1 Kuruntus 16

Al-musaaʼada

1Wa fi l-cheyy al-bukhuss al-musaaʼada al-tirassuluuha le l-saalihiin al-fi daar al-Yahuudiiya, waajib titaabuʼu nafs al-wasiiye al-anteetha le jamaaʼaat al-muʼminiin al-fi balad Khalaatiya. 2Kulli yoom al-ahad, khalli ayyi naadum minku yifakkir fi kikkeef Allah razakhah wa yamrug cheyy min maalah le l-musaaʼada. Khalli yukhuttah jaahiz lahaddi najiiku. Wa be misil da, wakit ana naji ma waajib tugummu tutchukku. 3Aʼazulu min ambeenaatku al-akhwaan al-tidooru yiwaddu musaaʼadatku. Wa wakit najiiku, nirassilhum be makaatiib hana chahaada fi Madiinat al-Khudus. Wa khalaas humman yiwaddu al-musaaʼada al-anteetuuha. 4Wa fi l-bakaan da kan bigi leyi, ana kula nisaafir wa humman yiraafuguuni.

Ruwaakhit Buulus wa akhwaanah

5Wa wakit nuchugg balad Magiduuniya, khalaas namchi leeku ziyaara achaan awwal ke nufuut be Magiduuniya. 6Wa akuun nagood maʼaaku ayyaam, akuun tuul al-chite kula. Wa fi l-akhiir, tagdaro tantuuni zaad le l-safar wakit naʼarif al-bakaan al-namchi leyah. 7Achaan ma nidoor nugumm hassaʼ wa nakhchaaku bas laakin kan Rabbina gaal aamiin, nitawwil chiyya maʼaaku. 8Wa nagood hini fi hillit Afasus lahaddi iid al-Khamsiin 9achaan Allah fatah leyi al-derib wa be da, indi fursa nisawwi khidme adiile bilheen. Wa l-yikhaalufuuni kula katiiriin.

10Wa wakit Timuutaawus yajiiku, akurbuuh gawi wa khalli yagood maʼaaku be l-salaam achaan hu gaaʼid yakhdim khidmit Allah misli ana. 11Achaan da, ma tikhallu ayyi naadum yahgirah. Antuuh zaad wa khallu yaji leyi be l-salaama achaan ana gaaʼid narjaah, hu wa l-akhwaan al-maʼaayah.

12Wa akhuuna Abuluus al-gaaʼid hini, ana chajjaʼtah achaan yamchi leeku maʼa l-akhwaan. Laakin haaliiyan da, ma yidoor yamchi. Akiid hu yamchi leeku wakit indah fursa.

Nihaayat al-jawaab

13Agoodu waaʼiyiin wa saabtiin fi l-iimaan. Abgo chajiiʼiin wa gawiyiin. 14Sawwu kulla cheyy be mahabba.

15Ya akhwaani, taʼarfu naas beet Istifaan wa taʼarfu kadar fi balad Akhaaya, humman awwal naas al-aamano be l-Masiih wa munkaribiin fi l-khidme fi chaan al-saalihiin. Wa niwassiiku 16achaan tasmaʼo adiil kalaam hana l-naas al-misilhum wa hana ayyi naadum al-yakhdim maʼaahum be niiye waahide.

17Wa ana firiht bilheen be jayyit akhwaanku Istifaan wa Furtuuna wa Akhaayik achaan ana garmaan leeku wa humman jo fi gadduku. 18Wa barrado galbi misil barrado guluubku intu kula. Karrumu al-naas al-misil dool.

19Wa jamaaʼaat al-muʼminiin al-fi balad Aasiya yisallumuuku. Wa Akiila wa Biriskiila wa l-muʼminiin al-yilimmu fi beethum yisallumuuku katiir fi Rabbina al-Masiih. 20Wa l-akhwaan kulluhum yisallumuuku. Assaalamo ambeenaatku be salaam al-saalihiin.

21Wa khalaas, ana zaati chilt al-galam wa katabt be iidi : «Ana Buulus nisallimku.»

22Kan ayyi naadum ma yihibb Rabbina Isa, khalli Allah yalʼanah. Ya Rabbina, taʼaal !#16:22 Ya Rabbina, taʼaal Al-kalaam al-asli buguul «Maaraana Tha». Wa da be l-lukhkha al-araamiiye al-indah nafs al-maʼana.

23Wa aleekum rahmat Rabbina Isa. 24Mahabbiti leeku kulluku fi l-Masiih Isa.

Currently Selected:

1 Kuruntus 16: ADT19

Highlight

Copy

Compare