Tasniya 15

Afu al-deen

1Fi kulli sabʼa sana, aʼafo al-duyuun. 2Wa daahu kikkeef tisawwu. Ayyi naadum al-dayyan naadum, khalli yaʼafa leyah al-deen da. Wa ma tidaayig rafiigak aw akhuuk achaan al-deen da Allah bas gaal aʼafooh. 3Wa intu tagdaro tidaayugu al-ajaanib wa laakin aʼafo duyuunku al-fi bakaan akhwaanku.

4Wa fi kulli haal, ma fi masaakiin fi usutku achaan Allah Ilaahku yikattir foogku al-baraka fi l-balad al-hu yantiiha leeku warasa wa tamchu tichiiluuha. 5Wa da, illa kan tasmaʼo kalaam Allah Ilaahku wa tahfado wa titabbugu kulla l-wasaaya al-ana naamurku beehum al-yoom. 6Achaan Allah Ilaahku yibaarikku misil hu gaalah leeku. Wa be da, intu tidayyunu umam katiiriin. Wa laakin intu ma tihtaajo lahaddi tiddayyano wa intu tagdaro fi umam katiiriin wa laakin umma tagdar foogku ke ma fi.

7Wa kan fi masaakiin min akhwaanku saakniin fi waahide min hillaalku fi l-balad al-antaaha leeku Allah Ilaahku, khalli guluubku ma yabgo masaakiin wa iideeku ma yabgo gawiyiin le akhwaanku al-masaakiin. 8Wa laakin aftaho leehum iideeku wa dayyunuuhum hasab al-cheyy al-humman muhtaajiin leyah. 9Angarʼu, ma tukhuttu fi ruuseeku afkaar al-ma naafʼiin wa tuguulu kadar al-sana al-saabʼe hana afu al-deen garrabat. Wa tabgo jafiyiin le akhwaanku al-masaakiin wa taabo ma tantuuhum cheyy. Wa humman yachkuuku giddaam Allah wa intu tabgo muznibiin. 10Antuuhum be galib abyad wa bala nadaama achaan be sabab da, Allah Ilaahku yibaarikku fi kulla cheyy al-tisawwuuh wa fi kulla khidmitku. 11Wa daayman yukuun fi masaakiin fi ust al-balad wa achaan da, ana nantiiku al-amur da wa nuguul leeku : «Aftaho iideeku le akhwaanku wa le l-taʼbaaniin wa le l-masaakiin al-fi baladku.»

Atigiin al-abiid al-Ibraaniyiin

12Kan raajil aw mara min akhwaanku al-Ibraaniyiin baaʼ nafsah leeku, khaddumuuh sitte sana misil abid wa laakin fi l-sana al-saabʼe, aʼatuguuh wa khallu yamchi hurr. 13Wa wakit taʼatuguuh, ma tikhalluuh yamchi iideenah yaabis. 14Wa antuuh hadaaya be galib abyad min al-khanam wa l-gameh wa l-khamar. Wa l-cheyy al-tantuuh da, jaayi min barakat Allah Ilaahku al-antaaha leeku. 15Wa fakkuru kadar kuntu abiid fi balad Masir wa Allah Ilaahku fadaaku. Wa fi chaan da, al-yoom ana nantiiku al-amur da.

16Wa laakin akuun al-abid yuguul leek : «Ana ma namchi min bakaanak achaan ana niriidak inta siidi wa niriid iyaalak.» Wa l-abid da gaaʼid murtaah fi bakaanak. 17Fi l-bakaan da, chiil mukhras wa khutt adaanah fi l-baab wa giddaha wa khalaas, hu yagood yakhdim leek ila l-abad. Wa le khaadmak kula, sawwi leeha nafs al-cheyy.

18Wa khalli ma yabga leek gaasi wakit taʼatigah wa yamchi hurr min bakaanak achaan hu khadam leek sitte sana wa l-khidme al-hu sawwaaha tabga marrateen fi l-khidme hana l-naadum al-muʼajjar. Wa Allah Ilaahak yibaarikak fi kulla cheyy al-tisawwiih.

Khassisiin awlaad al-bikir

19Wa khassusu le Allah Ilaahku kulla awlaad al-bikir al-dukuura min bagarku wa khanamku. Wa ma takhdumu be wald al-bikir hana bagarku wa ma tagtaʼo suuf wald al-bikir hana khanamku. 20Wa sana baʼad sana, aakuluuh intu wa aayilaatku giddaam Allah Ilaahku fi l-bakaan al-hu yaʼazilah.

21Wa kan indah eeb aw yadlaʼ aw amyaan aw mukhalgan min ayyi bakaan, ma tigaddumuuh dahiiye le Allah Ilaahku. 22Aakuluuh fi l-hillaal al-intu saakniin fooghum. Wa l-taahir wa l-nijis kula yagdar yaakul minnah misil yaakulu al-khazaal aw ayyi seed aakhar. 23Wa laakin ma taakulu al-damm, daffuguuh fi l-turaab misil almi.

Currently Selected:

Tasniya 15: ADT19

Highlight

Copy

Compare