كُلُوسِي 3
3
الحياة الجديدة في المسيح
1أَكِيدْ لِقِيتُوا حَيَاةْ جَدِيدَةْ فِي بُعَاثْ الْمَسِيحْ وَ أَشَانْ دَا، خُطُّوا بَالْكُو فِي الْأَشْيَاءْ الْقَاعِدِينْ فِي السَّمَاءْ مَعَ الْمَسِيحْ الْقَاعِدْ جَنْب اللّٰهْ فِي نُصَّهْ الزَّيْنَايْ. 2خُطُّوا أَفْكَارْكُو فِي الْخُمَامْ السَّمَاوِي وَ مَا فِي الْخُمَامْ الْأَرْضِي 3أَشَانْ إِنْتُو مُتُّوا مَعَ الْمَسِيحْ وَ الْحَيَاةْ الْاللّٰهْ أَنْطَاهَا لَيْكُو، هِي لِسَّاعْ مَا تِنْشَافْ. هِي مَعَ الْمَسِيحْ فِي إِيدَيْن اللّٰهْ. 4الْمَسِيحْ بِقِي لَيْكُو الْحَيَاةْ وَ وَكِتْ هُو يَجِي بَتَّانْ، إِنْتُو تِبِينُوا مَعَايَهْ فِي مَجْدَهْ.
5أَشَانْ دَا، قُشُّوا مَرَّةْ وَاحِدْ مِنْ أَفْكَارْكُو كُلَّ شَيّءْ الْمِنْ الْأَرْض مِثِلْ الزِّنَى وَ الْحَالْ الشَّيْنَةْ وَ الشَّهْوَاتْ الْفَسْلِينْ وَ النِّيَّةْ الْفَسْلَةْ وَ الطَّمَعْ. وَ بِالصَّحِيحْ، الطَّمَعْ هُو مِثِلْ عِبَادَةْ الْأَصْنَامْ. 6فِي شَانْ الذُّنُوبْ دَوْل، غَضَبْ اللّٰهْ يَنْزِلْ فِي الْعَاصِيِينْ. 7وَ أَوَّلْ، إِنْتُو كُلَ حَالْكُو كَانَتْ مِثِلْ حَالْهُمْ وَكِتْ إِنْتُو قَاعِدِينْ تِتَابُعُوا الشَّهْوَاتْ دَوْل. 8لَاكِنْ هَسَّعْ، خَلُّوا مِنْكُو كُلَّ شَيّءْ الْمَا عَدِيلْ. خَلُّوا مِنْكُو الْغَبِينَةْ وَ الزَّعَلْ وَ الْحَسِيفَةْ وَ الْقَطِيعَةْ وَ الْكَلَامْ الشَّيْن. 9مَا تَكْدُبُوا لِأَخْوَانْكُو بَتَّانْ أَشَانْ إِنْتُو خَلَّيْتُوا الْحَالْ الْقَدِيمَةْ مَعَ كُلَّ عَادَاتْهَا. 10إِنْتُو شِلْتُوا الْحَيَاةْ الْجَدِيدَةْ وَ اللّٰهْ قَاعِدْ يِجَدِّدْكُو وَ يِزِيدْ لَيْكُو الْعِرْفَةْ لَحَدِّي تِشَابُهُوا مِثِلْ صُورَةْ اللّٰهْ الْخَلَقَاكُو. 11وَ فِي الْحَيَاةْ الْجَدِيدَةْ دِي، مَا مُهِمّ بَتَّانْ كَنْ نَادُمْ يَهُودِي وَلَّا مَا يَهُودِي، وَ كَنْ مُطَهَّرْ وَلَّا مَا مُطَهَّرْ، وَ كَنْ أَجْنَبِي وَلَّا مِنْ الْكَدَادَةْ، وَ كَنْ عَبِدْ وَلَّا حُرّ. لَاكِنْ الْمَسِيحْ هُو قَاعِدْ فِينَا كُلِّنَا وَ هُو بَسْ الْمُهِمّ.
