1 Samuwiil 30

Al-Amaalikh dammaro hillit Sikhlaag

1Wa baʼad talaata yoom, Dawuud wa naasah wassalo fi hillit Sikhlaag wa ligo al-Amaalikh hajamo wati balad Yahuuza wa hajamo Sikhlaag kula wa tachchooha. 2Wa humman chaalo al-awiin wa ma khallo naadum, wa la kubaar wa la dugaag. Wa ma katalo naadum waahid kula laakin chaaloohum wa gabbalo beehum.

3Wa wakit Dawuud wa naasah wassalo fi Sikhlaag, ligo al-hille khalaas al-Amaalikh tachchooha. Wa awiinhum wa awlaadhum wa banaathum kamaan, waddoohum masaajiin. 4Wa Dawuud wa naasah bako baki chadiid lahaddi iyo min al-baki. 5Wa awiin Dawuud al-itneen Akhinuuʼam al-min Yazraʼiil wa Abigaayil al-awwal marit Naabaal al-min Karmal kula waddoohin masjuunaat. 6Wa Dawuud addaayag marra waahid achaan kulla l-naas al-maʼaayah gaalo yarjumuuh. Humman hizno katiir le awlaadhum wa banaathum. Wa laakin hu ligi chajaaʼa be niʼmat Allah Ilaahah.

7Wa Dawuud gaal le raajil al-diin Abiyaatar wileed Akhiimalik : «Min fadlak, jiib leyi sideeriiyit al-kharaar.» Wa Abiyaatar jaabah leyah. 8Wa Dawuud saʼal Allah wa gaal : «Kan namchi wara l-adu da, nagdar nalhagah walla ?» Wa Allah gaal leyah : «Amchi waraahum ! Talhaghum wa taglaʼ naasak.»

9Wa Dawuud wa naasah al-suttumiya macho wara l-adu wa wassalo fi l-rijil al-usumha Basuur. 10Wa wakit wassalo fi l-rijil di, miiteen min naasah bigo ayyaaniin marra waahid wa ma gidro yagtaʼo al-rijil. Wa gaʼado fi l-bakaan da. Laakin Dawuud taabaʼ al-adu be naasah al-urbuʼmiya. 11Wa fi l-khala, naasah le Dawuud ligo sabi Masri waahid wa karabooh wa waddooh le Dawuud. Wa antooh akil akal wa almi chirib. 12Wa antooh dukrume hana tiin yaabis muʼabbak wa dakaarim itneen hana inab yaabis muʼabbak. Wa baʼad akalaahum, aglah ja achaan hu ma akal wa la chirib min muddit talaata yoom wa talaata leele.

13Wa Dawuud saʼalah : «Siidak yaatu ? Wa inta min ween ?» Wa hu radda leyah wa gaal : «Ana Masri. Wa siidi Amaalikhi wa hu khallaani achaan ana miridt le muddit talaata yoom. 14Wa aniina bas al-jiina hajamna wati le balad al-Kiritiyiin wa wati le balad Yahuuza wa wati le balad Kaalib. Wa tachcheena hillit Sikhlaag kula.» 15Wa Dawuud gaal leyah : «Tagdar tiwaddiini bakaan al-adu da walla ?» Wa l-Masri gaal : «Ahlif leyi be l-Rabb kadar ma taktulni wa la tisallimni le siidi. Wa ana niwaddiik bakaan al-adu.»

16Wa khalaas, al-Masri waddaah le Dawuud. Wa ligoohum le l-Amaalikh muchattatiin fi kulla l-balad, yaakulu wa yacharbo wa farhaaniin be l-khaniime al-kabiire al-ligooha min balad al-Filistiyiin wa min balad Yahuuza. 17Wa Dawuud hajamaahum min fajur badri wa daawasaahum lahaddi ambaakir achiiye. Wa naadum waahid kula minhum ma faddal, illa 400 subyaan al-rikbo fi jumaal wa arrado.

18Wa Dawuud galaʼ kulla cheyy al-Amaalikh chaalooh wa najja awiinah al-itneen kula. 19Wa naadum waahid kula ma fagadooh wa la min al-dugaag wa la min al-kubaar wa la min al-awlaad wa la min al-banaat wa la min al-khaniime al-chaalooha minhum. Kulla ke, Dawuud galaʼah. 20Wa Dawuud jaab kulla l-khanam wa l-bagar hana l-Amaalikh. Wa l-naas al-yusuugu al-bahaayim gaaʼidiin yuguulu : «Di al-khaniime al-galaʼaaha Dawuud !»

Dawuud gassam al-khaniime

21Wa Dawuud wisil bakaan naasah al-miiteen al-awwal ayyaaniin bilheen wa ma taabaʼooh wa gaʼado fi l-rijil Basuur. Wa gammo laagooh le Dawuud wa naasah. Wa Dawuud wa naasah garrabo leehum wa sallamoohum. 22Wa min al-naas al-macho maʼa Dawuud, fiyah naas fasliin wa siyaad charr al-gaalo : «Al-naas al-ma macho maʼaana, ma nantuuhum cheyy min al-khaniime al-jibnaaha. Illa ayyi waahid yichiil martah wa iyaalah wa yamchi !» 23Wa laakin Dawuud gaal : «Ma tisawwu misil da, ya akhwaani, fi l-cheyy al-antaana Allah. Hu bas al-hafadaana wa sallam leena fi iideenna aduuna al-ja hajamaana. 24Kalaamku da ma yabga, achaan

al-macha fi l-harib

wa l-gaaʼid fi l-khumaam

yigassumu sawa sawa.»

25Wa min al-yoom da, al-gisim hana l-kasiibe bigi chart wa gaanuun fi Bani Israaʼiil lahaddi l-yoom.

26Wa wakit Dawuud gabbal fi Sikhlaag, rassal min al-khaniime le rufgaanah kubaaraat balad Yahuuza. Wa gaal leehum : «Daahu hadiiye leeku min al-khaniime al-chilnaaha min udwaan Allah.» 27Wa Dawuud rassalha le kubaaraat hana hillaal Beet Iil wa Raamuut fi l-wati wa Yattiir 28wa Aruuʼir wa Sifmuut wa Achtamuuʼa 29wa Raakaal wa le hillaal Yarhamiiliyiin wa le hillaal al-Khiiniyiin 30wa Hurma wa Buur Achan wa Ataak 31wa Hibruun. Wa da fi kulla l-bakaanaat al-awwal macha fooghum Dawuud wa naasah.

Currently Selected:

1 Samuwiil 30: ADT19

Highlight

Copy

Compare