تَثْنِية 7
7
اللّه أمر يدمُّروا الأُمم
1وَ مُوسَى قَالْ بَتَّانْ: وَكِتْ اللّٰهْ إِلٰـهْكُو يِوَدِّيكُو فِي الْبَلَدْ التَّدْخُلُوا فَوْقهَا وَ تِشِيلُوهَا وَرَثَةْ، هُو يَطْرُدْ قِدَّامْكُو سَبْعَةْ أُمَمْ كَتِيرِينْ وَ شُدَادْ مِنْكُو وَ هُمَّنْ الْحِتِّيِّينْ وَ الْقِرْقَاشِيِّينْ وَ الْأَمُورِيِّينْ وَ الْكَنْعَانِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ. 2وَ وَكِتْ اللّٰهْ إِلٰـهْكُو يَنْصُرْكُو فَوْقهُمْ وَ يِسَلِّمْهُمْ لَيْكُو فِي إِيدَيْكُو، وَاجِبْ تِدَمُّرُوهُمْ مَرَّةْ وَاحِدْ وَ أَبَداً مَا تِسَوُّوا مَعَاهُمْ عَلَاقَةْ وَ لَا تَرْحَمَوْهُمْ. 3الْأُمَمْ دَوْل مَا تَاخُدُوا مِنْهُمْ وَ لَا تَنْطُوا بَنَاتْكُو لِأَوْلَادْهُمْ وَ لَا تَاخُدُوا لِأَوْلَادْكُو مِنْ بَنَاتْهُمْ. 4أَشَانْ دَا، يِبَعِّدْ عِيَالْكُو مِنْ اللّٰهْ وَ يَعَبُدُوا إِلٰـهَاتْ آخَرِينْ وَ اللّٰهْ يَغْضَبْ عَلَيْكُو غَضَبْ شَدِيدْ وَ يِدَمِّرْكُو بَلَا تَأخِيرْ. 5وَ لَاكِنْ دَاهُو الشَّيّءْ التِّسَوُّوهْ لِلْأُمَمْ دَوْل. هَدُّمُوا مَدَابِحْهُمْ وَ أَرْمُوا حُجَارْهُمْ الْغَزَّوْهُمْ لِلْعِبَادَةْ وَ كَسُّرُوا عِيدَانْهُمْ الْغَزَّوْهُمْ لِعِبَادَةْ أَشِيرَةْ وَ حَرُّقُوا أَصْنَامْهُمْ. 6أَشَانْ إِنْتُو شَعَبْ مُخَصَّصِينْ لِلّٰهْ إِلٰـهْكُو وَ اللّٰهْ إِلٰـهْكُو عَزَلَاكُو مِنْ كُلَّ الشُّعُوبْ الْقَاعِدِينْ فِي الْأَرْض لِتَبْقَوْا شَعَبَهْ حَلَالَهْ.
7وَ اللّٰهْ حَبَّاكُو وَ عَزَلَاكُو مَا أَشَانْ إِنْتُو كَتِيرِينْ مِنْ كُلَّ الشُّعُوبْ الْآخَرِينْ. لَا! إِنْتُو بَسْ الشِّيَّةْ. 8أَشَانْ اللّٰهْ يِحِبُّكُو بَسْ، هُو حَفَضْ الْحَلِيفَةْ الْحَلَفْ بَيْهَا لِجُدُودْكُو. وَ فِي شَانْ دَا بَسْ، هُو مَرَقَاكُو بِإِيدْ شَدِيدَةْ وَ فَدَاكُو مِنْ إِيدْ فِرْعَوْن مَلِكْ مَصِرْ بَلَدْ الْعُبُودِيَّةْ.
9وَ بَيْدَا، تَعَرْفُوا تَمَامْ كَدَرْ اللّٰهْ إِلٰـهْكُو، هُو بَسْ الرَّبّ. وَ هُو صَادِقْ وَ يَحْفَضْ مُعَاهَدَتَهْ وَ خَيْرَهْ لِأَلِفْ ذُرِّيَّةْ. وَ دَا، لِلنَّاسْ الْيِحِبُّوهْ وَ يِطَبُّقُوا وَصِيَّاتَهْ. 10وَ لَاكِنْ يِجَازِي الْيَكْرَهَوْه وَ يِدَمِّرْهُمْ وَ بَلَا تَأخِيرْ الْيَكْرَهَوْه هُو يِجَازِيهُمْ. 11وَ أَحْفَضَوْا الْوَصَايَا وَ الشُّرُوطْ وَ الْقَوَانِينْ النَّامُرْكُو بَيْهُمْ الْيَوْم وَ طَبُّقُوهُمْ.
