرْ نِتِمّ نَذْرِي.
أَنَا سَوَّيْت خَطَا!»
بِمِثِلْ دَا، الرَّبّ يَغْضَبْ مِنْ كَلَامَكْ
وَ يِدَمِّرْ خِدْمَةْ إِيدَيْنَكْ.
7أَشَانْ كَتَرَةْ الْحِلِمْ
زَايِلْ سَاكِتْ
وَ مِثِلْ دَا، فِي كَتَرَةْ الْكَلَامْ كُلَ،
أَخَافْ مِنْ الرَّبّ.
الرشْوة و الظُلُم
8وَ كَنْ إِنْتَ شِفْت فِي بَلَدْ وَاحِدَةْ
يَظُلْمُوا الْمِسْكِينْ
وَ يَدْحَرَوْه مِنْ الْحَقّ وَ الْعَدَالَةْ،
مَا تِلْعَجَّبْ مِنْ الشَّيّءْ دَا.
أَشَانْ الْمَسْؤُولْ يَحْمِي الْمَسْؤُولْ
وَ فِي مَسَائِيلْ آخَرِينْ كُبَارْ مِنْهُمْ.
9إِنْتَاجْ الْأَرْض يَنْفَعْ لِكُلَّ النَّاسْ
وَ الْمَلِكْ وَاجِبْ يَحْمِي الزِّرَاعَةْ.
10الْيِحِبّ الْقُرُسْ مَا يَشْبَعْ مِنَّهْ
وَ الْيِحِبّ الْغُنَى مَا يَكْسَبْ.
وَ دَا كُلَ زَايِلْ سَاكِتْ.
11وَ كَنْ الْخَيْر بِقِي كَتِيرْ،
الْيَاكُلُوهْ كُلَ يَبْقَوْا كَتِيرِينْ.
وَ مِثِلْ دَا، شُنُو الْفَايْدَةْ الْيَلْقَاهَا سِيدَهْ؟
إِلَّا بِشِيفَهْ بِعَيْنَهْ بَسْ!
12نَوْم الْخَدَّامْ حَلُو لَيَّهْ،
كَنْ يَاكُلْ كَتِيرْ وَ لَا شِيَّةْ كُلَ.
وَ لَاكِنْ هَمّ الْغُنَى
يَدْحَرْ النَّوْم.
13فِي الْأَرْض، أَنَا شِفْت فَسَالَةْ
تَجْرَحْ الْقَلِبْ.
الْغُنَى السِّيدَهْ يُضُمَّهْ
يِسَبِّبْ لَيَّهْ الْهَلَاكْ.
14وَ الْغُنَى دَا يِوَدِّرْ
فِي شَغَلَةْ الْمَا عِنْدَهَا فَايْدَةْ.
وَ وِلَيْد الْغَنِيْ
مَا يَلْقَى شَيّءْ يَوْرِثَهْ.
15وَ مِثِلْ مَرَقْ مِنْ بَطُنْ أَمَّهْ عَرْيَانْ،
يَمْشِي فِي الْقَبُرْ عَرْيَانْ.
وَ مِنْ كُلَّ خِدِمْتَهْ
مَا يَلْقَى شَيّءْ يِوَدِّيهْ مَعَايَهْ.
16وَ دِي كُلَ فَسَالَةْ التَّجْرَحْ الْقَلِبْ.
هُو يَمْشِي سَوَا سَوَا مِثِلْ جَاءْ.
وَ شُنُو الْفَايْدَةْ اللِّقِيهَا
مِنْ الْخِدْمَةْ السَّوَّاهَا فِي الرِّيحْ؟
17هُو وَدَّرْ كُلَّ أَيَّامَهْ فِي الضَّلَامْ
وَ فِي كَتَرَةْ الْهَمّ وَ التَّعَبْ وَ الزَّعَلْ.
18دَاهُو الْأَنَا شِفْتَهْ.
عَدِيلْ لِلْإِنْسَانْ يَاكُلْ وَ يَشْرَبْ
وَ يَلْقَى الْخَيْر فِي كُلَّ خِدِمْتَهْ
الْيِسَوِّيهَا فِي الْأَرْض.
يِسَوِّي مِثِلْ دَا
فِي كُلَّ مُدَّةْ حَيَاتَهْ
الْيَنْطِيهَا لَيَّهْ الرَّبّ.
وَ دَا بَسْ قِسْمَهْ.
19وَ مِثِلْ دَا، وَكِتْ الرَّبّ أَنْطَى نَادُمْ
مَالْ وَ غُنَى الْبَيْهُمْ هُو يِعِيشْ،
هُو يَقْدَرْ يَلْقَى مِنْهُمْ قِسْمَهْ
وَ يِتْمَتَّعْ بِخِدِمْتَهْ.
وَ دِي هَدِيَّةْ مِنْ الرَّبّ.
20وَ خَلَاصْ، وَكِتْ الرَّبّ يَمْلَا قَلْبَهْ بِالْفَرَحْ،
هُو مَا يِفَكِّرْ زِيَادَةْ فِي أَيَّامْ عُمْرَهْ.
Currently Selected:
جامِعة 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
