Matta 28
28
Buʼaas al-Masiih
1Awwal yoom fi subuuʼ wakit yoom al-sabt kammal, Mariyam al-Magdaliiye wa Mariyam al-aakhara lamman. Wa gubbaal al-harraay ma tatlaʼ hinna machan achaan yichiifan al-khabur. 2Wa waahid min malaaʼikat Allah nazal min al-sama wa l-ard anhazzat wa bigi zilzaal chadiid. Wa ja le l-khabur wa dardag al-hajar al-kabiir min khachum al-khabur wa gaʼad foogah. 3Wa l-malak yiraari misil barraaga wa khalagah abyad karr. 4Wa wakit al-askar al-gaaʼidiin yaharsu al-khabur chaafooh, khoof chadiid karabaahum wa wagaʼo misil maytiin.
5Wa l-malak kallam le l-awiin wa gaal : «Ma takhaafan. Ana naʼarif intan tifattichan Isa al-katalooh fi l-saliib. 6Hu ma fiih hini. Hu baʼas khalaas. Da bigi misil hu awwal gaalah leekan. Taʼaalan, chiifan al-bakaan al-awwal hu raagid foogah. 7Wa yalla ! Amchan ajala ! Wa guulan le talaamiizah kadar hu baʼas min ust al-maytiin wa yamchi giddaamku fi daar al-Jaliil wa hinaak tichiifuuh. Daahu ! Ana ooreetkan.»
8Wa l-awiin khaayfaat marra waahid wa laakin farhaanaat bilheen wa jaran min al-khabur le l-talaamiiz achaan yiballikhan leehum al-bichaara. 9Wakit maachaat achaan yikhabbiran al-talaamiiz, Isa zaatah laagaahin wa gaal leehin : «Al-salaam aleekan.» Al-awiin garraban leyah wa karaban rijileenah wa sajadan leyah. 10Wa Isa gaal leehin : «Ma takhaafan. Amchan guulan le akhwaani waajib yamchu fi daar al-Jaliil achaan hinaak yichiifuuni.»
Kidib al-kubaaraat wa l-askar
11Wakit al-awiin maachaat fi l-derib, waahidiin min al-askar macho fi l-madiina wa lammo maʼa kubaaraat rujaal al-diin wa ooroohum be kulla cheyy al-bigi. 12Wa kubaaraat rujaal al-diin wa l-chuyuukh lammo wa achchaawaro ambeenaathum fi l-kalaam da. Wa anto gurus katiir le l-askar dool 13wa gaalo leehum : «Waajib tuguulu : ‹Talaamiiz Isa jo fi l-leel wa sirgo janaaztah wakit aniina naaymiin.› 14Wa kan al-waali simiʼ be l-kalaam da, aniina nihaamu leeku wa ma talgo ayyi muchkila.» 15Wa l-askar chaalo al-gurus wa sawwo misil al-kubaaraat gaalooh leehum. Wa min al-wakit daak lahaddi l-yoom, katiiriin min al-Yahuud gaaʼidiin yikhabburu be kalaamhum da.
Al-Masiih rassal talaamiizah
16Wa l-talaamiiz al-ihdaachar macho fi daar al-Jaliil fi l-hajar al-Isa wassafah leehum. 17Wa wakit chaafo Isa, sajado leyah laakin waahidiin chakkako. 18Wa Isa ja wa hajja leehum wa gaal : «Allah antaani kulla l-sulta fi l-sama wa fi l-ard. 19Achaan da, amchu naadu naas hana kulla l-umam achaan yabgo talaamiizi wa khattusuuhum fi almi be usum Allah al-Abu wa Ibnah al-Masiih wa l-Ruuh al-Khudduus. 20Wa allumuuhum achaan yisawwu kulla cheyy al-ana wasseetku beyah. Wa khalaas ana gaaʼid maʼaaku kulla yoom lahaddi kumaalit al-dunya.»
Currently Selected:
Matta 28: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.