Yuuhanna 9
9
Al-naadum al-mawluud amyaan
1Wa yoom waahid, Isa gaaʼid yuruukh wa chaaf naadum waahid mawluud amyaan. 2Wa talaamiizah saʼalooh wa gaalo : «Sayyidna, al-naadum da wildooh amyaan be sabab zunuub yaatu ? Be sabab zunuubah hu walla zunuub waaldeenah ?» 3Wa Isa radda leehum wa gaal : «Hu amyaan ma be sabab zunuubah wa la zunuub waaldeenah. Hu bigi misil da achaan amal Allah yibiin foogah. 4Wakit al-wata lissaaʼ nahaar, waajib nisawwu al-amal hana Allah al-rassalaani. Al-leel yaji wa be l-leel, ma fi naadum yagdar yakhdim. 5Wakit ana gaaʼid fi l-aalam, ana nuur al-aalam.»
6Wa wakit Isa gaal al-kalaam da, hu bazzakh fi l-turaab wa ajjan tiine be buzaakhah wa masahha fi uyuun al-amyaan. 7Wa gaal leyah : «Amchi khassil wijhak fi birkit Silwaam.» Wa khalaas, al-amyaan macha wa khassal wijhah wa gabbal yichiif. Wa l-usum Silwaam maʼanaatah al-mursaal.
8Wa jiiraanah wa l-naas al-chaafooh wakit hu lissaaʼ gaaʼid yasʼal sadakha, assaaʼalo ambeenaathum wa gaalo : «Da ma al-naadum al-awwal gaaʼid fi l-chaariʼ yasʼal sadakha walla ?» 9Wa naas waahidiin gaalo : «Aywa, da hu.» Wa naas aakhariin gaalo : «La, da ma hu. Da naadum aakhar yichaabihah bas.» Wa l-naadum zaatah gaal : «Ana bas hu !» 10Wa saʼalooh wa gaalo : «Kan sahiih inta hu, kikkeef uyuunak anfataho ?» 11Wa radda leehum wa gaal : «Al-raajil al-usmah Isa ajjan tiine wa masahha fi uyuuni wa gaal leyi : ‹Amchi le Silwaam wa khassil wijhak.› Ana macheet wa khassalt wa khalaas gaaʼid nichiif !» 12Wa saʼalooh wa gaalo : «Ween al-naadum da ?» Wa gaal leehum : «Da ma naʼarfah.»
13Wa waddo al-amyaan al-fatahooh le l-Fariiziyiin. 14Wa l-yoom al-Isa ajjan foogah al-tiine wa fattah uyuun al-amyaan da yoom al-sabt. 15Achaan da, al-Fariiziyiin kula saʼalooh wa gaalo : «Uyuunak anfataho kikkeef ?» Wa radda leehum wa gaal : «Hu massah uyuuni be l-tiine wa ana khassalt wijhi wa khalaas ana chift.» 16Wa Fariiziyiin waahidiin gammo yuguulu : «Al-naadum al-sawwa al-cheyy da, hu ma min Allah achaan hu ma yitaabiʼ churuut hana yoom al-sabt.» Laakin waahidiin gaalo : «Naadum kan muznib, kikkeef yisawwi ajaayib misil da ?» Wa be misil da, al-Fariiziyiin ankhalafo.
17Wa battaan, saʼalo al-amyaan wa gaalo : «Al-naadum al-fatah leek uyuunak da, inta tuguul foogah chunu ?» Wa l-amyaan radda leehum wa gaal : «Hu nabi.»
18Wa l-Yahuud ma saddago kadar hu awwal amyaan wa hassaʼ gaaʼid yichiif, lahaddi naado waaldeenah. 19Wa saʼalo waaldeenah wa gaalo : «Sahiih, da wileedku ? Wa awwal mawluud amyaan walla ? Wa kan da sahiih, kikkeef hassaʼ yichiif ?» 20Wa waaldeenah raddo leehum wa gaalo : «Naʼarfu da wileedna wa naʼarfu hu mawluud amyaan. 21Laakin kikkeef hu yichiif wa yaatu al-fattah leyah uyuunah, da ma naʼarfuuh. Hu raajil aagil. Asʼalooh, hu yihajji be nafsah !» 22Wa waaldeenah hajjo misil da achaan humman khaayfiin min kubaaraat al-Yahuud. Wa l-kubaaraat awwal astafago ambeenaathum le yaturdu min beet al-sala ayyi naadum al-yuguul Isa hu al-Masiih. 23Wa achaan da, waaldeenah gaalo : «Hu raajil aagil. Asʼalooh hu.»
24Wa marra taaniye, naado al-amyaan al-fatahooh wa gaalo : «Ahlif be Allah ! Aniina naʼarfu kadar al-naadum da muznib.» 25Wa radda leehum wa gaal : «Kan hu muznib walla ma muznib, da ma naʼarfah. Cheyy waahid bas naʼarfah. Awwal ana amyaan wa hassaʼ ana gaaʼid nichiif !» 26Wa saʼalooh wa gaalo : «Hu sawwa leek chunu ? Fatah uyuunak kikkeef ?» 27Wa radda leehum wa gaal : «Awwal ana ooreetku, laakin intu ma dawwartu tasmaʼo kalaami. Maala tidooru niʼooriiku marra taaniye ? Intu kula tidooru tabgo talaamiizah walla ?»
28Wa gammo ayyarooh wa gaalo : «Inta bas tilmiizah ! Aniina talaamiiz Muusa ! 29Naʼarfu Allah kallam le Muusa wa laakin al-naadum da, ma naʼarfu hu min ween.» 30Wa l-raajil radda leehum wa gaal : «Kalaamku ajiib ! Hu fatah leyi uyuuni wa laakin intu ma taʼarfu min ween hu jaayi. 31Kullina naʼarfu Allah ma yasmaʼ duʼa hana l-muznibiin. Allah yasmaʼ duʼa hana l-naadum al-saalih al-gaaʼid yisawwi al-cheyy al-hu yidoorah. 32Min bidaayit al-dunya, abadan ma simiʼna be ayyi naadum al-fatah uyuun hana naadum mawluud amyaan. 33Kan al-naadum da ma jaay min Allah, hu ma yagdar yisawwi cheyy.» 34Wa raddo leyah wa gaalo : «Inta wildook wa rabbook fi zunuub. Ma tagdar tiʼallimna cheyy !» Wa khalaas, taradooh min beet al-sala.
35Wa wakit Isa simiʼ al-naadum al-awwal amyaan taradooh, hu macha ligiih. Wa gaal leyah : «Inta muʼmin be Ibn al-Insaan walla ?» 36Wa l-naadum gaal : «Ya l-sayyid, hu yaatu ? Ooriini achaan niʼaamin beyah.» 37Wa Isa gaal leyah : «Inta chiftah wa hu al-naadum al-gaaʼid yihajji leek.» 38Wa l-naadum gaal : «Ya Rabb, ana muʼmin beek.» Wa sajad leyah. 39Wa Isa gaal : «Ana jiit fi l-dunya le nijiib al-hisaab achaan al-naas al-amyaaniin yichiifu wa l-naas al-yichiifu yabgo amyaaniin.»
40Wa waahidiin min al-Fariiziyiin gaaʼidiin maʼaayah wa simʼo al-kalaam da wa gaalo : «Tuguul aniina amyaaniin walla ?» 41Wa Isa radda leehum wa gaal : «Kan sahiih intu amyaaniin, intu ma khaatiyiin. Laakin gultu : ‹Intu tichiifu›, wa achaan da al-khata yagood foogku.»
Currently Selected:
Yuuhanna 9: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.