2 Kuruntus 9

Al-juud wa l-musaaʼada al-waajib

1Wa be l-sahiih, ma waajib leyi naktib leeku fi l-cheyy al-bukhuss al-musaaʼada al-nidooru niwadduuha le l-akhwaan al-saalihiin al-fi Madiinat al-Khudus. 2Ana naʼarif niiyitku chadiide. Wa ana hajjeet beeha be raasi marfuuʼ le akhwaanna al-hini fi Magiduuniya wa gult leehum kadar intu al-fi Akhaaya jaahiziin min al-sana al-faatat. Wa khabar hana hamiisitku chajjaʼ katiiriin minhum achaan yantu.

3Wa hassaʼ rassalt al-akhwaan al-talaata dool be l-jawaab da achaan niʼakkid kadar al-kalaam al-gultah fi niiyitku ma yabga kidib. Nidoor intu tabgo jaahiziin misil ana awwal gultah. 4Kan najiiku maʼa akhwaan waahidiin min Magiduuniya wa intu ma jaahiziin, al-eeb yisawwiina achaan achamna foogku fachal. Wa l-eeb yisawwiiku intu kula ziyaada. 5Achaan da, fi fikri ana waajib niwassi al-akhwaan dool yamchu leeku giddaami wa yinazzumu maʼaaku atiiyitku al-gultu tantuuha be juud. Wa misil da wakit naju, al-atiiye tukuun jaahize wa tantuuha leena be niiyitku wa ma misil jabarnaaku jabaraan.

6Wa ma tanso kadar al-naadum al-yiteerib chiyya yagtaʼ chiyya wa l-yiteerib katiir yagtaʼ katiir. 7Khalli ayyi naadum minku yanti hasab al-niiye al-chaalaaha fi galbah. Khalli ma yanti cheyy bala niiytah wa ma misil naadum asarooh asaraan achaan Allah yihibb al-naadum al-yanti be farah. 8Wa Allah yagdar yantiiku rahma be ziyaada lahaddi fi ayyi wakit induku al-yakfi leeku achaan tichaaruku ziyaada fi ayyi amal hana kheer. 9Wa yabga misil al-kalaam al-maktuub fi l-Kitaab al-buguul fi l-naadum al-saalih : <Hu yanti le l-masaakiin be juud wa adaaltah tagood daayman.>#9:9 Al-kalaam da talgooh fi Zabuur 112:9.

10Wa Allah al-yanti al-teeraab le l-harraati wa maʼaach le l-naas, hu yikattir leeku teeraabku achaan talgo katiir wa tantu ziyaada wa yiziidku baraka. 11Wa Allah yiziid leeku kulli cheyy achaan anteetu be juud wa wakit niwaddu atiiyitku le Madiinat al-Khudus, al-naas yachkuru Allah. 12Achaan al-khidme al-tisawwuuha le Allah di ma tisaaʼid al-saalihiin al-hawjaaniin bas. Hi tikattir al-chukur al-yigaddumuuh al-naas le Allah kula.

13Wa naas katiiriin yimajjudu Allah. Achaan al-khidme di, hi al-daliil al-yiwassif kadar intu muʼminiin be bichaarat al-Masiih wa titaabuʼuuh adiil. Wa yimajjudu Allah achaan anteetuuhum wa anteetu le naas aakhariin be juud. 14Wa yasʼalo Allah leeku wa yiriiduuku be mahabba chadiide be sabab rahmat Allah al-aziime al-antaaha leeku. 15Wa l-hamdulillah ! Al-atiiye al-hu antaaha, ma fi cheyy yigaadirha.

Currently Selected:

2 Kuruntus 9: ADT19

Highlight

Copy

Compare