M̀ɛni-lɛɛi 1
1
Zîsɛ Kôrai ŋɔmɛni-lɛ́ɛi
1Zîsɛ Kôrai ŋɔmɛni-lɛ́ɛi nyíi Ɣâla e dɛ̀ɛ bɔ́ a gɛɛ m̀ɛnii pâi kɛ̂i a maa félaai é lɛ́ ǹyee-mu-ƃelai dîa. Ǹyaŋ è nyíŋi lɛ̀ a ŋɔkélai tɛ́ɛ ǹyée-mu-nuui Zɔ̂ŋ pɔ naa. 2Zɔ̂ŋ è Ɣâla ŋɔwóoi maa-sere-faa kɛ̀ è Zîsɛ Kôrai ŋɔsêre-faai maa-sere-faa kɛ́, da mɛni-ŋai kélee è gàai. 3Lûwa káa ǹúui ma a mɛni-lɛɛi ŋí lònoi. Lûwa kɛ́ ƃo diai dia da mɛnii, da diai da mɛnii mɛi kâa nyíi bɔ̃yɛɛ̂i zui, kpɛ́ni fêi tãi a lɛɣɛ.
Zɔ̂ŋ è ǹáa tì Kôrai-toli-kpɔŋ lɔ́ɔlu mɛi féerɛi ma.
4Zɔ̂ŋ ŋɔworɛ̂-wooi è dɛ̀ɛ Kôrai-toli-kpɔŋ lɔ́ɔlu mɛi féerɛi pɔ́ naa Eesiai.
Ƃɛlɛ-sêe é kɛ́ kâa da lii-sêe é kúla ǹúui yêei gáa naai, nyíi kɛ̀ naai, nyíi pâi kɛ̂i naai. Ƃɛlɛ-sêe é kɛ́ kâa da lii-sêe é kúla m̀ɔlêŋ lɔ́ɔlu mɛi féerɛi yêei nyíi-ŋai díkaa ŋɔkâloŋ-see-sɛŋ ŋ́ɛi-tuɛi. 5Ƃɛlɛ-sêe é kɛ́ kâa da lii-sêe é kúla zere-faa kɛ-nuu sã́ai Zîsɛ Kôrai yêei, nyíi kɛ̀ a ǹúui maa-ŋuŋ kùla saa yêei, gɛ̀ ƃò ŋɔ́nɔ a ǹɔii su-kaloŋ-ŋai mɛi-nuui.
Ǹúui kúwɛli ni nyíi kúŋuŋ ma ƃò kúsɔnyɔ̂ŋ yêei a ŋɔŋãai, 6nyíi kâloŋ-laa kɛ̀ kúmɛni mai, é kúkɛ a Ŋɔɣâlai da Ǹâŋ ŋɔsâla láa soŋ-ƃelai, folo-laa da núu-mɛi-laa é kɛ́ ǹyêei wɔlɔ-wɔlɔ da wɔlɔ-wɔlɔ. É kɛ́ tí. 7Gáa, gáa pâi ɣele-kɔlɔŋ kole-ŋa su, ǹyaŋ ŋɛ́i kélee a pâi gâai diai zɔ̀ɔ a kpálai, ǹyaŋ sîi kélee gáa ǹɔii sui, a pâi wɔ̂lɔi m̀aa mɛ̂ni ma. Bere ƃe a pâi kɛ̂i la. É kɛ́ tí.
8Kúnuu-namui Ɣâla nyíi gáa naa, nyíi kɛ́ naa, da nyíi pâi pâi, nyíi wala-wala káa ǹyêei a mò, nyɛɛ, “Ńyãa ƃa Afa da Omiga.”
