Tasniya 30

Bani Israaʼiil yigabbulu le Allah

1Wa wakit kulla l-achya al-kallamtuku beehum wa humman al-baraka wa l-laʼana yaju foogku wa Allah Ilaahku yichattitku been al-umam, khalaas fi l-wakit daak tilfakkaro fi guluubku kulla cheyy al-bigi. 2Wa kan gabbaltu le Allah Ilaahku wa simiʼtu kalaamah be kulla guluubku wa kulla fikirku intu wa iyaalku hasab al-amur al-nuguulah leeku al-yoom, 3khalaas Allah Ilaahku yigabbil leeku naasku al-karaboohum wa waddoohum fi l-khurba. Wa yihinn foogku wa battaan yilimmuku min ust al-umam al-awwal hu chattataaku fi lubbuhum. 4Wa hatta kan baʼʼadooku fi aakhir al-dunya kula, Allah Ilaahku yifattichku min hinaak wa yichiilku wa yilimmuku. 5Wa Allah Ilaahku yigabbilku fi l-balad al-juduudku chaalooha warasa wa intu kula tichiiluuha. Wa hu yisawwi leeku al-kheer wa yikattirku ziyaada min juduudku.

6Wa Allah Ilaahku yitahhir guluubku wa guluub zurriiyitku wa da le tihibbu Allah Ilaahku be kulla guluubku wa kulla fikirku wa da achaan tahyo. 7Wa Allah Ilaahku yarmi kulla l-laʼana di fi udwaanku wa fi l-naas al-yakrahooku wa yitaaruduuku. 8Wa intu battaan tigabbulu wa tasmaʼo kalaam Allah wa titabbugu al-wasaaya al-naamurku beehum al-yoom.

9Wa Allah Ilaahku yantiiku al-iiche al-haluuwe wa yibaarik khidmit iideeku wa zurriiyitku wa waaluudit maalku wa intaaj ziraaʼitku achaan battaan Allah chaal niiye yisawwi leeku al-kheer misil hu sawwaah le juduudku. 10Wa da wakit tasmaʼo kalaam Allah Ilaahku wa tahfado wasiiyaatah wa churuutah al-maktuubiin fi kitaab al-Tawraat da. Wa tigabbulu le Allah Ilaahku be kulla guluubku wa kulla fikirku.

Kalaam Allah gariib leeku

11Wa l-wasaaya al-naamurku beehum al-yoom ma gaasiyiin leeku wa tagdaro tahmaloohum. 12Wa l-wasaaya dool ma gaaʼidiin fi l-sama achaan tuguulu : «Yaatu al-yatlaʼ fi l-sama wa yidalliihum wa yisammiʼhum leena achaan nitabbuguuhum ?» 13Wa ma gaaʼidiin khaadi le l-bahar achaan tuguulu : «Yaatu al-yagtaʼ al-bahar wa yamchi yijiibhum wa yisammiʼhum leena achaan nitabbuguuhum ?» 14Aywa, al-kalaam da gaaʼid gariib leeku fi khuchuumku wa fi guluubku achaan titabbuguuh.

Aʼazulu been al-haya wa l-moot

15Wa chiifu, al-yoom ana nukhutt giddaamku al-haya wa l-kheer wa l-moot wa l-charr. 16Wa l-yoom, ana natlub minku tihibbu Allah Ilaahku wa tichiilu derbah wa tahfado wasiiyaatah wa churuutah wa gawaaniinah. Wa be da, tahyo wa tabgo katiiriin wa Allah Ilaahku yibaarikku fi l-balad al-tamchu leeha wa tichiiluuha warasa.

17Wa laakin kan guluubku yaabo wa ma tasmaʼo wa tamchu wara ilaahaat aakhariin wa taʼabuduuhum wa tasjudu giddaamhum, 18ana nuguul leeku al-yoom, intu tiddammaro marra waahid wa ayyaamku ma yutuulu fi l-balad al-tamchu leeha wa tichiiluuha warasa baʼad tagtaʼo bahar al-Urdun.

19Wa l-yoom, ana nijiib al-sama wa l-ard le yachhado foogku. Wa ana khatteet giddaamku al-haya wa l-moot wa l-baraka wa l-laʼana. Wa nuguul aʼazulu al-haya achaan tahyo intu wa zurriiyitku. 20Wa hibbu Allah Ilaahku wa asmaʼo kalaamah wa anrabtu maʼaayah achaan hu hayaatku wa yiziid umurku wa taskunu fi l-balad al-fi chaanha Allah halaf yantiiha le juduudku Ibraahiim wa Ishaakh wa Yaakhuub.

Currently Selected:

Tasniya 30: ADT19

Highlight

Copy

Compare