كُلُوسِي 4

1يَا سِيَادْ الْعَبِيدْ، سَوُّوا دَايْماً لِعَبِيدْكُو الْعَدِلْ وَ الْمُسَاوَةْ. مَا تَنْسَوْا كَدَرْ إِنْتُو كُلَ عَبِيدْ وَ سِيدْكُو هُو الْقَاعِدْ فِي السَّمَاءْ.

الصلاة و البِشارة

2يَا أَخْوَانِي، أَنْكَرْبُوا فِي الصَّلَاةْ وَ أَقْعُدُوا فَوْقهَا وَاعِيِّينْ وَ أَسْأَلَوْا اللّٰهْ بِشُكُرْ. 3وَ أَسْأَلَوْا اللّٰهْ لَيْنَا كُلَ. أَسْأَلَوْه أَشَانْ يَفْتَحْ لَيْنَا دَرِبْ لِلْبِشَارَةْ أَشَانْ نِبَلُّغُوا النَّاسْ بِسِرّ اللّٰهْ هُو الْمَسِيحْ. وَ بِسَبَبْ الْبِشَارَةْ دِي، أَنَا قَاعِدْ فِي السِّجِنْ. 4أَسْأَلَوْا اللّٰهْ لَيِّ أَشَانْ نِبَلِّغْهَا لِلنَّاسْ بِكَلَامْ وَاضِحْ مِثِلْ وَاجِبْ.

5عِيشُوا بِحِكْمَةْ فِي أُسْط النَّاسْ الْمَا مُؤمِنِينْ. أَيِّ فُرْصَةْ اللِّقِيتُوهَا، أَشْهَدَوْا لِلْمَسِيحْ. 6شِيلُوا نِيَّةْ أَشَانْ تِحَجُّوا دَايْماً بِكَلَامْ طَاعِمْ وَ عِنْدَهْ رَحْمَةْ. وَ مِثِلْ دَا، تَعَرْفُوا كِكَّيْف وَاجِبْ تُرُدُّوا لِأَيِّ نَادُمْ.

الخبر و السلام

7وَ خَلَاصْ، أَخُونَا تِشِيكُسْ يِأَوْرِيكُو بِكُلَّ خَبَرِي. هُو أَخُونَا النِّحِبُّوهْ وَ يَخْدِمْ مَعَانَا لِرَبِّنَا بِأَمَانْ. 8وَ هُو يِخَبِّرْكُو بِحَالِتْنَا وَ يِشَجِّعْكُو وَ بِسَبَبْ دَا بَسْ رَسَّلْتَهْ لَيْكُو. 9وَ رَسَّلْت مَعَايَهْ الْفَايِدْ#4‏:9 الْفَايِدْ: بكلام يوناني أُسُم النادم دا أُونِسِيمُس. و معنى هنا الأُسُم دا، هو العِنْده فايْدة. وَ هُو أَخُونَا الْأَمِينْ النِّرِيدُوهْ وَ هُو نَادُمْ مِنْ حِلِّتْكُو. النَّاسَيْن دَوْل يِأَوْرُوكُو بِكُلَّ شَيّءْ الْبِقِي فَوْقنَا هِنِي.

10أَخُونَا أَرِسْتَارْكُسْ الْقَاعِدْ مَعَايِ فِي السِّجِنْ يِسَلِّمْكُو وَ مَعَايَهْ مَرْخُوسْ أَخُو بَرْنَابَا. وَ مَرْخُوسْ دَا، كَنْ جَاءْ لَيْكُو، أَكُرْبُوهْ قَوِي مِثِلْ وَصَّوْكُو بَيَّهْ أَوَّلْ. 11وَ يَشُوعْ الْمَعْرُوفْ بِيُسْتُسْ يِسَلِّمْكُو. التَّلَاتَةْ دَوْل بَسْ مِنْ الْيَهُودْ بَيْن الْأَخْوَانْ الْيَخْدُمُوا مَعَايِ فِي شَانْ مَمْلَكَةْ اللّٰهْ وَ هُمَّنْ شَجَّعَوْنِي كَتِيرْ.

12وَ أَخُونَا أَبْفُرَاسْ الْهُو خَدَّامْ الْمَسِيحْ عِيسَى مِنْ حِلِّتْكُو، هُو كُلَ يِسَلِّمْكُو. هُو قَاعِدْ يَسْأَلْ اللّٰهْ دَايْماً لَيْكُو بِشِدَّةْ أَشَانْ تَقْعُدُوا بِثَبَاتْ كَامِلْ وَ مُؤَكِّدِينْ مِنْ نِيَّةْ اللّٰهْ. 13وَ أَنَا نَشْهَدْ لَيَّهْ هُو قَاعِدْ يَخْدِمْ كَتِيرْ فِي شَانْكُو وَ فِي شَانْ الْأَخْوَانْ الْفِي حِلَّالْ لَاوْدِكِيَّةْ وَ هِرَابُلُسْ.

14وَ أَخُونَا لُوقَا الدَّكْتَوْر النِّحِبُّوهْ وَ أَخُونَا دِيمَاسْ، هُمَّنْ يِسَلُّمُوكُو. 15وَ سَلُّمُوا الْأَخْوَانْ الْفِي لَاوْدِكِيَّةْ وَ أَخُتْنَا نِيمْفَةْ وَ جَمَاعَةْ الْمُؤمِنِينْ الْيِلِمُّوا فِي بَيْتهَا. 16وَ وَكِتْ قَرَوْا لَيْكُو الْجَوَابْ دَا خَلَاصْ، خَلِّي يَقْرُوهْ لِجَمَاعَةْ الْمُؤمِنِينْ الْفِي لَاوْدِكِيَّةْ كُلَ. وَ الْجَوَابْ الرَّسَّلْتَهْ لِلَاوْدِكِيَّةْ، خَلِّي يَقْرُوهْ لَيْكُو كُلَ. 17وَ كَلُّمُوا لِأَرْخِبَّا وَ قُولُوا لَيَّهْ: «خُطّ بَالَكْ أَشَانْ تِتَمِّمْ الْخِدْمَةْ الرَّبِّنَا أَنْطَاهَا لَيْك.»

18وَ خَلَاصْ، أَنَا ذَاتِي شِلْت الْقَلَمْ وَ نَكْتِبْ: «أَنَا بُولُسْ نِسَلِّمْكُو.» مَا تَنْسَوْا كَدَرْ أَنَا قَاعِدْ فِي السِّجِنْ وَ مُجَنْزَرْ.

وَ عَلَيْكُمْ رَحْمَةْ الرَّبّ.

Currently Selected:

كُلُوسِي 4: ع.د.ت19

Highlight

Copy