1 Samuwiil 22

Dawuud macha allabbad

1Wa min al-bakaan da, Dawuud macha allabbad fi karkuur Adullaam. Wa wakit akhwaanah wa ahalah simʼo khabarah, gammo andammo leyah hinaak. 2Wa kulla l-naas al-taʼbaaniin wa l-naas al-taradoohum al-duyuun wa l-naas al-zaʼlaaniin min al-hukum macho lammo maʼaayah wa hu bigi fooghum khaayid. Wa be da, adad al-naas al-maʼaayah bigi hawaale 400 raajil.

3Wa baʼad da, Dawuud macha fi hillit Misfa fi balad Muwaab. Wa gaal le malik Muwaab : «Min fadlak, anti izin le abuuyi wa ammi yaju yagoodu fi bakaanak lahaddi nichiif al-cheyy al-yisawwiih leyi al-Rabb.» 4Wa hu chaalaahum wa waddaahum giddaam al-malik wa humman gaʼado maʼaayah kulla l-mudda al-Dawuud gaaʼid foogha fi l-bakaan al-gawi.

5Wa yoom waahid, al-nabi Gaad gaal le Dawuud : «Ma tagood fi l-bakaan al-gawi hini, amchi fi balad Yahuuza.» Wa Dawuud gamma wa macha fi l-khaaba al-usumha Haarit.

Katalo rujaal al-diin al-min Nuub

6Wa Chaawuul simiʼ be l-bakaan al-gaaʼidiin foogah Dawuud wa l-rujaal al-maʼaayah. Wa da wakit Chaawuul gaaʼid fi hillit Gibeeʼa tihit al-ardeebaay al-gaaʼide foog fi l-hajar wa haribtah fi iidah wa khaddaamiinah kulluhum gaaʼidiin maʼaayah. 7Wa Chaawuul gaal le khaddaamiinah al-gaaʼidiin jambah : «Min fadulku asmaʼo, ya naas Banyaamiin ! Hal wileed Yassa yantiiku kulluku ziraaʼa wa jineenaat inab walla ? Wa yidarrijku khuyyaad fi aalaaf wa fi miyaat walla ? 8Wa kan ma fiih, maala kulluku wagaftu diddi ? Naadum waahid minku ma kallamaani kadar wileedi sawwa alaakha maʼa wileed Yassa. Wa naadum waahid minku ma hanna foogi walla ja kallamaani kadar wileedi gaaʼid yilizz abdi diddi wa yukujj leyi charak misil al-yoom hu gaaʼid yisawwiih.»

9Wa Duwaag al-Adoomi gaaʼid maʼa khaddaamiin Chaawuul wa gaal : «Yoom waahid, ana chift wileed Yassa macha fi hillit Nuub bakaan Akhiimalik wileed Akhituub. 10Wa Akhiimalik saʼal Allah fi chaanah wa antaah akil wa antaah seef hana Jaaluut al-Filisti kula.»

11Wa baʼad da, Chaawuul rassal naadaah le raajil al-diin Akhiimalik wileed Akhituub wa kulla ahalah al-humman kula rujaal al-diin al-gaaʼidiin fi hillit Nuub. Wa kulluhum jo giddaam al-malik. 12Wa Chaawuul gaal le Akhiimalik : «Asmaʼ, ya wileed Akhituub !» Wa hu gaal : «Naʼam, ya siidi.» 13Wa Chaawuul gaal : «Maala inta wa wileed Yassa atmarradtu diddi ? Wa inta anteetah khubza wa seef. Wa battaan saʼalt al-Rabb fi chaanah le yugumm diddi wa yukujj leyi charak misil al-yoom hu gaaʼid yisawwiih.»

14Wa Akhiimalik radda leyah wa gaal : «Yaatu min kulla khaddaamiinak amiin misil Dawuud ? Wa hu nasiib al-malik wa bigi harasak wa mukarram ziyaada fi beetak inta al-malik ! 15Hal di awwal marra ana saʼalt al-Rabb fi chaanah walla ? La, di ma awwal marra ! Wa laakin khalli al-malik ma yukhutt al-tuhma di foogi ana wa la fi ahali achaan ana abdak ma naʼarif foogah cheyy.» 16Wa l-malik gaal : «La, ya Akhiimalik, akiid inta tumuut ! Inta wa ahalak kulluku tumuutu !»

17Wa l-malik amar al-hurraas al-gaaʼidiin jambah wa gaal : «Yalla ! Aktulu kulla rujaal al-diin hana Allah achaan humman saaʼado Dawuud. Humman irfo kadar hu muʼarrid wa ma jo kallamooni !» Wa laakin kulla rujaal al-haras abo ma yaktulu rujaal al-diin hana Allah.

18Wa fi l-bakaan da, al-malik gaal le Duwaag : «Yalla ! Inta bas aktul rujaal al-diin dool !» Wa Duwaag al-Adoomi gamma katalaahum. Wa fi l-yoom da, katal 85 rujaal al-diin kulluhum laabsiin khulgaan rujaal al-diin. 19Wa battaan hu katal be l-seef kulla naas Nuub hillit rujaal al-diin wa ma khalla wa la awiin wa la rujaal wa la iyaal wa la atfaal wa la bagar wa la hamiir wa la khanam. Kulluhum katalaahum be l-seef.

20Wa naadum waahid bas niji. Wa hu Abiyaatar wileed Akhiimalik wileed Akhituub. Wa hu arrad wa lihig Dawuud. 21Wa Abiyaatar khabbarah le Dawuud kadar Chaawuul katal rujaal al-diin hana Allah. 22Wa Dawuud gaal le Abiyaatar : «Al-yoom daak, ana irift kadar Duwaag al-Adoomi yikhabbirah le Chaawuul be kulla cheyy. Wa ana bas bigiit sabab fi moot ahalak. 23Wa hassaʼ da, agood maʼaayi, ma takhaaf ! Achaan al-yaktulak inta, ma yikhalliini ana kula. Laakin fi jambi ana da, inta fi amaan.»

Currently Selected:

1 Samuwiil 22: ADT19

Highlight

Copy

Compare