Núu-kpune Ǹóŋ maa-zĩ̂ai
9Ńyãa Zɔ̂ŋ, ńyãai ŋ́gaa a káƃarâŋ, ńyãai kwa kâa-ni kwa mɛni-kpɔlu kàa Zîsɛ kponôi, kwa kâa-ni kú Ŋ̀âla-taa kâloŋ laai sɔlɔ ƃo gîe-ma da nii-kpelei gáa kúyêei, dí ńdɛ̀ɛ tîŋ tɔnɔ su da dòli a Pamɔɔi, kpɛ́ni fêi, ŋá Ɣâla wóo ƃò ŋá Zîsɛ maa-sere-faa kɛ́. 10Ŋá kɛ̀ Mɔ̂leŋ su a Kúnuu-namui ŋɔɣelei, ǹyaŋ ŋá wóo su kɛ́tɛ mɛ̀ni ḿbôlu-pere yɛ̂ɛ túru-woo, 11gɛ̀ mò, nyɛɛi, “Mɛnii ya gaâi, bɔ̃̀yɛ kɔlɔ ma í dɛ̀ɛ Kôrai-toli-kpɔŋ lɔ́ɔlu mɛi féerɛi dîɛ. Dɛ̀ɛ Ɛfesɛ, Simɛna, Pɛgamɔŋ, Tayatira, Saadi, Feledɛfia, da Leodisiɛ.”
12Nya ƃe ŋá tìnaŋ a gɛɛ ŋa ŋ̀óoi naa-pere kaa nyíi kɛ̀ lônoi ḿbɔi, ńdinaŋɔɔ̂i, ŋá laŋpo-see-sɛŋ lɔ́ɔlu mɛi feerɛ kàa, nyíi-ŋai kɛ̀ a gbɛ́tɛɛ a gôoi. 13Laŋpo-see-sɛŋ-ŋai sama núu tɔnɔ è kɛ̀ naa gɛ́ɛ yɛ̂ɛ núu-kpune Ǹóŋ. È kɛ̀ a maa ɣiriɛ a yokpo kôya, gôo-bɛti ɣiriɛ geŋe lá. 14Ŋuŋ da ŋuŋ leɣa dí kɛ̀ kolêi kpɔ́ yɛ̂ɛ ƃála-leɣa. Díkɛ kole kpɔ́ yɛ̂ɛ kɔ́lɛ. Ŋ̀ɛi è kɛ̀ yɛ̂ɛ ŋɔŋ-soŋ, 15gɔ́ɔ kɛ̀ fólôi mu yɛ̂ɛ ƃara séɣeŋɔɔ fulɛ-kêre mu. Ŋ̀óo kɛ́ɛ yɛ̂ɛ yá támaa ɣilîŋ wôo. 16Pɛmɛlɛŋ-kao lɔ́ɔlu mɛi feerɛ è kɛ̀ ǹáa-mii-yee ŋá. Ƃóa-sɔkpɔ ŋá kɛ́ɛ gwaa feerɛ ma kɛ́ ƃo ǹá. Ŋ̀ɛi kɛ́ fòlo yɛ̂ɛ vóloi à kɛ̀ toôi kpɔ́ a gbanaŋɔɔ.
17Tãi ŋá gàa lai, ŋá tòo gɔ́ɔ mu yɛ̂ɛ núu à sàa. Kɛ́lɛ, è ǹáa-mii-yee pɛ̀lɛ mâ, nyɛɛi, “Ífe yao, ŋ́gaa a maa-ŋuŋ da gbɛɛ ŋái, 18da gɛ-ɣele-ma-nuui. Ŋá sàa, ǹyaŋ gáa, ŋ́gaa a ḿvulu wɔlɔ-wɔlɔ da wɔlɔ-wɔlɔ. Saa da Saa-taa díkîi káa ńyêei. 19Mɛni ma mɛni-ŋai pɔ̃yɛ ya díkâai, nyíŋi-ŋai díkaa kɛ̂i da nyíi-ŋai pâi kɛ̂i nàa pôlu mai. 20À kɛ̀ a noo-mɛnii gáa bɛmɛlɛŋ-kao lɔ́ɔlu mɛi féerɛi su nyíi-ŋai í díkàa náa-mii-yee ŋá da gôo-laŋpo see-sɛŋ lɔ́ɔlu mɛi féerɛi, bɛmɛlɛŋ-kao lɔ́ɔlu mɛi féerɛi ƃa Kôrai-toli-kpɔŋ lɔ́ɔlu mɛi féerɛi díkela-ŋai, ǹyaŋ laŋpo-see-sɛŋ lɔ́ɔlu mɛi féerɛi ƃa Kôrai-toli-kpɔŋ lɔ́ɔlu mɛi féerɛi.
Currently Selected:
M̀ɛni-lɛɛi 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia