1 تَسَلونِيكِي 5
5
جيّة المسيح التانية
1يَا أَخْوَانِي، إِنْتُو مَا حَوْجَانِينْ أَنِحْنَ نَكْتُبُوا لَيْكُو شَيّءْ فِي الْأَوْكَاتْ وَ الْأَيَّامْ الْجَايِينْ. 2أَشَانْ إِنْتُو ذَاتْكُو تَعَرْفُوا عَدِيلْ كَدَرْ يَوْم الرَّبّ يَجِي بِغَفْلَةْ مِثِلْ جَيَّةْ السَّرَّاقْ بِاللَّيْل. 3وَكِتْ النَّاسْ قَاعِدِينْ يُقُولُوا: «عِنْدِنَا الصِّحَّةْ وَ السَّلَامْ»، فِي الْوَكِتْ الْمِثِلْ دَا بَسْ، الْهَلَاكْ يَضْرُبْهُمْ عَجَلَةْ مِثِلْ الطَّلَقَةْ تَجِي عَجَلَةْ لِلْمَرَةْ الْغَلْبَانَةْ. مَا مُمْكِنْ يِنْبَلْصُوا.
4وَ لَاكِنْ، يَا أَخْوَانِي، إِنْتُو مَا قَاعِدِينْ فِي الضَّلَامْ مِثِلْهُمْ. وَ الْيَوْم دَا مَا يَجِي فَوْقكُو إِنْتُو بِغَفْلَةْ مِثِلْ جَيَّةْ السَّرَّاقْ 5أَشَانْ إِنْتُو كُلُّكُو عِيَالْ النُّورْ وَ نَاسْ النَّهَارْ. أَيْوَى، أَنِحْنَ مَا نَاسْ هَنَا اللَّيْل وَ لَا نَاسْ الضَّلَامْ.
6أَشَانْ دَا، خَلِّي مَا نَبْقَوْا مِثِلْ النَّاسْ الْآخَرِينْ. هُمَّنْ مِثِلْ نَاسْ نَايْمِينْ أَشَانْ مَا يَعَرْفُوا الشَّيّءْ الْيَجِي فَوْقهُمْ. خَلِّي نَقْعُدُوا وَاعِيِّينْ وَ نُخُطُّوا بَالْنَا. 7أَشَانْ بِاللَّيْل بَسْ، يُنُومُوا النَّوَّامِينْ وَ بِاللَّيْل بَسْ، يَسْكَرَوْا السَّكَّارَى. 8وَ لَاكِنْ أَنِحْنَ نَاسْ النَّهَارْ وَ أَشَانْ دَا، خَلِّي نُخُطُّوا بَالْنَا. وَ خَلِّي الْإِيمَانْ وَ الْمَحَبَّةْ يَبْقَوْا لَيْنَا مِثِلْ خَلَقْنَا هَنَا الْحَرِبْ. وَ خَلِّي الْعَشَمْ الْعِنْدِنَا فِي رَبِّنَا الْيِنَجِّينَا، دَا يَبْقَى طَاقِيِّتْنَا.
9أَشَانْ اللّٰهْ مَا قَدَّرْ لَيْنَا الْعَذَابْ. لَا. هُو قَدَّرْ لَيْنَا النَّجَاةْ بِرَبِّنَا عِيسَى الْمَسِيحْ. 10الْمَسِيحْ مَاتْ فِي شَانَّا وَ بَيْدَا، كَنْ أَنِحْنَ حَيِّينْ وَلَّا مَيْتِينْ كُلَ فِي يَوْم جَيْتَهْ، نِعِيشُوا مَعَايَهْ سَوَا. 11وَ خَلَاصْ بِالْكَلَامْ دَا، أَشَّاجَعَوْا أَمْبَيْنَاتْكُو وَ أَسَّاعَدَوْا فِي إِيمَانْكُو بِزِيَادَةْ مِثِلْ إِنْتُو قَاعِدِينْ تِسَوُّوهْ.
نِهاية الجواب
12يَا أَخْوَانِي، نَطُلْبُوا مِنْكُو تِكَرُّمُوا النَّاسْ الْقَاعِدِينْ يَخْدُمُوا أَمْبَيْنَاتْكُو الْعِنْدُهُمْ فَوْقكُو مَسْؤُولِيَّةْ وَ قَاعِدِينْ يُقُودُوكُو فِي دَرِبْ الرَّبّ. 13حِبُّوهُمْ بِمَحَبَّةْ شَدِيدَةْ بِسَبَبْ خِدْمِتْهُمْ. وَ أَقْعُدُوا بِسَلَامْ أَمْبَيْنَاتْكُو.
14يَا أَخْوَانِي، أَسْمَعَوْا وَصَايَانَا. حَذُّرُوا الْعَاطِلِينْ وَ ثَبُّتُوا الْخَوَّافِينْ وَ سَاعُدُوا الضَّعِيفِينْ. وَ أَصْبُرُوا لِكُلَّ النَّاسْ. 15أَنْقَرْعُوا، نَادُمْ مِنْكُو مَا يِسَوِّي شَيّءْ فَسِلْ لِلنَّاسْ السَّوَّوْا لَيَّهْ شَيّءْ فَسِلْ. شِيلُوا نِيَّةْ أَشَانْ تِسَوُّوا دَايْماً الْخَيْر أَمْبَيْنَاتْكُو وَ لِكُلَّ النَّاسْ.
16أَفْرَحَوْا دَايْماً 17وَ مَا تَكْسَلَوْا مِنْ الصَّلَاةْ 18وَ أَشْكُرُوا اللّٰهْ فِي كُلِّ حَالْ. دَا بَسْ الشَّيّءْ الْاللّٰهْ يِدَوْرَهْ مِنْكُو فِي دَرِبْ عِيسَى الْمَسِيحْ. 19وَ مَا تَكْتُلُوا نُورْ الرُّوحْ الْقُدُّوسْ. 20مَا تِكَدُّبُوا كَلَامْ اللّٰهْ الْيَنْزِلْ لَيْكُو بِوَاسِطَةْ أَخْوَانْكُو. 21جَرُّبُوا كُلَّ شَيّءْ. الشَّيّءْ الْعَدِيلْ، أَكُرْبُوهْ قَوِي. 22أَنْقَرْعُوا مِنْ أَيِّ شَيّءْ فَسِلْ.
23خَلِّي اللّٰهْ رَبّ السَّلَامْ ذَاتَهْ يِخَصِّصْ قُلُوبْكُو مَرَّةْ وَاحِدْ وَ يَحْفَضْكُو سَالِمِينْ فِي الرُّوحْ وَ النَّفْس وَ الْجِسِمْ أَشَانْ تُكُونُوا بَلَا عَيْب فِي يَوْم جَيَّةْ رَبِّنَا عِيسَى الْمَسِيحْ. 24النَّادَاكُو فِي دَرْبَهْ، هُو صَادِقْ. وَ أَكِيدْ كُلَّ الشَّيّءْ دَا، هُو يِسَوِّيهْ.
25يَا أَخْوَانِي، أَسْأَلَوْا اللّٰهْ لَيْنَا أَنِحْنَ كُلَ. 26سَلُّمُوا كُلَّ الْأَخْوَانْ بِسَلَامْ الصَّالِحِينْ. 27بِأُسُمْ الرَّبّ، نَامُرْكُو أَشَانْ تَقْرُوا الْجَوَابْ دَا لِكُلَّ الْأَخْوَانْ.
28عَلَيْكُمْ رَحْمَةْ رَبِّنَا عِيسَى الْمَسِيحْ.
Currently Selected:
1 تَسَلونِيكِي 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
