Laawiyiin 21
21
Gawaaniin rujaal al-diin
1Wa Allah gaal le Muusa : Hajji le rujaal al-diin min zurriiyit Haaruun wa guul leehum kadar ma waajib le raajil diin yinnajjas be sabab janaaza hana waahid min chaʼabah, 2illa kan al-mayyit da min ahalah al-gariib leyah misil ammah walla abuuh walla wileedah walla bittah walla akhuuh. 3Wa akhtah al-lissaaʼha bineeye udriiye al-ma akhadat raajil wa gaaʼide maʼaayah, di kula hu yagdar yinnajjas be sababha. 4Wa raajil al-diin hu kabiir fi chaʼabah, ma waajib yinnajjas lahaddi yabga ma mukhassas battaan.
5Wa ma waajib le rujaal al-diin yagtaʼo chaʼarhum mudawwar wa la yagtaʼo chawaarib duguunhum wa la yijarruhu jisimhum be sabab al-hizin. 6Wa waajib yabgo mukhassasiin le Allah Ilaahhum wa yihtarumu usmah. Achaan humman bas al-gaaʼidiin yigaddumu al-dahiiye al-muharraga le Allah Ilaahhum misil akil. Wa humman yabgo khaassiin.
7Wa ma yaakhudu mara charmuuta aw aaybe aw mutallaga achaan raajil al-diin hu khaass le Ilaahah. 8Wa intu waajib tihtarumu raajil al-diin achaan hu bas al-gaaʼid yigaddim hadaaya hana khubza misil akil le Ilaahku. Wa hu khaass leeku achaan ana Allah al-Khudduus bas nikhassisku.
9Wa kan bitt raajil diin tiwaddir charafha be sabab al-zina, hi tiwaddir charaf abuuha kula wa waajib yiharruguuha be naar.
10Wa kan le raajil al-diin al-kabiir min akhwaanah al-sabbo fi raasah dihin al-masahaan wa darrajooh wa labbasooh khulgaan khaassiin, khalli ma yakchif raasah wa ma yicharrit khulgaanah 11wa ma yigarrib le ayyi janaaza hatta kan hint abuuh walla ammah le yinnajjas. 12Wa ma yamrug min al-beet al-mukhaddas wa ma yisawwi gillit al-ihtiraam fi l-beet al-mukhaddas hana Ilaahah. Achaan hu mukhassas be dihin al-masahaan. Ana bas Allah. 13Wa waajib yaakhud bitt udriiye. 14Wa ma yaakhud mara armala wa la mara mutallaga wa la mara charmuuta. Laakin yaakhud bineeye udriiye min chaʼabah. 15Wa be misil da, yijiib zurriiye mukhassasa fi lubb chaʼabah. Achaan ana Allah bas nikhassisah.
16Wa Allah hajja le Muusa wa gaal : 17Guul le Haaruun kadar min zurriiye le zurriiye kan fi naadum min zurriiytah mukhalgan, ma yagdar yigarrib wa yigaddim khubza le Ilaahah. 18Wa ma waajib le ayyi raajil diin mukhalgan yigarrib le yisawwi al-khidme kan hu amyaan aw aʼraj aw munkharah ooja aw adaanah magtuuʼa 19aw rijlah aw iidah maksuura 20aw musardab aw rigeeyig aw indah bayaadaay fi eenah aw jarab aw guub aw khasi. 21Wa ayyi raajil diin al-min zurriiyit Haaruun mukhalgan ma waajib yagdar yigarrib wa yigaddim dahiiye muharraga le Allah achaan hu mukhalgan. Wa be da, hu ma yagdar yigarrib wa yigaddim khubza le Ilaahah. 22Hu yagdar yaakul min al-akil al-gaddamooh hadiiye le Ilaahah wa min al-achya al-mukhaddasiin marra waahid wa l-achya al-mukhaddasiin. 23Wa laakin waajib ma yigarrib le l-sitaar wa la le l-madbah achaan hu mukhalgan. Wa ma yisawwi gillit ihtiraam fi beeti al-mukhaddas wa kulla cheyy al-fi lubbah. Achaan ana Allah bas khaddastuhum.
24Wa Muusa hajja be kulla l-kalaam da le Haaruun wa awlaadah wa le kulla Bani Israaʼiil.
Currently Selected:
Laawiyiin 21: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
