Tasniya 34

Moot Muusa

1Wa min kadaadit Muwaab, Muusa talaʼ fi jabal Nabu fi raas al-Fisga al-mugaabile hillit Ariiha. Wa min al-bakaan da, Allah wassafah kulla balad Gilʼaad lahaddi Daan 2wa kulla ard Naftaali wa balad Afraayim wa Manassa wa kulla balad Yahuuza lahaddi l-bahar al-Abyad 3wa saharat Nagab wa waadi Ariiha madiinat al-nakhal lahaddi Suukhar. 4Wa Allah gaal leyah : «Di l-balad al-ana halaft le Ibraahiim wa Ishaakh wa Yaakhuub wa gult : ‹Nantiiha le zurriiytak.› Wa ana chawwaftak al-ard di wa laakin inta ma tadkhul foogha.»

5Wa Muusa abd Allah maat fi l-bakaan da, fi balad Muwaab wa da hasab amur Allah. 6Wa Allah satarah fi l-waadi fi balad Muwaab mugaabil Beet Faʼuur. Wa lahaddi l-yoom da, naadum ma yaʼarif bakaan khaburah. 7Wa wakit Muusa maat, umrah 120 sana wa laakin choofah ma nagas wa gudurtah kula ma kammalat. 8Wa Bani Israaʼiil hizno le Muusa le muddit 30 yoom fi kadaadit Muwaab wa baʼad da, ayyaam hizinhum kammalo.

9Wa Yachuuʼ wileed Nuun malaan be ruuh al-hikma achaan Muusa khatta foogah iidah. Wa Bani Israaʼiil yasmaʼo kalaamah wa yisawwu kulla cheyy misil Allah amar beyah Muusa.

10Wa abadan ma marag nabi fi Bani Israaʼiil misil Muusa, hu al-kallam maʼa Allah khachum be khachum. 11Wa hu bas Allah rassalah yisawwi alaamaat wa ajaayib fi balad Masir giddaam Firʼoon wa khaddaamiinah wa kulla baladah. 12Wa be iidah, Muusa bas al-sawwa amal chadiid wa mukhiif giddaam kulla Bani Israaʼiil.

Currently Selected:

Tasniya 34: ADT19

Highlight

Copy

Compare