Gudiya 16

Chamchuun wa biibaan Khazza

1Yoom waahid, Chamchuun macha madiinat Khazza wa hinaak hu chaaf mara charmuuta wa macha ragad fi beetha. 2Wa gaalo le sukkaan Khazza : «Chamchuun ja hini.» Khalaas humman hawwago al-madiina wa karaso jamb baab al-madiina tuul al-leel. Wa ma harrako min bakaanhum tuul al-leel achaan gaalo : «Khalli narjo nuur al-fajur wa naktuluuh.» 3Wa laakin Chamchuun ragad lahaddi ust al-leel. Wa fi ust al-leel, gamma macha marrag biibaan al-madiina wa maraadiishum wa chaalaahum fi kataafeeh wa waddaahum lahaddi raas al-hajar al-mugaabil Hibruun.

Chamchuun wa Daliila

4Wa baʼad da, Chamchuun dawwar mara waahide usumha Daliila al-gaaʼide ale waadi Suurikh. 5Wa kubaaraat al-Filistiyiin macho le l-mara di wa gaalo leeha : «Khuchchiih wa asʼaleeh min ween yaji sirr gudurtah al-kabiire di. Fattichi kikkeef nagdaro foogah wa nirabbutuuh. Wa ayyi waahid minnina yantiiki 1 100 hajar fudda.»

6Wa Daliila gaalat le Chamchuun : «Ooriini min ween ligiit sirr gudurtak al-kabiire di wa be chunu yarbutuuk wa gudurtak al-kabiire di tabga ma fiiha.» 7Wa Chamchuun gaal leeha : «Kan rabbatooni be sabʼa hubaal hana nubbaal neyyiin ma muyabbasiin, khalaas gudurti tabga ma fiiha wa nabga misil kulla l-naas.» 8Wa kubaaraat al-Filistiyiin jaabo le Daliila sabʼa hubaal hana nubbaal neyyiin ma muyabbasiin wa hi rabbatatah be l-hubaal dool. 9Wa naas waahidiin allabbado fi khurfitha wa l-mara koorakat wa gaalat : «Chamchuun, al-Filistiyiin hajamook !» Wa khalaas, Chamchuun gataʼ al-hubaal dool misil gataʼoohum be naar. Wa laakin ma ligo al-sirr hana gudurtah.

10Wa Daliila gaalat le Chamchuun : «Inta khachcheetni wa gult leyi kalaam kidib. Wa hassaʼ, ooriini be chunu yirabbutuuk ?» 11Wa hu gaal leeha : «Kan rabbatooni gawi be hubaal judaad al-yoom waahid ma sawwo beehum khidme, khalaas gudurti tabga ma fiiha wa nabga misil kulla l-naas.» 12Wa khalaas, Daliila chaalat hubaal judaad wa rabbatatah wa gaalat : «Chamchuun, al-Filistiyiin hajamook !» Wa fi l-wakit daak, naas waahidiin mullabbidiin fi l-khurfa wa laakin Chamchuun gataʼ al-hubaal al-marbuut beehum misil al-kheet.

13Wa Daliila gaalat le Chamchuun : «Hassaʼ kula inta khachcheetni wa gult leyi kalaam kidib. Ooriini be chunu yirabbutuuk ?» Wa hu gaal leeha : «Kan machatti sabʼa chaʼar fi raasi be khuyuut hana gabag wa rabattiihum fi mutraara, khalaas gudurti tabga ma fiiha wa nabga misil kulla l-naas.» 14Wa khalaas, hi nawwamatah wa machatat sabʼa chaʼar fi raasah be khuyuut hana gabag wa rabatatah fi witid wa gaalat : «Chamchuun, al-Filistiyiin hajamook !» Fi l-bakaan da, Chamchuun wiʼi min noomah wa marag al-mutraara al-marbuut foogha al-chaʼar al-madfuur be khuyuut al-gabag.

