1 Samuwiil 10
10
Samuwiil sabba dihin fi raas Chaawuul
1Wa Samuwiil chaal dihin wa sabbaah fi raas Chaawuul. Wa hadanah wa gaal : «Be da, Allah darrajak le tabga kabiir le chaʼabah Bani Israaʼiil al-misil warasatah. 2Wa wakit al-yoom tamchi min bakaani hini, tilimm maʼa rujaal itneen jamb khabur Raahiil al-gaaʼid fi turaab Salsah fi huduud Banyaamiin. Wa humman yuguulu leek : ‹Al-hamiir al-inta macheet tifattichhum, khalaas anlago. Wa hassaʼ, abuuk khalla kalaam al-hamiir wa gaaʼid yihimm leeku intu. Wa yasʼal nafsah kikkeef yalga wileedah.›
3«Min al-bakaan da, amchi lahaddi tiwassil fi gaʼar al-chadara al-kabiire al-fi jabal Taabuur. Wa fi l-bakaan da, yalgook rujaal talaata al-taaliʼiin le yaʼabudu al-Rabb fi hillit Beet Iil. Wa waahid min al-rujaal dool chaayil talaata sakhal wa l-taani chaayil talaata khubza wa l-taalit kamaan chaayil girbe hint asiir al-inab. 4Wa humman yisallumuuk wa yantuuk itneen khubza wa inta tichiilhum minhum. 5Wa baʼad da, tamchi fi hillit Gibeeʼat Allah, al-bakaan al-gaaʼid foogah muʼaskar al-Filistiyiin. Wa wakit tadkhul fi l-hille di, tilimm maʼa majmuuʼa min al-anbiya naazliin min bakaan al-ibaada. Wa giddaamhum, fiyah naas al-yadurbu jigindiiye wa nuggaara wa suffaara wa amsibeybe. Wa l-anbiya dool yitnabbaʼo. 6Wa tawwaali, Ruuh Allah yanzil foogak inta be chidde wa titnabbaʼ maʼaahum wa tikhayyir wa tabga raajil aakhar. 7Wa wakit kulla l-alaamaat dool yitimmu leek, khalaas sawwi kulla cheyy al-inta tidoor tisawwiih achaan al-Rabb maʼaak. 8Wa anzil giddaami wa amchi fi hillit Gilgaal. Wa baʼad da, ana nalhagak le nigaddim dahaaya muharragiin wa dahaaya salaama. Wa arjaani muddit sabʼa yoom lahaddi ana najiik wa niʼooriik al-cheyy al-waajib tisawwiih.»
9Wa min Chaawuul gabbal min Samuwiil wa macha, al-Rabb khayyar galbah. Wa kulla l-alaamaat dool tammo fi nafs al-yoom. 10Wa wakit Chaawuul wa khaddaamah wassalo fi hillit Gibeeʼa, laagoohum majmuuʼa min al-anbiya. Wa tawwaali, Ruuh Allah nazal be chidde fi Chaawuul wa hu kula dakhal fi usuthum wa gamma yitnabbaʼ maʼaahum. 11Wa wakit chaafooh yitnabbaʼ maʼa l-anbiya, kulla l-naas al-awwal irfo Chaawuul assaaʼalo ambeenaathum wa gaalo : «Chunu al-bigi le wileed Khiich ? Chaawuul kula bigi nabi maʼaahum walla ?» 12Wa naadum waahid min naas al-bakaan da gaal : «Yaatu sayyidhum ?» Wa min al-bakaan da bas, marag al-masal al-buguul : «Chaawuul kula bigi nabi maʼaahum walla ?» 13Wa wakit Chaawuul kammal min al-tanabbu, talaʼ fi bakaan al-ibaada.
14Wa immah le Chaawuul saʼalah hu wa khaddaamah wa gaal leehum : «Intu macheetu ween ?» Wa Chaawuul radda leyah wa gaal : «Aniina macheena nifattuchu al-hamiir. Wa wakit ma ligiinaahum kamaan, macheena gaabalna Samuwiil.» 15Wa immah le Chaawuul gaal : «Khalaas, ooriini Samuwiil gaal leeku chunu ?» 16Wa Chaawuul radda le immah wa gaal : «Samuwiil khabbaraana kadar al-hamiir anlago.» Wa laakin labbad le immah al-cheyy al-bukhuss al-muluk, al-khabbarah beyah Samuwiil.
Chaawuul azalooh malik
17Wa Samuwiil naada al-chaʼab le yilimmu giddaam Allah fi hillit Misfa. 18Wa hu gaal le Bani Israaʼiil : «Daahu Allah Ilaah Bani Israaʼiil gaal : ‹Ana bas al-maragtuku intu Bani Israaʼiil min Masir. Wa ana bas al-najjeetku min malik Masir wa min kulla l-muluuk al-gaaʼidiin yistaʼmarooku.› 19Wa laakin al-yoom intu abeetu Ilaahku al-najjaaku min kulla l-masaayib wa min kulla l-taʼab. Wa gultu leyah : ‹Aywa ! Darrij leena malik !› Hassaʼ da, taʼaalu giddaam Allah be gabaayilku wa khuchuum buyuutku.»
20Wa Samuwiil gaddam kulla gabaayil Bani Israaʼiil wa sawwa leehum amʼiyeedaat wa l-ikhtiyaar wagaʼ fi gabiilat Banyaamiin. 21Wa battaan gaddam gabiilat Banyaamiin be kulla khuchuum buyuutha wa l-ikhtiyaar wagaʼ fi khachum beet Matri. Wa fi l-akhiir, al-ikhtiyaar wagaʼ fi Chaawuul wileed Khiich. Wa humman fattachooh wa laakin ma ligooh. 22Wa humman saʼalo Allah battaan wa gaalo : «Al-raajil da gaaʼid maʼaana hini walla ?» Wa Allah gaal : «Aywa ! Chiifuuh ! Mullabbid jamb al-khumaam.»
23Wa humman macho jaabooh. Wa wakit wagaf fi ust al-chaʼab, hu bas faataahum be tuul, raasah wa kataafeeh maargiin foog minhum. 24Wa Samuwiil gaal le kulla l-chaʼab : «Hal chiftu al-naadum al-Allah azalah walla ? Ma fi naadum mislah fi kulla l-chaʼab !» Wa kulla l-chaʼab aato be hiss waahid wa gaalo : «Yiʼiich al-malik !»
25Wa Samuwiil kallam le l-chaʼab be kulla huguug al-malik wa katabaahum fi kitaab wa khattaah giddaam Allah. Wa baʼad da, Samuwiil gaal le kulla l-chaʼab khalli ayyi waahid yigabbil beetah.
26Wa Chaawuul kula gabbal beetah fi hillit Gibeeʼa wa macho maʼaayah mujtamaʼ min al-rujaal al-chudaad al-hadaahum al-Rabb. 27Wa laakin naas waahidiin al-ma naafʼiin gaalo : «Hu da yinajjiina walla ?» Humman kirhooh wa ma gaddamo leyah hadaaya. Wa Chaawuul ma gaal cheyy.
Currently Selected:
1 Samuwiil 10: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
