Rooma 6

Al-hurriiye min muluk al-zanib

1Wa kan rahmat Allah kitrat ziyaada fi l-bakaan al-foogah al-zanib awwal kitir, aniina nisawwu chunu ? Hal waajib nagoodu battaan fi zunuubna achaan rahmat Allah tiziid foogna walla ? 2La, abadan ! Aniina mutna wa maragna min muluk al-zanib. Kikkeef niʼiichu foogah battaan ? 3Intu taʼarfu tamaam kadar aniina kullina khattasoona le nabgo waahid maʼa l-Masiih Isa wa be l-khattisiin da bigiina waahid maʼaayah fi mootah. 4Wakit khattasoona, aniina mutna maʼa l-Masiih wa dafanoona maʼaayah. Wa misil abuuna Allah baʼas al-Masiih be gudurtah al-majiide, aniina kula nahyo maʼaayah be haya jadiide. 5Achaan kan aniina bigiina waahid maʼa l-Masiih wa mutna maʼaayah fi mootah, akiid nabgo maʼaayah waahid fi buʼaasah.

6Naʼarfu kadar jisimna al-insaani al-gadiim maat maʼa l-Masiih fi l-saliib wa be da, al-jisim al-muznib addammar. Wa aniina ma nabgo battaan abiid le l-zanib 7achaan al-naadum al-maat, hu bigi hurr min gudrat al-zanib. 8Wa kan mutna maʼa l-Masiih, niʼaamunu kadar nahyo maʼaayah kula. 9Wa naʼarfu kadar Allah baʼas al-Masiih min ust al-maytiin wa l-Masiih abadan ma yumuut battaan achaan al-moot ma indah foogah gudra. 10Wakit hu maat, hu maat fi chaan al-zanib marra waahide wa nihaaʼiiye. Laakin hassaʼ, hu gaaʼid hayy wa aayich fi chaan Allah. 11Wa be misil da, aʼarfu kadar intu kula muttu wa anfaragtu min gudrat al-zanib wa baʼastu wa bigiitu hayyiin le Allah be Isa al-Masiih.

12Ma tikhallu al-zanib yamluk fi ajsaamku al-baʼadeen yumuutu. Wa ma tikhallu al-zanib yilizzuku achaan titaabuʼu chahwaat ajsaamku. 13Ma tisallumu battaan ajsaamku le l-zanib misil aala al-yisawwu beeha al-charr. Laakin be l-aks, intu zaatku sallumu nufuusku le Allah misil naas al-baʼaso min ust al-maytiin. Wa sallumu ajsaamku le Allah misil aala al-yisawwu beeha al-kheer. 14Khalaas, al-zanib ma indah gudra foogku battaan achaan hassaʼ intu ma tihit churuut al-Tawraat laakin intu tihit rahmat Allah.

15Wa da kikkeef ? Hal naznubu achaan aniina aaychiin tihit rahmat Allah wa ma tihit churuut al-Tawraat walla ? La, abadan. 16Taʼarfu adiil kadar kan tisallumu nufuusku le naadum achaan titaabuʼu kalaamah misil abiid, khalaas intu abiid le l-naadum al-titaabuʼu kalaamah da. Kan tabgo abiid le l-zanib da, al-zanib yiwaddiiku le l-moot wa laakin kan titaabuʼu kalaam Allah, hu yisawwiiku saalihiin. 17Wa l-hamdulillah, awwal intu bigiitu abiid le l-zanib laakin hassaʼ titaabuʼu be kulla guluubku al-taʼliim al-Allah nazzalah leeku. 18Intu hurriin min al-zanib wa bigiitu abiid Allah al-saalihiin.

19Fikirku fikir insaani wa achaan da, ana gaaʼid nihajji leeku be kalaam hayyin misil kalaam al-naas. Awwal sallamtu ajsaamku misil abiid le l-haal al-cheene wa le l-khataaya al-sawwooku khaatiyiin be ziyaada. Hassaʼ waajib tisallumu ajsaamku le l-haal al-saalhe wa tabgo naas Allah al-saalihiin.

20Wa wakit intu kuntu abiid le l-zanib, ma gidirtu titaabuʼu al-haal al-saalhe. 21Wa ween al-natiija al-ligiituuha min al-zunuub al-awwal sawweetuuhum dool ? Hassaʼ al-eeb karabaaku be sababhum achaan al-zunuub dool yiwaddu al-naas le l-moot. 22Laakin hassaʼ intu hurriin min al-zanib wa bigiitu abiid Allah. Wa l-natiija al-talgooha, hi al-haal al-saalhe wa hi tiwaddi al-naas le l-haya al-abadiiye. 23Achaan ujrat al-zanib, hi al-moot wa l-atiiye al-Allah yantiiha bala taman, hi al-haya al-abadiiye be Rabbina Isa al-Masiih.

Currently Selected:

Rooma 6: ADT19

Highlight

Copy