Filibbi 4
4
1Ya akhwaani al-nihibbuku, ana muchtaag leeku katiir wa nafrah beeku wa fi chaanku intu, narfaʼ raasi foog. Ya l-mahbuubiin, agoodu saabtiin fi Rabbina Isa. 2Ya akhutna Afuudiiya, ya akhutna Sintikha, natlub minkan achaan tistafigan ambeenaatkan wa titaabiʼan Rabbina be fikir waahid. 3Wa inta, ya rafiigi al-amiin, natlub minnak inta tisaaʼid al-awiin deel. Saaʼidhin be sabab hinna khadaman maʼaayi fi chaan bichaarat al-Masiih. Hinna jaahadan sawa maʼa akhuuna Kileemaan wa l-aakhariin al-yakhdumu maʼaayi. Al-naas dool, asaameehum maktuubiin fi Kitaab al-Haya.
Al-fikir al-waajib
4Afraho be Rabbina Isa daayman wa battaan nuguul leeku, afraho ! 5Khalli ruuhku tabga tawiile giddaam ayyi naadum. Rabbina Isa gariib. 6Ma tihimmu le ayyi cheyy laakin fi kulli haal, achkuru Allah wa gaddumu leyah talabku be sala wa duʼa. 7Wa Allah yantiiku salaamah al-faayit fikir al-naas. Wa khalli salaam Allah yahfad guluubku wa afkaarku wa tagoodu saabtiin fi l-Masiih Isa.
8Ya akhwaani, di hi aakhir wasiiye al-nantiiha leeku. Fakkuru fi ayyi cheyy al-sahiih wa l-chariif wa l-aadil wa l-taahir wa l-mahbuub wa l-kariim wa l-afdal wa l-waajib leyah al-chukur. Wa kulla cheyy al-misil da, khuttu afkaarku foogah saabtiin. 9Wa tabbugu daayman kulla cheyy al-allamtuuh minni wa ligiituuh minni, kan min kalaami al-simiʼtuuh walla min haali al-chiftuuha. Wa Allah Rabb al-salaam yukuun maʼaaku.
Al-rasuul chakar naas Filibbi
10Ana farhaan bilheen wa gaaʼid nachkur Rabbina kadar fi l-akhiir, intu chiltu niiye achaan tisaaʼuduuni battaan. Be l-sahiih, awwal kula induku niiye laakin ma induku fursa. 11Wa ana ma gaaʼid nachki leeku min al-maskana. Achaan ana allamt kikkeef niʼiich fi ayyi haal. 12Naʼarif kikkeef niʼiich fi l-maskana aw fi l-khuna. Ana allamt kikkeef nabga radyaan fi ayyi bakaan wa fi kulli haal, kan ana chabʼaan walla jiiʼaan wa kan indi katiir walla chiyya. 13Nagdar nilhammal ayyi cheyy be l-Masiih wa hu yantiini gudra.
14Laakin al-cheyy al-sawweetuuh leyi sameh bilheen. Intu chaaraktu maʼaayi fi taʼabi. 15Ya akhwaani naas Filibbi, intu taʼarfu kadar awwal marra jiit ballakht bichaarat al-Masiih leeku wa futt giddaam min balad Magiduuniya, intu wiheedku chaaraktu maʼaayi. Ma fi jamaaʼat muʼminiin aakhara al-awwal anteethum kalaam Allah wa baʼadeen humman antooni musaaʼada. 16Wakit ana lissaaʼ ma khalleet Magiduuniya wa gaaʼid fi hillit Tasaluuniiki, intu rassaltu leyi musaaʼada aktar min marra. 17Gult al-kalaam da, ma achaan nidoor minku musaaʼada battaan laakin achaan ayyi cheyy al-tantuuh fi chaan Rabbina, hu yakhbalah wa yukhuttah fi makhazan al-hasanaat.
18Wa kulla cheyy al-ana nidoorah, ligiitah khalaas ziyaada min al-nidoorah. Akhuuku Abfariid jaab al-musaaʼada al-rassaltuuha leyi wa khalaas, ana mabsuut. Wa l-musaaʼada di hi misil hadiiye le Allah al-riihitha hu yarda beeha wa yakhbalha. 19Wa ana naʼarif kadar Allah yantiiku be katara kulla cheyy al-tihtaajo leyah. Aywa, yantiiku min khunaayah al-majiid be l-Masiih Isa. 20Wa Allah abuuna, waajib leyah al-majd daayman wa ila l-abad. Aamiin.
Nihaayat al-jawaab
21Sallumu kulla l-naas al-bigo saalihiin be l-Masiih Isa. Wa l-akhwaan al-gaaʼidiin maʼaayi yisallumuuku. 22Kulla l-saalihiin al-gaaʼidiin hini yisallumuuku wa khaassatan al-naas al-min beet al-sultaan.
23Aleekum rahmat al-Rabb Isa al-Masiih.
Currently Selected:
Filibbi 4: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.