12كَنْ إِنْتُو سِمِعْتُوا الشُّرُوطْ دَوْل وَ حَفَضْتُوهُمْ وَ طَبَّقْتُوهُمْ، اللّٰهْ إِلٰـهْكُو كُلَ يَحْفَضْ لَيْكُو الْمُعَاهَدَةْ وَ الْخَيْر الْحَلَفْ بَيَّهْ لِجُدُودْكُو. 13وَ يِحِبُّكُو وَ يِبَارِكُّو وَ يِكَتِّرْكُو وَ يِبَارِكْ ذُرِّيِّتْكُو وَ إِنْتَاجْ أَرْضُكُو وَ قَمَحْكُو وَ خَمَرْكُو الْجَدِيدْ وَ دِهِنْكُو وَ وَالُودَةْ بَقَرْكُو وَ غَنَمْكُو فِي الْأَرْض الْحَلَفْ لِجُدُودْكُو وَ قَالْ يَنْطِيهَا لَيْكُو. 14وَ إِنْتُو تَبْقَوْا مُبَارَكِينْ زِيَادَةْ مِنْ كُلَّ الشُّعُوبْ الْآخَرِينْ وَ فِي لُبُّكُو، مَا فِي رَاجِلْ وَ لَا مَرَةْ عَاقْرَةْ وَ مَا فِي بَهِيمَةْ عَاقْرَةْ فِي لُبّ بَهَايِمْكُو. 15وَ اللّٰهْ يِبَعِّدْ مِنْكُو أَيِّ مَرَضْ. وَ مَا يِرَسِّلْ لَيْكُو الْأَمْرَاضْ الْفَسْلِينْ الشِّفْتُوهُمْ فِي مَصِرْ وَ لَاكِنْ يِرَسِّلْهُمْ لِكُلَّ النَّاسْ الْيَكْرَهَوْكُو.
16وَ تِدَمُّرُوا كُلَّ الشُّعُوبْ الْيِسَلِّمْهُمْ لَيْكُو اللّٰهْ إِلٰـهْكُو وَ مَا تِحِنُّوا فَوْقهُمْ. وَ مَا تَعَبُدُوا إِلٰـهَاتْهُمْ أَشَانْ مَا يَبْقَوْا لَيْكُو شَرَكْ. 17وَ أَكُونْ تُقُولُوا فِي قُلُوبْكُو: «الْأُمَمْ دَوْل كَتِيرِينْ مِنِّنَا وَ كِكَّيْف نَقْدَرَوْا نَقْلَعَوْا أَرْضُهُمْ؟» 18وَ لَاكِنْ مَا تَخَافَوْا مِنْهُمْ. فَكُّرُوا فِي الشَّيّءْ السَّوَّاهْ اللّٰهْ إِلٰـهْكُو فِي الْمَلِكْ فِرْعَوْن وَ كُلَّ بَلَدْ مَصِرْ. 19وَ إِنْتُو شِفْتُوا بِعُيُونْكُو الْعَلَامَاتْ وَ الْعَجَايِبْ وَ الْإِيدْ الشَّدِيدَةْ وَ الدُّرَاعْ الْقَوِي الْمَرَقَاكُو بَيْهُمْ اللّٰهْ إِلٰـهْكُو. وَ بِمِثِلْ دَا، اللّٰهْ إِلٰـهْكُو يِسَوِّي فِي كُلَّ الشُّعُوبْ الْإِنْتُو قَاعِدِينْ تَخَافَوْا مِنْهُمْ. 20وَ اللّٰهْ إِلٰـهْكُو يِرَسِّلْ لَيْهُمْ نَحَلَةْ تِدَمِّرْ الْفَضَّلَوْا مِنْهُمْ وَ الْمُلَّبِّدِينْ مِنْكُو.
21مَا تِنْبَهْتُوا مِنْهُمْ أَشَانْ اللّٰهْ إِلٰـهْكُو قَاعِدْ فِي أُسُطْكُو وَ هُو الْإِلٰـهْ الْعَظِيمْ وَ الْمُخِيفْ. 22وَ اللّٰهْ إِلٰـهْكُو يَطْرُدْ الْأُمَمْ دَوْل بَعِيدْ مِنْكُو بِشِيَّةْ شِيَّةْ. إِنْتُو مَا تَقْدَرَوْا تِكَمُّلُوهُمْ طَوَّالِي كَيْ أَشَانْ حَيْوَانَاتْ الْكَدَادَةْ يَبْقَوْا كَتِيرِينْ ضِدُّكُو. 23وَ اللّٰهْ إِلٰـهْكُو يِسَلِّمْ لَيْكُو الشَّعَبْ دَا فِي إِيدْكُو وَ يِبَرْجِلْهُمْ مَرَّةْ وَاحِدْ لَحَدِّي يِدَّمَّرَوْا. 24وَ يِسَلِّمْ لَيْكُو مُلُوكْهُمْ وَ إِنْتُو تُقُشُّوهُمْ مِنْ تِحِتْ السَّمَاءْ وَ وَاحِدْ مِنْهُمْ مَا يَقْدَرْ يَقِيفْ قِدَّامْكُو لَحَدِّي تِكَمُّلُوهُمْ كُلُّهُمْ.
25وَ حَرُّقُوا أَصْنَامْ إِلٰـهَاتْهُمْ بِنَارْ وَ مَا تَطْمَعَوْا وَ تِشِيلُوا مِنْ الْفُضَّةْ وَ الدَّهَبْ الْفَوْقهُمْ لِنُفُوسْكُو أَشَانْ دَا يَبْقَى لَيْكُو شَرَكْ يَكْرُبْكُو وَ اللّٰهْ إِلٰـهْكُو كُلَ حَرَّمَهْ. 26وَ مَا تِجِيبُوا الْحَرَامْ فِي بُيُوتْكُو أَشَانْ بَيَّهْ تَهْلَكَوْا مِثِلْهُمْ. وَ حَرُّمُوا الْحَرَامْ أَشَانْ هُو يِجِيبْ الْهَلَاكْ.
Currently Selected:
تَثْنِية 7: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
