Adad 13
13
Muusa rassal naas yuruukhu al-balad
1Wa Allah hajja le Muusa wa gaal : 2«Rassil naas le yuruukhu leek balad Kanʼaan al-ana nantiiha le Bani Israaʼiil. Chiil min ayyi gabiila naadum aagil le yimassil gabiilat abbahaatah wa rassilhum.» 3Wa khalaas Muusa rassalaahum min kadaadit Faaraan hasab kalaam Allah. Wa l-rujaal dool kulluhum min kubaaraat Bani Israaʼiil. 4Wa dool asaameehum.
Min gabiilat Raʼuubiin, Chammuuʼ wileed Zakkuur.
5Wa min gabiilat Chimʼuun, Chaafaat wileed Huuri.
6Wa min gabiilat Yahuuza, Kaalib wileed Yafuuna.
7Wa min gabiilat Yassaakar, Yigaal wileed Yuusuf.
8Wa min gabiilat Afraayim, Huuchaʼ wileed Nuun.
9Wa min gabiilat Banyaamiin, Falti wileed Raafu.
10Wa min gabiilat Zabuluun, Gaddiyiil wileed Suudi.
11Wa min gabiilat Yuusuf wa da min gabiilat Manassa, Gaddi wileed Suusi.
12Wa min gabiilat Daan, Amiyiil wileed Gamaali.
13Wa min gabiilat Achiir, Satuur wileed Mikaayiil.
14Wa min gabiilat Naftaali, Nahbi wileed Wafsi.
15Wa min gabiilat Gaad, Gawiil wileed Maaki.
16Wa dool asaame al-naas al-rassalaahum Muusa le yuruukhu balad Kanʼaan. Wa Muusa samma Huuchaʼ wileed Nuun be usum Yachuuʼ.
17Wa Muusa rassalaahum le yuruukhu balad Kanʼaan wa gaal leehum : «Amurgu min hini. Addu be saharat al-Nagab wa amchu giddaam ale l-jibaal. 18Wa chiifu kikkeef al-balad di wa akkudu min naasha kan gawiyiin walla daʼiifiin wa kan katiiriin walla chiyya. 19Wa battaan akkudu adiil kan al-balad di zeene walla fasle wa akkudu min buyuutha kan khiyam saakit walla mudun gawiyiin. 20Wa chiifu kan ard al-balad di tigawwim maʼaach walla la wa kan indaha chadar walla ma indaha. Wa ma takhaafo, jiibu maʼaaku chiyya min fawaakihha.»
Wa da, wakit awwal intaaj al-inab. 21Wa khalaas macho raakho kulla l-balad min saharat Siin lahaddi Rahuub gariib le Labu Hamaat. 22Wa humman macho be saharat Nagab lahaddi wassalo hillit Hibruun, bakaan al-aaychiin foogah khuchuum buyuut Akhimaan wa Chiichaay wa Talmaay min zurriiyit Bani Anakh. Wa hillit Hibruun di banooha be sabʼa sana gubbaal hillit Suʼaan al-gaaʼide fi Masir. 23Wa humman wassalo fi waadi Achkuul wa hinaak gataʼo firiʼ al-indah anguud hana inab wa daraʼooh fi uud wa chaalooh ambeenaathum fi kataafeehum. Wa chaalo rummaan wa tiin. 24Wa l-bakaan da, sammooh waadi Achkuul (maʼanaatah waadi al-anguud) achaan Bani Israaʼiil gataʼo minnah anguud al-inab.
Al-rawwaakhiin khabbaro be l-balad
25Wa humman raakho al-balad fi muddit 40 yoom wa gabbalo. 26Wa jo ligo Muusa wa Haaruun wa kulla mujtamaʼ Bani Israaʼiil fi Khaadich al-gaaʼide fi kadaadit Faaraan. Wa kallamo leehum wa le kulla Bani Israaʼiil be khabar al-balad di wa wassafo leehum al-fawaakih al-jaaboohum minha. 27Wa humman gaalo le Muusa : «Aniina macheena fi l-balad al-inta rassaltina leeha wa sahiih al-balad di samhe wa malaane be l-laban wa l-asal wa daahu fawaakihha. 28Wa laakin naasha chudaad wa mudunhum kubaar wa gawiyiin wa chifna naas kubaar min zurriiyit Bani Anakh. 29Wa l-Amaalikh saakniin fi saharat Nagab wa l-Hittiyiin wa l-Yabuusiyiin wa l-Amuuriyiin saakniin fi balad al-jibaal. Wa l-Kanʼaaniyiin saakniin jamb al-bahar al-Abyad wa fi khachum bahar al-Urdun.»
30Wa Kaalib sakkat al-naas al-gammo didd Muusa wa gaal : «Gummu namchu nichiilu al-balad achaan aniina nagdaro ninnasru fooghum !» 31Wa laakin al-rujaal al-raakho maʼaayah al-balad gaalo : «Ma nagdaro namchu nahjumu al-naas dool achaan humman gawiyiin minnina.»
32Wa khalaas, gammo ayyaro le Bani Israaʼiil al-balad al-humman macho raakhooha wa chaafooha. Wa gaalo : «Al-balad al-rukhnaaha wa chifnaaha di ma adiile. Hi tikattil siyaadha wa kulla l-naas al-ligiinaahum hinaak foogha kula naas kubaar. 33Wa aniina chifna naas min zurriiyit Bani Anakh wa humman naas tuwaal wa chudaad. Wa jambuhum aniina nichiifu nufuusna misil angurraasa. Wa humman kula yichiifuuna misil da.»
Currently Selected:
Adad 13: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