12يَا النَّاسْ الْاللّٰهْ عَزَلَاكُو، بِقِيتُوا صَالِحِينْ وَ مَحْبُوبِينْ. أَشَانْ دَا، أَلْبَسَوْا الْمَحَنَّةْ وَ خَلِّي قُلُوبْكُو يَبْقَوْا بُيُضْ وَ نَفَسْكُو يَبْقَى بَارِدْ وَ أَبْقَوْا ضَلُولِينْ وَ صُبُورِينْ. 13وَ أَلْحَمَّلَوْا الْوَاحِدِينْ لِلْآخَرِينْ بِمَحَبَّةْ. وَ كَنْ نَادُمْ عِنْدَهْ ضَلِيمَةْ فَوْق أَخُوهْ، خَلِّي يِسَامِحَهْ. الرَّبّ سَامَحَاكُو وَ أَشَانْ دَا، وَاجِبْ لَيْكُو تِسَّامَحَوْا أَمْبَيْنَاتْكُو. 14وَ زِيدُوا لِكُلَّ الْأَشْيَاءْ دَوْل الْمَحَبَّةْ التَّرْبُطْ كُلَّ شَيّءْ تَمَامْ وَ تِجِيبْ الْوِحْدَةْ. 15خَلُّوا سَلَامْ الْمَسِيحْ يَمْلُكْ فِي قُلُوبْكُو أَشَانْ اللّٰهْ نَادَاكُو لِتِعِيشُوا فِي السَّلَامْ وَ جَعَلَاكُو جِسِمْ وَاحِدْ. وَ أَبْقَوْا شَكُورِينْ.
16خَلُّوا كَلَامْ الْمَسِيحْ يَسْكُنْ أَمْبَيْنَاتْكُو بِكُلَّ بَرَكَاتَهْ. عَلُّمُوا بَيَّهْ أَيِّ وَاحِدْ وَ أَشَّاجَعَوْا أَمْبَيْنَاتْكُو بِكُلَّ حِكْمَةْ. غَنُّوا لِلّٰهْ بِكُلَّ قُلُوبْكُو بِغِنَيْ وَ أَنَاشِيدْ وَ شُكُرْ مِنْ الرُّوحْ الْقُدُّوسْ. 17وَ كُلَّ شَيّءْ التِّسَوُّوهْ، كَنْ بِكَلَامْ وَلَّا بِفِعِلْ، سَوُّوهْ بِأُسُمْ الرَّبّ عِيسَى وَ بِأُسْمَهْ أَشْكُرُوا اللّٰهْ أَبُوكُو.
البيت المسيحي
18يَا الْعَوِينْ، أَسْمَعَنْ كَلَامْ رُجَالْكَنْ مِثِلْ وَاجِبْ لِلْعَوِينْ الْيِتَابِعَنْ الرَّبّ. 19يَا الرُّجَالْ، حِبُّوا عَوِينْكُو وَ مَا تَكُرْبُوا لَيْهِنْ فِي قُلُوبْكُو.
20يَا الْعِيَالْ، أَسْمَعَوْا كَلَامْ وَالْدَيْنكُو فِي كُلَّ شَيّءْ أَشَانْ دَا يِرَضِّي رَبِّنَا. 21يَا أَبَّهَاتْ الْعِيَالْ، مَا تِزَعُّلُوا عِيَالْكُو. كَنْ تِزَعُّلُوهُمْ زِيَادَةْ، أَكُونْ يِوَدُّرُوا عَشَمْهُمْ.
22يَا الْعَبِيدْ، فِي كُلَّ شَيّءْ تَابُعُوا كَلَامْ النَّاسْ الْفِي الدُّنْيَا دِي، هُمَّنْ سِيَادْكُو. تَابُعُوا كَلَامْهُمْ دَايْماً وَ مَا وَكِتْ هُمَّنْ قَاعِدِينْ يِشِيفُوكُو بَسْ وَ لَا وَكِتْ تِدَوْرُوا مِنْهُمْ الشُّكُرْ. لَاكِنْ تَابُعُوا كَلَامْهُمْ بِقَلِبْ مُخْلِصْ أَشَانْ رَبِّنَا هُو سِيدْكُو الْإِنْتُو خَايْفِينْ مِنَّهْ. 23أَيِّ خِدْمَةْ الْيَنْطُوكُو، أَخْدُمُوهَا بِنِيَّةْ وَاحِدَةْ. خُطُّوا فِي أَفْكَارْكُو كَدَرْ تَخْدُمُوا لِرَبِّنَا وَ مَا لِلنَّاسْ بَسْ. 24أَعَرْفُوا كَدَرْ تَلْقَوْا وَرَثَةْ مِنْ الرَّبّ وَ دِي بَسْ أُجْرِتْكُو. إِنْتُو قَاعِدِينْ تَخْدُمُوا لِرَبِّنَا الْمَسِيحْ. 25وَ أَيِّ نَادُمْ الْيِسَوِّي شَيّءْ فَسِلْ، الرَّبّ يِعَاقِبَهْ فِي شَانْ فَسَالْتَهْ. رَبِّنَا مَا يِشِيفْ نَادُمْ أَخَيْر مِنْ الْآخَرْ.
Currently Selected:
كُلُوسِي 3: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
