Gudiya 19
19
Naas Banyaamiin sawwo fiʼil cheen
1Wa fi l-wakit da, ma fi malik fi Israaʼiil. Wa fiyah raajil waahid Laawi saakin fi jibaal Afraayim wa akhad leyah mara sirriiye min Beet Laham fi turaab Yahuuza. 2Wa l-sirriiye di alkhabbanat minnah wa machat beet abuuha fi Beet Laham fi turaab Yahuuza wa gaʼadat hinaak le muddit arbaʼa chahar. 3Wa l-raajil macha waraaha achaan yiraddiiha wa yijiibha. Wa hu chaal maʼaayah khaddaamah wa hamiir itneen. Wa l-sirriiye di faddalat raajilha fi beet abuuha wa wakit abuuha chaafah, gamma laagaah be farah. 4Wa abu al-mara di dayyaf nasiibah wa fi muddit talaata yoom, al-Laawi wa khaddaamah yaakulu wa yacharbo wa yunuumu fi l-bakaan da.
5Wa fi l-yoom al-raabiʼ, al-Laawi gamma be fajur badri wa jahhaz khumaamah le l-safar. Wa abu martah gaal leyah : «Agiif, aakul leek akil chiyya wa baʼad da, amchu.» 6Khalaas, humman al-itneen gaʼado wa akalo wa chirbo sawa. Wa abu al-mara gaal le nasiibah : «Min fadlak, khassid al-leele kula, nuum maʼaana wa anjamma.» 7Al-Laawi gamma yidoor yamchi wa laakin fi chaan talab nasiibah, hu naam al-leele di. 8Wa fi l-yoom al-khaamis, al-Laawi gamma be fajur badri le yisaafir. Wa laakin abu martah gaal leyah : «Min fadlak, anjamma wa akhkhir safarak da lahaddi baʼad al-duhur.» Wa humman al-itneen akalo sawa. 9Wa baʼad da, al-raajil gamma yidoor yamchi hu wa sirriiytah wa khaddaamah. Wa laakin abu martah gaal leyah : «Ana nichiif al-wata di bigat achiiye wa l-harraay kula gariib tagaʼ, khalaas al-leele di kula nuum hini wa anjamma. Wa ambaakir fajur kamaan, saafuru gabbulu beetku.» 10Wa laakin fi l-marra di, al-Laawi aba ma yunuum. Wa gamma macha maʼa hamiirah al-itneen machduudiin wa sirriiytah lahaddi wassal mugaabil Yabuus yaʼni Uruchaliim.
11Wa wakit wassalo gariib le Yabuus, al-makhrib garrabat. Wa l-khaddaam gaal le siidah : «Khalli nidallu fi madiinat al-Yabuusiyiin di wa nunuumu foogha.» 12Wa siidah gaal leyah : «Ma nidallu fi madiina ajnabiiye al-sukkaanha ma min Bani Israaʼiil. Khalli namchu giddaam lahaddi Gibeeʼa.» 13Wa gaal battaan le khaddaamah : «Yalla namchu ale hillaal Gibeeʼa aw al-Raama wa nunuumu fi waahide minhum.» 14Wa macho giddaam wa fi wakit al-makhrib, wassalo gariib le hillit Gibeeʼa fi turaab Banyaamiin. 15Wa dallo fi Gibeeʼa le yunuumu foogha. Wa dakhalo al-hille wa gaʼado fi nagaʼa fi usutha wa laakin naadum waahid kula ma faddalaahum fi beetah le yunuumu maʼaayah.
16Wa khalaas, humman chaafo chaayib waahid jaayi min al-ziraaʼa be makhrib. Wa l-chaayib da min jibaal Afraayim wa aayich fi Gibeeʼa fi turaab Banyaamiin. 17Wa wakit al-chaayib rafaʼ raasah, chaaf al-raajil al-musaafir fi nagaʼat al-hille wa gaal : «Jaayi min ween wa maachi ween ?» 18Wa hu radda leyah wa gaal : «Aniina jaayiin min Beet Laham fi turaab Yahuuza wa maachiin lahaddi lubb jibaal Afraayim achaan ana naskun hinaak. Ana macheet Beet Laham wa hassaʼ, mugabbil le beet Allah fi bakaani. Wa laakin naadum faddalaani fi beetah ke ma fiih. 19Indina gechch wa alfa le hamiirna wa khubza wa khamar leyi ana wa sirriiyti wa l-khaddaam al-maʼaana. Wa cheyy gassar leena ke ma fiih.» 20Wa l-chaayib radda leyah wa gaal : «Al-salaam aleekum ! Akiid kulla cheyy al-tidoorah ana nichiil masʼuuliiytah wa laakin ma tunuum fi l-nagaʼa di.» 21Wa hu waddaahum beetah wa anta al-hamiir alfa. Wa l-diifaan khassalo rijleehum wa akalo wa chirbo.
22Wa wakit humman gaaʼidiin yinjammo, tawwaali rujaal waahidiin ma naafʼiin min al-hille jo hawwago al-beet. Wa taggo al-baab be chidde wa gaalo le l-chaayib siid al-beet : «Amrug leena al-naadum al-dakhal fi beetak da achaan narugdu maʼaayah.» 23Wa siid al-beet marag wa gaal leehum : «La, ya akhwaani, ma tisawwu al-fasil da ! Al-raajil da deef fi beeti wa khalaas ma tisawwu leyah al-fiʼil al-cheen da ! 24Wa di hi bineeyti udriiye wa sirriiyit al-raajil da. Namrughin leeku le tisawwu fooghin kulla cheyy al-tidooruuh. Wa laakin le l-raajil da, ma tisawwu leyah fiʼil cheen misil da.»
25Wa l-rujaal dool abo ma yasmaʼo kalaam al-chaayib. Wa khalaas, al-Laawi karab sirriiytah wa maragaaha leehum barra. Wa humman chaalooha wa ragado maʼaaha be gu tuul al-leel lahaddi fajur. Wa gariib sabaah bas, humman khallooha.
26Wa fi l-wakit da, al-mara jaat wagaʼat fi khachum baab al-chaayib al-raajilha gaaʼid fi bakaanah wa ragadat fi bakaanha da lahaddi al-harraay talaʼat. 27Wa be fajur badri, wakit raajilha fatah al-baab le yisaafir, hu ligi sirriiytah waagʼe fi khachum al-baab be iideenha fi l-ataba. 28Wa hu gaal leeha : «Yalla gummi namchu.» Wa laakin hi ma raddat leyah. Khalaas, hu chadda janaazitha fi l-humaar wa macha lahaddi wassal bakaanah. 29Wakit wassal beetah, chaal sakkiin wa gattaʼ janaazit sirriiytah ale 12 koom wa rassalhum le ayyi gabiila fi balad Israaʼiil. 30Wa l-Laawi gaal le murassaliinah : «Guulu le kulla Bani Israaʼiil : ‹Min maragna min balad Masir lahaddi l-yoom, hal cheyy misil da bigi walla ? Fakkuru wa achchaawaro ambeenaatku wa kallumu be raayku !›» Wa ayyi naadum al-chaaf al-cheyy da gaal : «Min Bani Israaʼiil marago min balad Masir lahaddi l-yoom da, cheyy misil da ma bigi.»
Currently Selected:
Gudiya 19: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