15Wa Daliila gaalat : «Kikkeef tagdar tuguul leyi : ‹Ana nihibbiki !› Galbak ma maʼaayi ! Wa daahu talaata marraat, inta khachcheetni wa abeet ma ooreetni sirr gudurtak al-kabiire di.» 16Wa hi gaaʼide tibachtinah kulla yoom le Chamchuun lahaddi hu iyi min bachtanatha. 17Wa khalaas, ooraaha sirrah min daakhal galbah wa gaal : «Ana raasi yoom waahid ma zayyanooh achaan ana mukhassas le l-Rabb min ana fi batun ammi. Kan zayyanooni, gudurti tabga ma fiiha marra waahid wa nabga misil kulla l-naas.»

18Wa wakit Daliila irfat kadar hu ooraaha sirrah min daakhal galbah, hi rassalat le kubaaraat al-Filistiyiin wa gaalat leehum : «Al-yoom kula taʼaalu achaan hu ooraani sirrah min daakhal galbah.» Wa kubaaraat al-Filistiyiin jo fi bakaanha chaayliin maʼaahum al-fudda al-hajjooha leeha. 19Hi nawwamat Chamchuun fi rijilha wa naadat naadum waahid zayyan al-sabʼa chaʼar al-mamchuut fi raasah. Khalaas fi l-bakaan da, hi gidrat foogah wa gudurtah kula bigat ma fiiha. 20Wa Daliila gaalat leyah : «Chamchuun, al-Filistiyiin hajamook !» Tawwaali, hu wiʼi min noomah wa fakkar wa gaal : «Namrug minhum misil awwal wa ninbalis.» Wa laakin hu ma irif kadar Allah baʼʼadah minnah.

21Wa fi l-bakaan da, al-Filistiyiin karabooh wa gaddado uyuunah. Wa humman chaalooh wa waddooh fi Khazza. Wa rabbatooh be guyuud hana nahaas wa jabarooh yarhak gameh fi lubb al-sijin. 22Wa laakin baʼad zayyanooh, battaan suuf raasah bada yugumm.

23Yoom waahid, kubaaraat al-Filistiyiin lammo wa gaddamo dahiiye kabiire le ilaahhum Daguun. Wa gaaʼidiin yafraho wa yuguulu : «Ilaahna sallam leena aduuna Chamchuun fi iideenna !» 24Wa wakit al-chaʼab chaafo Chamchuun, chakaro ilaahhum wa gaalo : «Ilaahna sallam leena aduuna fi iideenna ! Hu bas al-kharab baladna wa kattar maytiinna.» 25Wa laakin wakit firho ziyaada, gaalo : «Naadu leena Chamchuun le yidahhikna.» Wa humman jaabooh min al-sijin wa jabarooh yalʼab giddaamhum. Wa humman waggafooh ambeen amad beet al-ibaada da. 26Wa Chamchuun gaal le l-sabi al-karabah min iidah : «Guudni wa khalliini nalmas al-amad hana beet al-ibaada achaan nirrakkaz fooghum.» 27Wa beet al-ibaada da malaan be rujaal wa awiin wa kulla kubaaraat al-Filistiyiin kula gaaʼidiin. Wa battaan fi raas al-beet, hawaale 3 000 rujaal wa awiin gaaʼidiin yichiifu Chamchuun al-gaaʼid yalʼab.

28Wa Chamchuun naada Allah wa gaal : «Ya Allah Rabbi, fakkir foogi wa gaddirni aakhir marra le nichiil al-taar fi l-Filistiyiin fi chaan gaddado uyuuni.» 29Wa Chamchuun karab al-amad al-itneen al-ust al-bano fooghum beet al-ibaada wa arrakkaz fooghum iidah al-zeene fi amuud wa l-isra kula fi l-amuud al-aakhar. 30Wa gaal : «Khalli numuut maʼa l-Filistiyiin !» Wa be gudra lazza al-amad al-itneen wa khalaas beet al-ibaada wagaʼ fi l-kubaaraat wa kulla l-chaʼab al-gaaʼidiin foogah. Wa l-naas al-katalaahum maʼaayah fi wakit mootah aktar min al-naas al-katalaahum wakit hu hayy.

31Wa khalaas akhwaanah wa kulla aayilat abuuh jo chaalo janaaztah wa waddooh dafanooh ambeen hillaal Saarʼa wa Achtawuul fi khabur abuuh Manuuh. Wa Chamchuun hakam fi Israaʼiil 20 sana.

Currently Selected:

Gudiya 16: ADT19

Highlight

Copy

Compare