Adad 22
22
Balaakh malik Muwaab naada Balʼaam
1Bani Israaʼiil saaro wa nazalo fi kadaadit Muwaab sabaah le bahar al-Urdun mugaabiliin Ariiha. 2-4Wa fi l-wakit da, Balaakh wileed Siffuur hu bas malik Muwaab. Wa wakit hu chaaf kulla cheyy al-sawwooh Bani Israaʼiil fi l-Amuuriyiin, hu wa chaʼabah al-Muwaabiyiin khaafo min katarat Bani Israaʼiil. Wa wakit chaafoohum, barjalo marra waahid. Wa l-Muwaabiyiin gaalo le kubaaraat Midyaan : «Al-naas dool katiiriin. Humman yidammuru kulla cheyy al-gaaʼid hawaaleena misil al-bagar al-yaakulu al-gechch.»
5Wa l-malik Balaakh rassal naas le Balʼaam wileed Baʼuur fi hillit Fatuur jamb bahar al-Furaat fi usut chaʼabah. Hu rassal le yikhabbirah wa yuguul leyah : «Daahu fi chaʼab marago min balad Masir wa min al-katara saddo al-ard marra waahid. Wa jo gaabaloona wa nazalo. 6Wa hassaʼ, taʼaal alʼanhum achaan humman gawiyiin minnina. Wa be da, akuun ana ninnasir fooghum wa natrudhum min al-balad. Achaan ana naʼarif kadar al-naadum al-inta baaraktah yabga mubaarak wa l-laʼantah yabga malʼuun.»
7Wa kubaaraat Muwaab wa kubaaraat Midyaan chaalo maʼaahum bayaad wa macho le Balʼaam. Wa wakit humman wassalo, khabbarooh be kalaam Balaakh. 8Wa Balʼaam gaal leehum : «Al-leele arugdu maʼaayi hini wa ambaakir, ana nikhabbirku be kalaam Allah al-yuguulah leyi.»
Wa khalaas, kubaaraat al-Muwaabiyiin gaʼado maʼa Balʼaam. 9Wa be l-leel, al-Rabb saʼal Balʼaam wa gaal leyah : «Al-rujaal al-maʼaak dool yaatumman ?» 10Wa Balʼaam gaal le l-Rabb : «Balaakh wileed Siffuur malik Muwaab rassalaahum leyi wa gaal : 11‹Daahu fiyah chaʼab katiiriin marra waahid marago min balad Masir. Taʼaal alʼanhum leyi wa be da, akuun ana ninnasir fooghum wa natrudhum.›» 12Wa l-Rabb gaal le Balʼaam : «Inta wa la tamchi maʼaahum wa la talʼan al-chaʼab da achaan al-chaʼab da mubaarak.» 13Wa ambaakir fajur, Balʼaam gamma wa gaal le kubaaraat Balaakh : «Gabbulu baladku. Allah aba ma yikhalliini namchi maʼaaku.»
14Wa kubaaraat Muwaab gabbalo le Balaakh wa gaalo leyah : «Balʼaam aba ma yaji maʼaana.» 15Wa laakin Balaakh battaan rassal kubaaraat aakhariin katiiriin wa muhimmiin min al-awwal. 16Wa l-kubaaraat jo le Balʼaam wa gaalo leyah : «Balaakh wileed Siffuur buguul leek ke : ‹Min fadlak, taʼaal leyi ma taaba. 17Wa ana nicharrifak wa nisawwi leek ayyi cheyy al-tidoorah minni. Min fadlak, taʼaal ! Alʼan leyi al-chaʼab da.›» 18Wa Balʼaam radda le l-naas al-rassalaahum Balaakh wa gaal : «Kan Balaakh yantiini kulla l-fudda wa l-dahab al-fi beetah kula, ana ma nagdar nisawwi leyah cheyy wa la kabiir wa la sakhayyar didd amur Allah Ilaahi. 19Wa hassaʼ da, intu kula al-leele agoodu hini lahaddi ana naʼarif al-cheyy al-yuguulah leyi Allah battaan.»
20Wa be l-leel, al-Rabb hajja le Balʼaam wa gaal leyah : «Kan al-naas dool jo battaan le yinaaduuk, khalaas amchi maʼaahum. Wa laakin sawwi al-cheyy al-ana nuguulah leek bas.» 21Wa ambaakir fajur, Balʼaam gamma chadda humaartah wa macha maʼa kubaaraat Muwaab.
