Tasniya 2

Al-chaʼab chaggo al-buldaan

1Wa Muusa gaal : Khalaas wajjahna ale l-sahara wa macheena ale l-bahar al-Ahmar, misil Allah gaalah leyi. Wa mudda tawiile gaaʼidiin nuluudu balad jibaal Saʼiir.

2Wa Allah gaal leyi : 3«Min mudda tawiile, intu gaaʼidiin tuluudu balad al-jibaal di. Wa hassaʼ da, kafaaku. Wajjuhu ale l-munchaakh. 4Ya Muusa, daahu al-amur al-tantiih le l-chaʼab. Guul leehum : ‹Fuutu gariib le huduud akhwaanku zurriiyit Isuu al-saakniin fi balad Saʼiir. Wa humman yakhaafo minku wa laakin intu ahfado nufuusku. 5Ma tujukhkhuuhum. Ana ma nantiiku wa la chibir min arduhum achaan balad jibaal Saʼiir di, ana anteetha warasa le zurriiyit Isuu. 6Hatta al-akil al-taakuluuh wa l-charaab al-tacharbooh kula, waajib tachruuh minhum be gurusku. 7Achaan ana Allah Ilaahku baaraktuku fi kulla cheyy al-sawweetuuh. Wa ana naʼarif be masaarku fi l-sahara al-kabiire di. Wa daahu 40 sana, ana gaaʼid maʼaaku wa cheyy gassar leeku kula ma fiih.›»

8Wa aniina futna baʼiid min akhwaanna zurriiyit Isuu al-saakniin fi balad Saʼiir. Wa khalleena derib al-Araba wa Ilaat wa Asyuun Giibar wa chilna derib hana saharat Muwaab. 9Wa Allah gaal leyi : «Ma tahjumu al-Muwaabiyiin wa la tugummu didduhum le tihaaribhum. Ana ma nantiiku ard warasa min baladhum achaan balad Aar di, ana anteetha le l-Muwaabiyiin zurriiyit Luut.»

10Wa zamaan al-Imiyiin saakniin fi l-ard di wa humman chaʼab chudaad wa katiiriin wa tuwaal misil Bani Anakh. 11Wa humman kula jaʼaloohum misil Rafaayiin wa misil Bani Anakh wa laakin al-Muwaabiyiin binaaduuhum Imiyiin. 12Wa zamaan, al-Huuriyiin saakniin fi balad Saʼiir wa zurriiyit Isuu jo dammaroohum wa chaalo arduhum wa sakano fi badalhum. Wa da misil Bani Israaʼiil sawwooh fi l-ard al-Allah antaaha leehum warasa wa chaalooha.

13Wa Allah gaal leena : «Hassaʼ gummu agtaʼo waadi al-Zarad.» Wa khalaas gammeena gataʼna waadi al-Zarad. 14Wa min gammeena min Khaadich Barniiʼa lahaddi gataʼna waadi al-Zarad, khatteena 38 sana. Wa da lahaddi kulla l-rujaal al-umurhum taamm le l-askariiye min bidaayit al-masaar bigo ma fiihum fi l-fariig.#2:14 al-rujaal al-umurhum taamm bigo ma fiihum misil Allah halaf beyah Al-taariikh da talgooh fi Adad 14:26-38. Wa bigi misil Allah halaf beyah wa gaalah leehum. 15Wa Allah darabaahum lahaddi kulluhum angachcho min al-fariig.

16Wa wakit kulla l-rujaal al-umurhum taamm le l-askariiye maato wa bigo ma fiihum fi ust al-chaʼab, 17khalaas Allah hajja leyi wa gaal : 18«Al-yoom intu tagtaʼo huduud Muwaab wa tuchuggu balad Aar. 19Wa talgo giddaamku Bani Ammuun. Ma tahjumuuhum wa la tugummu didduhum. Ana ma nantiiku ayyi ard fi baladhum achaan al-balad di, ana anteetha warasa le Bani Ammuun zurriiyit Luut.»

