2 Samuwiil 2

Dawuud bigi malik fi balad Yahuuza

1Wa baʼad al-hizin da, Dawuud saʼal Allah wa gaal : «Hal namchi nagood fi hille waahide min hillaal balad Yahuuza walla ?» Wa Allah gaal leyah : «Amchi.» Wa Dawuud gaal : «Namchi ween ?» Wa Allah gaal leyah : «Amchi hillit Hibruun.»

2Wa Dawuud gamma macha Hibruun maʼa awiinah al-itneen Akhinuuʼam al-min hillit Yazraʼiil wa Abigaayil marit Naabaal al-min hillit Karmal. 3Wa Dawuud wadda maʼaayah naasah wa aayilaathum wa sakano fi Hibruun wa hawaaleeha. 4Wa naas gabiilat Yahuuza jo le Dawuud masahooh wa darrajooh malik fooghum.

Wa wakit khabbarooh kadar naas hillit Yaabiich fi turaab Gilʼaad sataro janaazit Chaawuul, 5khalaas Dawuud rassal le naas Yaabiich Gilʼaad wa gaal : «Allah yibaarikku achaan intu induku amaan le siidku Chaawuul wa satartu janaaztah. 6Wa hassaʼ da, khalli Allah yiwassif leeku al-rahma wa l-amaan. Wa ana kula nisawwi leeku al-kheer misil intu sawweetuuh. 7Sahiih, kan siidku Chaawuul maat kula, chiddu heelku wa abgo rujaal fahaliin. Achaan naas gabiilat Yahuuza masahooni wa darrajooni malik fooghum.»

Ichbuuchat bigi malik fi Israaʼiil

8Wa Abniir wileed Niir khaayid deech Chaawuul jaab Ichbuuchat wileed Chaawuul fi hillit Mahanaayim. 9Wa darrajah malik fi turaab Gilʼaad wa Achuuriin wa Yazraʼiil wa Afraayim wa Banyaamiin wa fi kulla turaab Bani Israaʼiil. 10Wa Ichbuuchat wileed Chaawuul indah 40 sana wakit bigi malik fi Israaʼiil wa hakam santeen. Wa laakin naas gabiilat Yahuuza taabaʼo Dawuud. 11Wa l-malik Dawuud hakam fi Hibruun sabʼa sana wa sitte chahar foog naas gabiilat Yahuuza.

Naas Dawuud haarabo Bani Israaʼiil

12Wa Abniir wileed Niir wa naas Ichbuuchat wileed Chaawuul marago min Mahanaayim wa macho ale hillit Gibʼuun. 13Wa Yuwaab wileedha le Saruuya wa naas Dawuud kula marago. Wa l-majmuuʼteen dool lammo fi rahad Gibʼuun. Wa dool wagafo be hini wa dool wagafo be hinaak le l-rahad.

14Wa Abniir gaal le Yuwaab : «Khalli subyaanna wa subyaanku yamurgu yijarrubu gudrithum giddaamna.» Wa Yuwaab gaal : «Sameh. Khalli yamurgu.» 15Wa khalaas, hasabo 12 raajil min gabiilat Banyaamiin naas Ichbuuchat wileed Chaawuul wa 12 raajil min naas Dawuud. 16Wa ayyi waahid gamma wa karab gabiilah min raasah wa attaaʼano be l-suyuuf fi nawaayithum wa maato kulluhum fi l-bakaan da. Wa sammooh Khilgat Hasuuriim (maʼanaatah zereʼ al-hujaar) wa l-bakaan da fi Gibʼuun.

17Wa fi l-yoom da, al-harib bigi chadiid bilheen wa naas Dawuud hazamoohum le Abniir wa naas Bani Israaʼiil. 18Wa awlaadha le Saruuya al-talaata Yuwaab wa Abichaay wa Asaahiil, humman kula haadiriin fi l-harib da. Wa Asaahiil hu jarraay misil khazaal al-nagaʼa. 19Wa Asaahiil jara wara Abniir wa ma baara min derbah wa la isra wa la zeene. 20Wa Abniir anlafat chaafah wa gaal : «Da inta, ya Asaahiil ?» Wa Asaahiil gaal : «Aywa, da ana.» 21Wa Abniir gaal : «Amchi ale israaytak aw zeenaaytak wa talga waahid min al-subyaan, aktulah wa chiil silaahah.» Wa laakin Asaahiil aba ma yigabbil min wara Abniir.

22Wa Abniir gaal battaan le Asaahiil : «Gabbil min derbi walla tidoor naktulak ? Wa kan kataltak, nuguul chunu le akhuuk Yuwaab ?» 23Wa laakin Asaahiil aba ma yigabbil min wara Abniir. Wa khalaas, Abniir taʼanah fi batnah be gaʼar haribtah lahaddi maragat leyah min wara. Wa hu wagaʼ wa maat fi l-bakaan da. Wa kulla l-naas yagiifu wakit wassalo fi l-bakaan al-maat foogah Asaahiil.

24Wa laakin Yuwaab wa Abichaay chaalo derib Abniir. Wa wakit wassalo jabal Amma, al-harraay wagaʼat khalaas. Wa l-jabal da gaaʼid sabaah le hillit Giiyah fi l-derib al-maachi ale saharat Gibʼuun. 25Wa gabiilat Banyaamiin lammo kulluhum wara Abniir misil raajil waahid fi raas jabal waahid. 26Wa Abniir naadaah le Yuwaab be hiss aali wa gaal : «Le mata nikhallu minnina al-duwaas ? Inta ma taʼarfah kadar al-cheyy da yikammil be hizin ? Wa le mata tuguul le naasak yikhallu minhum mutaaradat akhwaanhum ?» 27Wa Yuwaab gaal le Abniir : «Nahlif leek be Allah al-Hayy, awwal kan inta ma hajjeet da, naasi yitaaruduuku lahaddi ambaakir fajur.» 28Wa khalaas, Yuwaab darab al-buug wa kulla naasah wagafo min mutaaradat akhwaanhum Bani Israaʼiil wa battaan ma alhaarabo.

29Wa Abniir wa naasah raakho tuul al-leel fi waadi al-Urdun wa chaggo al-bahar wa raakho lahaddi hillit Bitruun wa wassalo Mahanaayim. 30Wa baʼad Yuwaab khalla mutaaradat Abniir, lamma kulla naasah. Wa fagad Asaahiil wa 19 naas min naas Dawuud. 31Wa laakin naas Dawuud katalo 360 naas min rujaal hana Banyaamiin wa Abniir. 32Wa chaalo janaazit Asaahiil wa dafanooha fi khabur abuuh al-fi Beet Laham. Wa baʼad da, Yuwaab wa naasah raakho tuul al-leel wa wassalo fi Hibruun be fajur badri.

Currently Selected:

2 Samuwiil 2: ADT19

Highlight

Copy

Compare