Rooma 10

1Ya akhwaani fi l-Masiih, nitmanna be kulla galbi kadar akhwaani al-Yahuud yanjo wa da l-cheyy al-ana daayman natulbah min Allah. 2Ana nachhad leehum kadar humman munkaribiin fi ibaadat Allah laakin fiyah cheyy waahid ma yaʼarfuuh. 3Humman ma yaʼarfu kikkeef Allah yisawwi al-naas saalihiin wa khalaas yidooru yabgo saalihiin be juhudhum. Wa abo ma yakhbalo al-derib al-Allah fatahah le l-naas al-beyah yabgo saalihiin. 4Achaan al-Masiih ja wa tamma churuut al-Tawraat wa be l-Masiih kulla l-naas yabgo saalihiin, kan yiʼaamunu beyah.

5Wa fi l-Kitaab, Muusa fassar leena kikkeef al-naas yabgo saalihiin be churuut al-Tawraat. Hu gaal : <Al-naadum al-yitabbig kulla l-churuut dool yahya beehum.>#10:5 Al-kalaam da talgooh fi Laawiyiin 18:5. 6Laakin hu gaal battaan kikkeef al-naas yabgo saalihiin be l-iimaan. Maktuub : <Ma tuguul fi galbak, yaatu al-yatlaʼ fi l-sama ?> Yaʼni yinazzil al-Masiih. 7Wa battaan maktuub : <Ma tuguul yaatu al-yanzil fi l-haawiye ?> Yaʼni yamrug al-Masiih min ust al-maytiin. 8Laakin al-cheyy al-buguulah chunu ? Buguul : <Al-kalaam gaaʼid gariib leek. Hu fi khachmak wa fi galbak.>#10:8 Al-kalaam da talgooh fi Tasniya 30:12-14.

Wa l-kalaam da, hu kalaam al-iimaan al-niballukhuuh leeku. 9Kan be khachmak tachhad le Isa wa tuguul hu al-Rabb wa fi galbak tiʼaamin kadar Allah baʼasah min ust al-maytiin, be misil da tanja khalaas. 10Achaan be sabab al-iimaan al-gaaʼid fi l-galib, Allah yajʼal al-naadum saalih wa be sabab chahaadat khachmah, Allah yinajjiih. 11Al-Kitaab buguul : <Ayyi naadum al-yiʼaamin beyah abadan ma yakhjal.>#10:11 Al-kalaam da talgooh fi Ichaʼya 28:16. 12Wa da bigi sawa sawa le l-Yahuud wa le l-ma Yahuud achaan al-Rabb al-waahid, hu Rabb kulla l-naas wa hu kariim le ayyi naadum al-yadʼi be usmah. 13Achaan maktuub : <Ayyi naadum al-yadʼi be usum Allah yanja.>#10:13 Al-kalaam da talgooh fi Yuwiil 2:32.

Ballikhiin al-bichaara waajib

14Wa kikkeef yadʼu be l-Rabb, kan ma aamano beyah ? Wa kikkeef yiʼaamunu be l-Rabb, kan ma simʼo beyah ? Wa kikkeef yasmaʼo beyah, kan ma fi naadum ballakh leehum al-bichaara ? 15Wa kikkeef yiballukhu leehum al-bichaara, kan ma rassaloohum ? Achaan da, al-Kitaab buguul : <Marhaban be jayyit al-mursaal al-yiballikh al-bichaara.>#10:15 Al-kalaam da talgooh fi Ichaʼya 52:7.

16Wa laakin ma kulla l-naas khiblo al-bichaara. Achaan da, al-nabi Ichaʼya gaal : <Ya Allah, yaatu al-aaman be khabarna ?>#10:16 Al-kalaam da talgooh fi Ichaʼya 53:1. 17Khalaas, al-naas ma yabgo muʼminiin be l-Masiih illa kan yasmaʼo al-bichaara wa ma yasmaʼo al-bichaara illa kan naadum yiballikhha leehum. 18Laakin nasʼal cheyy waahid. Sahiih, al-Yahuud lissaaʼ ma simʼo al-bichaara di walla ? La, humman simʼooha. Al-Kitaab buguul : <Hissuhum ansamaʼ fi kulla l-ard, aywa kalaamhum lahaddi aakhir al-dunya.>#10:18 Al-kalaam da talgooh fi Zabuur 19:4.

19Wa battaan nasʼal, Bani Israaʼiil ma fihmo al-kalaam walla ? Awwal be khachum Muusa, Allah gaal : <Nisawwiiku hasuudiin be l-chaʼab al-ma tammo umma wa nizaʼʼilku be umma jaahle.>#10:19 Al-kalaam da talgooh fi Tasniya 32:21. 20Wa l-nabi Ichaʼya gamma hajja kalaam Allah leehum bala chakak wa gaal : <Al-naas al-ligooni, humman ma al-naas al-fattachooni. Wa bayyant nafsi le naas al-ma naadooni.>#10:20 Al-kalaam da talgooh fi Ichaʼya 65:1, hasab al-tarjama al-yuunaaniiye. 21Laakin fi Bani Israaʼiil, hu gaal : <Kulla yoom ana maddeet iideeni le chaʼab aasiyiin wa raashum gawi.>#10:21 Al-kalaam da talgooh fi Ichaʼya 65:2.

Currently Selected:

Rooma 10: ADT19

Highlight

Copy