20Wa l-ard di kula, jaʼalooha ard al-Rafaayiin achaan awwal al-Rafaayiin sakano foogha wa Bani Ammuun binaaduuhum al-Zamzuumiyiin. 21Wa l-Rafaayiin dool, humman chaʼab kubaar wa katiiriin wa tuwaal misil Bani Anakh. Wa Allah dammaraahum le l-Rafaayiin wa Bani Ammuun chaalo arduhum wa sakano fi badalhum. 22Wa da misil Allah sawwaah le zurriiyit Isuu al-saakniin fi balad Saʼiir. Allah dammaraahum le l-Huuriyiin wa zurriiyit Isuu chaalo arduhum wa sakano foogha lahaddi l-yoom. 23Wa l-Kaftuuriyiin jo min Kaftuur wa dammaroohum le l-Awwiyiin al-saakniin fi l-hillaal hana mantagat Khazza wa sakano fi badalhum.

Allah sallam Siihuun wa baladah

24Wa baʼad da, Allah gaal leena : «Yalla gummu ! Amchu agtaʼo waadi Arnuun. Wa daahu ana sallamt leeku Siihuun malik Hachbuun al-Amuuri wa baladah. Min hassaʼ, gummu diddah haarubuuh wa chiilu baladah. 25Wa min al-yoom, ana nabda ninazzil al-ruʼub wa l-khoof fi kulla chuʼuub al-ard wa humman yakhaafo minku. Wa wakit yasmaʼo beeku, yibarjulu wa yinbahtu.»

26Min saharat Khadimuut, ana Muusa rassalt naas le Siihuun malik Hachbuun be kalaam hana salaam wa gult : 27«Khalliina nuchuggu ardak wa nichiilu al-derib wa ma nikissu minnah wa la isra wa la zeene. 28Wa l-akil al-naakuluuh wa l-almi al-nacharbooh kula, antiih leena be gurus wa laakin nidooru nuchuggu ardak bas. 29Wa zurriiyit Isuu al-saakniin fi Saʼiir wa l-Muwaabiyiin al-saakniin fi Aar khalloona chaggeena arduhum. Inta kula khalliina nuchuggu ardak lahaddi nagtaʼo bahar al-Urdun wa nadkhulu fi l-balad al-yantiiha leena Allah Ilaahna.»

30Wa laakin Siihuun malik Hachbuun aba ma yikhalliina nuchuggu ardah achaan Allah Ilaahna bas gawwa raasah wa ama galbah le yisallimah leena fi iideenah fi l-yoom da. 31Wa Allah gaal leyi : «Daahu ana badeet nisallim leeku Siihuun wa ardah. Wa intu kula abdo adkhulu fi ardah wa chiiluuha.»

32Wa Siihuun marag min Hachbuun, hu wa kulla chaʼabah le yihaaribna fi Yahaas. 33Wa Allah Ilaahna sallamah leena wa aniina annasarna foogah hu wa iyaalah wa kulla chaʼabah.#2:33 annasarna fi Siihuun malik Hachbuun Al-taariikh da talgooh fi Adad 21:21-25. 34Wa fi l-wakit daak, aniina chilna kulla mudunah. Wa dammarna al-rujaal wa l-awiin wa l-iyaal lahaddi waahid minhum kula ma faddal hayy. 35Wa laakin aniina chilna bahaayim misil khaniime wa nahabna khumaam al-mudun al-chilnaahum.

36Wa min hillit Aruuʼir al-fi khachum waadi Arnuun wa l-madiina al-fi l-waadi lahaddi Gilʼaad, ma fi madiina al-gidrat waajahatna. Wa Allah Ilaahna sallam leena kulla l-mudun dool. 37Wa laakin aniina ma dakhalna fi ard Bani Ammuun yaʼni al-balad hana khachum waadi Yabbuukh wa mudun balad al-jibaal. Ma dakhalna fi ayyi bakaan al-Allah Ilaahna daharaana ma nadkhulu foogah.

Currently Selected:

Tasniya 2: ADT19

Highlight

Copy

Compare