1 Samuwiil 12
12
Samuwiil sallam al-hukum le Chaawuul
1Wa Samuwiil gaal le Bani Israaʼiil : «Daahu ana simiʼt kulla kalaamku wa darrajt leeku malik. 2Wa hassaʼ da, daahu induku malik gaaʼid yuguudku. Wa kan leyi ana kamaan, ana bigiit chaayib wa raasi kula bigi abyad. Wa daahu iyaali kula gaaʼidiin maʼaaku wa taʼarfu kadar ana gudtuku min subaayi lahaddi l-yoom. 3Wa daahu ana waagif giddaamku. Awurdu foogi chahaada giddaam Allah wa giddaam al-malik al-hu masahah wa darrajah. Kan ana chilt toor aw humaar min naadum aw zalamt naadum aw sawweet fasil le naadum, ooruuni ! Kan chilt rachwa min naadum achaan nakhjal minnah wa ma niʼooriih al-sahiih, ooruuni ! Ooruuni achaan ana nikaffiiku al-cheyy al-zalamtuku beyah.»
4Wa humman gaalo : «La ! Inta ma zalamtina wa la sawweet cheyy fasil le naadum wa la chilt cheyy min naadum.» 5Wa hu gaal leehum : «Al-yoom Allah chaahid wa l-malik al-hu darrajah kula chaahid kadar intu ma ligiitu foogi eeb waahid kula.» Wa humman gaalo : «Aywa, hu chaahid !»
6Wa khalaas, Samuwiil gaal le l-chaʼab : «Aywa ! Allah hu bas al-azal Muusa wa Haaruun wa marag juduudku min balad Masir. 7Wa hassaʼ da, taʼaalu. Ana madluum foogku giddaam Allah. Wa nifakkirku be kulla cheyy al-aadil al-Allah sawwaah leeku intu wa le juduudku. 8Wa wakit juduudku iyaal Yaakhuub gaaʼidiin fi balad Masir, sarakho le Allah. Wa hu rassal Muusa wa Haaruun maragoohum min balad Masir wa jaaboohum hini. 9Wa laakin humman niso Allah Ilaahhum wa Allah sallamaahum le Siisra khaayid hana madiinat Haasuur wa le l-Filistiyiin wa le malik Muwaab wa humman haaraboohum. 10Wa juduudku sarakho le Allah wa gaalo : ‹Aniina aznabna achaan abeena Allah wa abadna asnaam Baʼal wa Achtaruut. Wa laakin hassaʼ da, najjiina min udwaanna wa aniina naʼabuduuk battaan.›
11«Wa khalaas, Allah rassal Yarbaʼal wa Baaraakh wa Yiftaah#12:11 Yarbaʼal wa Baaraakh wa Yiftaah Dool hukkaam zamaan fi Bani Israaʼiil wa taariikhhum talgooh fi Gudiya 7:1 wa Gudiya 4:6 wa Gudiya 11:29. wa ana Samuwiil. Wa najjaaku min udwaanku al-muhawwigiinku wa be da, sakantu be amaan. 12Wa wakit chiftu Nahaach malik Bani Ammuun gamma didduku, gultu : ‹Aniina kula nidooru malik yamluk foogna.› Wa be da kula, abeetu Allah Ilaahku wa hu bas malikku.
13«Wa hassaʼ da, daahu al-malik al-intu dawwartuuh wa talabtuuh. Wa hu bas al-malik al-Allah darrajah foogku. 14Wa kan intu khuftu min Allah wa abadtuuh wa simiʼtu kalaamah wa ma isiitu amur Allah Ilaahku wa taabaʼtuuh, intu wa l-malik al-gaaʼid yamluk foogku, da yabga leeku adiil. 15Laakin kan ma simiʼtu kalaam Allah wa isiitu amrah, Allah yadrubku misil awwal darab juduudku.
Samuwiil khawwaf al-chaʼab
16«Wa hassaʼ da, taʼaalu wa chiifu al-cheyy al-ajiib al-yisawwiih Allah giddaamku ! 17Da darat, wakit gatiʼiin al-gameh. Wa hassaʼ bas, ana nasʼal Allah wa hu yinazzil matara wa raʼad. Wa be da, intu tichiifu wa taʼarfu kadar intu sawweetu khata kabiir giddaam Allah wakit intu talabtu minnah malik !»
18Wa khalaas, Samuwiil saʼal Allah wa Allah nazzal matara wa raʼad fi l-yoom da. Wa kulla l-chaʼab khaafo khoof chadiid min Allah wa min Samuwiil. 19Wa kulla l-chaʼab gaalo le Samuwiil : «Achhad leena Allah ilaahak le ma numuutu ! Achaan aniina zidna zanib kabiir fi zunuubna be sabab talabna malik.» 20Wa Samuwiil gaal le l-chaʼab : «Ma takhaafo. Sahiih, intu sawweetu al-khata da. Wa laakin ma tikhallu derib Allah wa aʼabuduuh be kulla guluubku. 21Ma titaabuʼu al-asnaam achaan humman ma yagdaro yafzaʼooku wa la yinajjuuku. Achaan humman ma naafʼiin.
22«Wa fi chaan usmah al-aziim, Allah ma yikhalli chaʼabah. Achaan dawwar yisawwiiku intu chaʼabah halaalah. 23Wa kan leyi ana, ma niwaggif al-duʼa fi chaanku achaan kan ana waggaftah, da zanib didd Allah. Wa waajib niwassifku al-derib al-sameh wa l-adiil. 24Wa laakin akhaafo min Allah wa aʼabuduuh be sahiih wa be kulla guluubku. Wa fakkuru fi l-ajaayib al-kubaar al-hu sawwaahum leeku. 25Wa kan sawweetu al-fasaala, tahlako intu wa malikku kula !»
Currently Selected:
1 Samuwiil 12: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.