Adad 10
10
Burunji al-fudda
1Wa Allah hajja le Muusa wa gaal : 2«Sawwi leek burunji itneen madguugiin min fudda le tinaadi beehum mujtamaʼ Bani Israaʼiil wakit yilimmu aw wakit yisiiru hasab muʼaskaraathum. 3Wakit yasmaʼo daribiin al-burunji al-itneen, kulla mujtamaʼ Bani Israaʼiil yilimmu giddaamak fi madkhal kheemat al-ijtimaaʼ. 4Wa laakin wakit yasmaʼo daribiin al-burunji al-waahid, al-chuyuukh wa l-kubaaraat hana khuchuum buyuut Bani Israaʼiil bas yilimmu giddaamak. 5Wa kan tadurbu al-burunji iddat marraat, khalaas al-muʼaskar al-naazil sabaah yugumm yisiir. 6Wa kan tadurbu al-burunji iddat marraat darbe taaniye, al-muʼaskar al-naazil wati yugumm yisiir. Wa daribiin al-burunji iddat marraat da yiwassif al-masaar. 7Wa laakin wakit tinaadu mujtamaʼ al-chaʼab le yilimmu, adurbu al-burunji marra waahide bas. 8Wa l-burunji al-itneen dool yadurbuuhum rujaal al-diin min zurriiyit Haaruun. Wa da yabga leeku chart daayim min zurriiye le zurriiye.
9«Wa wakit tamchu le l-harib didd udwaanku al-gaaʼidiin yahjumuuku fi baladku, adurbu al-burunji al-itneen iddat marraat. Wa be da, ana Allah Ilaahku nifakkir foogku wa ninajjiiku min udwaanku. 10Adurbu al-burunji fi farahku wa iidku wa fi l-yoom al-awwal hana kulli chahar. Wa adurbu al-burunji wakit tigaddumu dahaaya muharragiin wa dahaaya al-salaama. Wa be da, ana Ilaahku nifakkir foogku. Wa ana Allah Ilaahku.»
Bani Israaʼiil saaro min saharat Siinaaʼ
11Wa fi yoom 20 hana l-chahar al-taani fi l-sana al-taaniye baʼad Bani Israaʼiil marago min balad Masir, al-sahaabaay gammat min kheemat al-ibaada al-foogha al-sanduug al-indah liihaan al-muʼaahada wa machat. 12Wa Bani Israaʼiil kula khalaas saaro min saharat Siinaaʼ lahaddi bakaan al-sahaabaay nazalat foogah fi kadaadit Faaraan. 13Wa da awwal masaar al-amaraahum beyah Allah be waasitat Muusa.
14Wa l-maachi awwal, muʼaskar Yahuuza tihit raaytah hasab majmuuʼtah al-askariiye. Wa khaaydah Nahchuun wileed Aminadaab. 15Wa maʼaayah gabiilat Yassaakar wa khaayidha Nataniil wileed Suuʼar. 16Wa maʼaayah battaan gabiilat Zabuluun wa khaayidha Aliyaab wileed Hiiluun.
17Wa baʼad da, fartago kheemat al-ibaada. Wa zurriiyit Girchuun wa zurriiyit Maraari chaalooha wa saaro beeha.
18Wa baʼad al-kheema, muʼaskar Raʼuubiin saar tihit raaytah hasab majmuuʼtah al-askariiye. Wa khaaydah Alisuur wileed Chadayuur. 19Wa maʼaayah gabiilat Chimʼuun wa khaayidha Chalumiyiil wileed Surichadaay. 20Wa maʼaayah battaan gabiilat Gaad wa khaayidha Aliyaasaf wileed Daʼuwiil.
21Wa baʼad da, zurriiyit Gahaat saaro chaayliin al-muʼiddaat al-mukhaddasiin. Wa gabul zurriiyit Gahaat ma yiwassulu, al-Laawiyiin al-aakhariin yabnu kheemat al-ibaada wa yijahhuzuuha leehum.
22Wa baʼad da, muʼaskar Afraayim saar tihit raaytah hasab majmuuʼtah al-askariiye. Wa khaaydah Alichamaʼ wileed Amihuud. 23Wa maʼaayah gabiilat Manassa wa khaayidha Gamaliyiil wileed Fadahsuur. 24Wa maʼaayah battaan gabiilat Banyaamiin wa khaayidha Abidaan wileed Gidʼuuni.
25Wa fi l-akhiir, muʼaskar Daan hu macha wara kulla l-muʼaskaraat le yahfadoohum min wara. Wa hu saar tihit raaytah hasab majmuuʼtah al-askariiye. Wa khaaydah Akhiʼaazar wileed Amichadaay. 26Wa maʼaayah gabiilat Achiir wa khaayidha Fagʼiyiil wileed Ukran. 27Wa maʼaayah battaan gabiilat Naftaali wa khaayidha Akhiiraʼ wileed Inaan.
28Wa da bas al-nizaam al-saayriin beyah Bani Israaʼiil. Humman saayriin hasab majmuuʼaathum al-askariiye.
29Wa Muusa gaal le Hubaab wileed nasiibah Raʼuwiil al-Midyaani : «Aniina saayriin le l-bakaan al-Allah gaal yantiih leena. Taʼaal namchu sawa wa nisawwu leek al-kheer achaan Allah gaal yisawwi le Bani Israaʼiil al-kheer.» 30Wa hu gaal : «La ! Ana ma namchi maʼaaku. Ana namchi le baladi wa ahali.» 31Wa Muusa gaal leyah : «La ! Ma tikhalliina wiheedna achaan inta taʼarif al-bakaan al-adiil fi l-kadaade al-aniina nanzulu foogha. Taʼaal abga leena giid. 32Wa kan macheet maʼaana nantuuk min al-kheer al-Allah yantiina.»
33Wa gammo min jabal Allah wa macho masaafit talaata yoom. Wa sanduug muʼaahadat Allah waddooh giddaamhum achaan yaʼarfu al-bakaan al-yanzulu foogah. 34Wa sahaabaayit Allah mukhattiyeehum be nahaar wakit yisiiru min fariighum.
35Wa wakit sanduug muʼaahadat Allah yugumm le l-masaar, Muusa yuguul : «Gumm, ya Allah ! Udwaanak yichittu wa khusmaanak yajru giddaamak !» 36Wa wakit al-sanduug yanzil, Muusa yuguul : «Gabbil, ya Allah, le chaʼabak Bani Israaʼiil al-adadhum katiiriin.»
Currently Selected:
Adad 10: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
