Adad 15

Gawaaniin gaddimiin al-hadaaya

1Wa Allah hajja le Muusa wa gaal : 2«Guul le Bani Israaʼiil : ‹Kan dakhaltu fi l-balad al-nantiiha leeku wa sakantu foogha, 3waajib tigaddumu le Allah min bagarku aw khanamku hadiiye muharraga aw dahiiye muharraga aw dahiiye aakhara. Wa da achaan tihaggugu waʼadku aw tigaddumu hadiiye be niiyitku aw wakit tilimmu le l-iid wa hu yarda be riihitha.

4«‹Wa l-yigaddim al-hadiiye di le Allah, yigaddim maʼaaha hadiiye hana dagiig kooro mukhalbat be liitir hana dihin. 5Wa battaan yigaddim liitir hana khamar hadiiyat charaab maʼa ayyi kharuuf dahiiye muharraga aw dahiiye aakhara.

6«‹Wa kan le l-kabich kamaan, yichiil maʼaayah hadiiye hana dagiig koorteen mukhalbat be liitir wa nuss hana dihin. 7Wa yichiil liitir wa nuss hana khamar hadiiyat charaab wa yigaddimha le Allah wa hu yarda be riihitha.

8«‹Wa kan yigaddim le Allah toor dahiiye muharraga aw dahiiye aakhara le yihaggig waʼadah aw le dahiiyat al-salaama, 9yigaddim maʼaayah hadiiye talaata kooro hana dagiig mukhalbat be liitreen hana dihin. 10Wa yichiil liitreen hana khamar hadiiyat charaab wa yigaddimha hadiiye muharraga le Allah wa hu yarda be riihitha.

11«‹Wa yisawwi misil da maʼa ayyi hadiiye hana toor wa kabich wa kharuuf wa anzaay. 12Wa kan al-bahaayim al-yigaddimhum dool katiiriin kula, yisawwi maʼa ayyi waahid misil da. 13Wa kan ayyi muwaatin yigaddim al-hadaaya al-muharragiin le Allah, khalli yisawwi misil da wa Allah yarda be riihithum.

14«‹Wa kan naadum ajnabi gaaʼid maʼaaku mudda tawiile wa yidoor yigaddim hadiiye muharraga le Allah wa hu yarda be riihitha, khalli yisawwi misil intu gaaʼidiin tisawwuuh. 15Wa da yabga leeku chart daayim min zurriiye le zurriiye le intu kulluku wa le l-ajnabi al-gaaʼid maʼaaku kula. Wa tisawwu misil da sawa sawa giddaam Allah. 16Wa da yabga gaanuun waahid wa chart waahid leeku intu wa le l-ajnabi al-gaaʼid maʼaaku.›»

Dahiiye le kaffaarat al-zanib

17Wa Allah hajja le Muusa wa gaal : 18«Hajji le Bani Israaʼiil wa guul leehum : ‹Kan dakhaltu fi l-balad al-niwaddiiku foogha 19wa kan taakulu min khubzitha, gaddumu minha hadiiye le Allah. 20Wa min awwal dagiigku, sawwu khubza wa gaddumuuha leyi hadiiye misil al-hadiiye al-intu tigaddumuuha leyi wakt al-gatiʼ hana ziraaʼitku. 21Wa min zurriiye le zurriiye, gaddumu leyi hadiiye min awwal dagiigku.

22«‹Wa kan intu kulluku bala raayku bas ma tabbagtu waahid min wasaaya Allah al-gaalaahum le Muusa, 23yaʼni kulla l-wasaaya al-amaraaku beehum Allah be waasitat Muusa min awwal yoom wa baʼad da min zurriiye le zurriiye, 24wa kan mujtamaʼ Bani Israaʼiil sawwo zanib bala raayhum wa kulluhum ma irfooh, khalaas kulluhum yigaddumu toor dahiiye muharraga le Allah wa hu yarda be riihitha. Wa yigaddumu hadiiye hana dagiig wa hadiiyat charaab misil fi l-gaanuun wa tees dahiiye le kaffaarat al-zanib. 25Wa raajil al-diin yisawwi kaffaara le zunuub kulla mujtamaʼ Bani Israaʼiil wa humman yalgo al-khufraan. Achaan al-zanib da sawwooh bala raayhum wa humman jaabo dahiiye muharraga le Allah wa gaddamo dahiiye le kaffaarat al-zanib. 26Wa l-khufraan da le kulla mujtamaʼ Bani Israaʼiil wa le l-ajnabi al-saakin maʼaahum achaan al-zanib al-sawwooh bala raayhum da bukhuss kulla l-chaʼab.

27«‹Wa kan al-zanib da sawwaah naadum waahid bas, hu yigaddim anzaay bitt sana dahiiye le kaffaarat al-zanib. 28Wa raajil al-diin yisawwi kaffaara le l-zanib hana l-naadum al-sawwaah bala raayah giddaam Allah. Wa wakit raajil al-diin yisawwi kaffaara, al-naadum da yalga al-khufraan. 29Kan al-naadum min Bani Israaʼiil aw kan naadum ajnabi saakin maʼaahum kula, al-gaanuun hana l-zanib al-yisawwuuh bala raayhum da waahid bas.

30«‹Wa kan naadum min Bani Israaʼiil aw ajnabi gaaʼid maʼaahum kula kan sawwa zanib be niiytah, al-naadum da sawwa jariime didd Allah. Wa be sabab da, waajib yafsuluuh min ahalah. 31Achaan hu aba kalaam Allah wa khaalaf wasiiyaatah. Wa be da, waajib yafsuluuh wa yilhammal ikhaabah.›»

Al-rajim lahaddi l-moot

32Wa yoom waahid fi l-sahara, Bani Israaʼiil ligo naadum waahid gaaʼid yilaggit hatab fi yoom al-sabt. 33Wa humman karabooh le l-naadum da wa waddooh giddaam Muusa wa Haaruun wa kulla mujtamaʼ Bani Israaʼiil. 34Al-naadum da khattooh fi l-sijin achaan fi l-wakit daak, gaanuun al-yihaakumuuh beyah ke ma fiih. 35Wa khalaas baʼad da, Allah gaal le Muusa : «Khalli kulla mujtamaʼ Bani Israaʼiil yilimmu barra min al-fariig wa yarjumu al-naadum da lahaddi l-moot.» 36Wa khalaas, kulla l-mujtamaʼ waddooh le l-naadum da barra min al-fariig wa rajamooh lahaddi maat. Wa da misil Allah amar beyah Muusa.

Al-chanchali al-beyah yizzakkaro

37Wa battaan Allah gaal le Muusa : 38«Hajji le Bani Israaʼiil wa guul leehum : ‹Min zurriiye le zurriiye tisawwu chanchali fi daayir khulgaanku wa khayyutuuh be kheet zahri. 39Wa wakit tichiifu al-chanchali da, tizzakkaro kulla wasaaya Allah wa titabbuguuhum. Wa be da, ma titaabuʼu chahwaat guluubku wa uyuunku al-yiwadduuku fi l-isyaan. 40Wa misil da, tizzakkaro kulla wasiiyaatah wa titabbuguuhum wa tukuunu ummat Allah al-saalhe. 41Wa taʼarfu ana bas Allah Ilaahku al-maragtuku min balad Masir le nabga Ilaahku. Wa ana bas Allah Ilaahku.›»

Currently Selected:

Adad 15: ADT19

Highlight

Copy

Compare