Tasniya 22

Fakkir fi l-khumaam al-muwaddir

1Wa kan tichiif toor aw kharuuf akhuuk muwaddir, ma tikhalliih. Chiilah wa waddiih leyah. 2Wa kan siid al-bahiime di ma saakin gariib leek aw ma taʼarfah, chiil bahiimtah di wa limmaha maʼaak. Wa khalliiha tagood fi beetak lahaddi hu yaji yifattichha wa khalaas, tantiiha leyah. 3Wa tisawwi misil da kan ligiit humaarah aw khalagah aw ayyi cheyy al-akhuuk yiwaddirah, ma tikhalliih.

4Wa kan ligiit humaar akhuuk aw toorah waagiʼ fi l-derib, ma tikhalliih. Saaʼid akhuuk wa gawwimah maʼaayah.

Gawaaniin aakhariin

5Wa l-mara ma talbas lubaas al-raajil wa l-raajil ma yalbas lubaas al-mara. Wa ayyi naadum al-yisawwi cheyy misil da, Allah Ilaahak yakrahah.

6Wa kan maachi fi derbak wa ligiit uchch indah furuukh aw beed hana teeraay fi chadara aw fi l-ard wa ammuhum raagde fooghum, ma tichiil al-amm wa furuukhha sawa. 7Wa laakin chiil al-furuukh wiheedhum wa khalli al-amm. Wa be da, talga al-kheer wa umrak yabga tawiil.

8Wa kan baneetu beet jadiid, hawwugu raasah be durdur achaan beetku ma yabga sabab hana dimme wakit naadum yagaʼ minnah.

9Ma tazraʼo cheyy aakhar fi jineenit inabku. Wa da, achaan ma tikhassusu kulla natiijat al-cheyy al-intu zaraʼtuuh maʼa intaaj inabku. 10Wa ma tahartu be toor wa humaar sawa.

11Wa ma talbaso khalag masnuuʼ be suuf wa gumaach kattaan sawa. 12Wa khayyutu hubaal fi l-koonyaat al-arbaʼa hana l-khita al-tilkhatto beyah.

Gaanuun bukhuss al-raajil wa martah

13Wa akuun naadum yaakhud mara wa baʼad lamma maʼaaha, yikhalliiha 14wa yathamha kadar hi ma maache adiil wa yihajji foogha kalaam fasil wa yuguul : «Ana akhadtaha wa wakit dakhalt beeha, ligiitha ma bineeye.» 15Wa fi l-haala al-misil di, amm al-bineeye wa abuuha yamchu le chuyuukh al-madiina fi khachum baab al-madiina wa hinaak yiwassufu alaamat al-banaatiiye le chuyuukh al-madiina. 16Wa abu al-bineeye yuguul le l-chuyuukh : «Ana anteet bineeyti le l-raajil da wa hu khallaaha. 17Wa hu tahamha kadar hi ma maache adiil wa gaal leyi : ‹Bittak ana ma ligiitha bineeye !› Wa laakin daahu al-alaama hana banaatiiyit bitti !»

Wa yifillu al-farde al-indaha damm al-banaatiiye giddaam al-chuyuukh hana l-madiina. 18Wa chuyuukh al-madiina di yakurbu al-raajil da wa yiʼaddubuuh. 19Wa yaʼasuruuh yikaffi hukum hana 100 hajar fudda le abu al-bineeye achaan hu tallaf simʼit al-bineeye al-udriiye fi Israaʼiil. Wa khalaas fi l-bakaan da, al-bineeye tagood martah wa hu ma yagdar yatrudha fi kulla muddit hayaatah.

20Wa laakin kan kalaam al-raajil da sahiih wa kan alaamat al-banaatiiye ma anlagat fi l-farde, 21khalaas yamurgu al-bineeye di fi khachum beet abuuha wa naas al-madiina yarjumuuha lahaddi l-moot achaan hi sawwat fiʼil cheen fi Israaʼiil wa achcharmatat min hi fi beet abuuha. Wa be da, tamurgu al-charr min usutku.

Al-zina wa l-ragadaan be gu

22Wa kan ligiitu raajil raagid maʼa marit raajil, humman al-itneen yumuutu, al-raajil wa l-mara kula. Wa be da, tamurgu al-charr min usut Bani Israaʼiil.

23Wa kan bineeye udriiye kaarbiin raasha wa raajil waahid laagaaha fi l-madiina wa ragad maʼaaha, 24waajib tamurguuhum humman al-itneen fi khachum baab al-madiina wa tarjumuuhum lahaddi yumuutu. Wa da, achaan al-bineeye ma aatat le naas al-madiina wa l-raajil achaan hu sawwa al-unuf le marit akhuuh. Wa be da, tamurgu al-charr min usutku.

25Wa laakin kan fi l-kadaade bas al-raajil da laaga al-bineeye al-kaarbiin raasha di wa karabaaha wa ragad maʼaaha, al-raajil yaktuluuh wiheedah. 26Wa ma tisawwu le l-bineeye di cheyy achaan hi ma sawwat zanib al-yijiib leeha al-moot. Wa l-haala di, hi misil naadum gamma didd akhuuh wa katalah. 27Wa l-bineeye al-kaarbiin raasha di, al-raajil laagaaha fi l-kadaade wa hi aatat wa ma ligat naadum al-yinajjiiha minnah.

28Wa kan naadum karab bineeye udriiye al-ma kaarbiin raasha wa ragad maʼaaha wa karabooh, 29khalaas al-raajil da yikaffi le abu al-bineeye 50 hajar fudda achaan hu karabaaha be gu. Wa hu yaakhudha wa ma yagdar yatrudha min beetah fi kulla muddit hayaatah.

30 # 22:30 Al-fasul 22 aaya 30 be l-arabi hu al-fasul 23 aaya 1 be l-faransaawi. Laakin ma zaad wa la nagas cheyy illa l-nimar bas albaddalo. Abadan naadum ma yagdar yargud maʼa marit abuuh achaan da misil kachaf oorit abuuh.

Currently Selected:

Tasniya 22: ADT19

Highlight

Copy

Compare