Balʼaam ziʼil wa dagga humaartah
22Wa be da kula, Allah khidib le Balʼaam wakit gamma maachi wa khalaas malak Allah wagaf leyah fi l-derib achaan yadharah. Wa Balʼaam raakib fi humaartah wa maʼaayah itneen min khaddaamiinah. 23Wa wakit al-humaara chaafat malak Allah waagif fi l-derib wa seefah masluul fi iidah, talagat al-derib wa dagachat al-khala. Wa Balʼaam gamma yudugg al-humaara le yijiibha fi l-derib.
24Wa battaan malak Allah macha wagaf fi l-derib fi bakaan chiyya dayyig al-yufuut ambeen daraadir itneen hana jineenaat inab. 25Wa wakit al-humaara chaafat malak Allah, lammat fi l-durdur wa asarat rijil Balʼaam fi l-durdur. Wa hu gamma battaan yuduggaha.
26Wa battaan malak Allah macha giddaam wagaf fi bakaan dayyig marra waahid ma indah faraga al-yufuutu beeha wa la isra wa la zeene. 27Wa wakit al-humaara chaafat malak Allah, ragadat be Balʼaam. Wa hu ziʼil wa gamma yuduggaha be asaatah. 28Wa Allah anta khachum le l-humaara achaan tihajji wa gaalat le Balʼaam : «Ana sawweet leek chunu lahaddi tuduggini talaata marraat ?» 29Wa Balʼaam gaal leeha : «Inti gaaʼide talʼabe beyi wa kan awwal ana indi seef, wakit da ana gataʼt raaski khalaas.» 30Wa l-humaara gaalat le Balʼaam : «Ana ma humaartak al-gaaʼid tarkab foogi min zamaan lahaddi l-yoom ? Wa yoom waahid kula, ana sawweet cheyy misil da walla ?» Wa Balʼaam gaal : «La, abadan.»
31Wa fi l-bakaan da, Allah kachaf le Balʼaam wa hu chaaf malak Allah waagif fi ust al-derib wa seefah masluul fi iidah. Wa tawwaali, Balʼaam dangar fi l-ard wa sajad. 32Wa malak Allah gaal leyah : «Maala daggeet humaartak talaata marraat ? Wa daahu ana jiit le nadharak achaan makhatarak da ma ajabni. 33Al-humaara chaafatni wa talaata marraat hi baarat minni. Wa kan awwal hi ma baarat minni, wakit da ana kataltak khalaas wa khalleetha hi hayye.» 34Wa Balʼaam gaal le malak Allah : «Ana aznabt wa ma irift kadar inta bas gaaʼid fi derbi. Wa kan makhatari da ma ajabaak, ana nigabbil.» 35Wa laakin malak Allah gaal leyah : «Amchi maʼa l-rujaal dool. Wa laakin guul al-kalaam al-ana nuguulah leek bas.» Wa khalaas Balʼaam macha maʼa l-kubaaraat al-rassalaahum Balaakh.
Balaakh laaga Balʼaam
36Wa wakit Balaakh simiʼ kadar Balʼaam jaayi leyah, hu marag laagaah fi madiinat Iir fi huduud Muwaab jamb waadi Arnuun. 37Wa Balaakh gaal le Balʼaam : «Maala ma jiit wakit ana rassalt leek awwal marra wa azamtak ? Inta tahsib ana ma nagdar nantiik charaf walla ?» 38Wa Balʼaam radda leyah wa gaal : «Hassaʼ daahu ana jiit leek ! Wa ana ma nagdar nuguul ayyi cheyy illa l-kalaam al-yuguulah leyi al-Rabb.»
39Wa Balʼaam macha maʼa Balaakh wa dakhalo fi hillit Kharyat Husuut. 40Wa Balaakh gaddam dahaaya hana bagar wa khanam wa anta minhum le Balʼaam wa l-kubaaraat al-jo maʼaayah.
Awwal baraka le Bani Israaʼiil
41Wa ambaakir fajur, Balaakh chaal Balʼaam wa talaʼo fi raas hajar al-binaaduuh Baamoot Baʼal wa min hinaak, humman chaafo nuss min Bani Israaʼiil.
Currently Selected:
Adad 22: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
