1 Kuruntus 5

Al-zaani fi ust al-muʼminiin

1Simiʼt kalaam ajiib bilheen foogku. Yuguulu naadum minku gaaʼid yisawwi zina al-naas al-ma muʼminiin kula ma yisawwuuh. Yuguulu naadum waahid gaaʼid yazna marit abuuh. 2Kikkeef bigiitu mustakbiriin ? Akheer tahzano hizin chadiid. Wa l-naadum al-sawwa al-zanib da, waajib taturduuh min usutku.

3Wa kan leyi ana, sahiih ana gaaʼid fi bakaan baʼiid minku laakin ana maʼaaku be l-Ruuh al-Khudduus. Wa ana haakamt al-naadum da khalaas misil ana be nafsi gaaʼid fi usutku. 4Wa wakit intu laammiin be usum Rabbina Isa wa hasseetu kadar ana gaaʼid maʼaaku be ruuhi wa gudrat Rabbina Isa maʼaaku, 5waajib tisallumu al-naadum da le l-Cheetaan achaan tabiiʼtah al-insaaniiye tiddammar wa hu zaatah yanja fi yoom jayyit Rabbina Isa.

6Sawweetu nufuusku kubaar wa da ma adiil. Hal nisiitu kadar tawwaara chiyya bas tigawwim kulla l-ajiin walla ? 7Amurgu minku al-naadum al-gaaʼid yaznib da, achaan tabgo battaan misil ajiin jadiid al-ma indah tawwaara. Wa aniina bigiina naas judaad achaan al-Masiih maat misil hamal al-dabahooh zamaan fi l-Fisha al-awwal.#5:7 fi l-Fisha al-awwal Da bigi wakit Allah marag Bani Israaʼiil min Masir. Wa l-taariikh da talgooh fi Khuruuj 12. 8Achaan da, khalliina nabgo misil al-naas al-yiʼayyudu iid al-Fisha al-baakulu al-khubza al-jadiide al-ma indaha tawwaara. Wa l-khubza al-gadiime al-indaha tawwaara tiwassif al-fasaala wa l-zunuub. Wa l-khubza al-jadiide al-ma indaha tawwaara tiwassif al-niiye al-mukhlisa wa l-hagg.

9Wa fakkuru fi l-kalaam al-katabtah leeku fi jawaabi al-awwal. Ana gult angarʼu min al-zannaayiin wa kissu minhum baʼiid. 10Wa maʼana al-kalaam da ma bukhuss al-naas al-zannaayiin al-ma muʼminiin wa la l-tammaaʼiin wa la l-sarraagiin wa la aabidiin al-asnaam. Achaan ma tagdaro tikissu min al-naas dool illa kan tamurgu min al-dunya marra waahid. 11La. Fi badalah, ana katabt leeku achaan tikissu min ayyi naadum al-buguul hu akhuuku muʼmin wa laakin hu zannaay walla tammaaʼ walla aabid asnaam walla nammaam walla sakkaari walla sarraag. Aywa, al-naadum al-misil da ma taakulu maʼaayah kula.

12Ana ma indi hagg nihaasib al-naas al-barra min ummat al-Masiih. Wa laakin akhwaanku al-muʼminiin al-fi usutku waajib intu tihaasubuuhum. 13Al-naas al-barra dool, Allah yihaasibhum. Wa laakin kan leeku intu, maktuub : <Aturdu al-chariir min usutku.>#5:13 Al-kalaam da talgooh fi Tasniya 17:7.

Currently Selected:

1 Kuruntus 5: ADT19

Highlight

Copy

Compare