Táre-woo-ŋa 1
1
Berei Táre-woo-ŋa lɛ̂lɛɛi lai
1Deeƃé ǹóŋ Saloma nyii kɛ̀ a Eezuɛ kaloŋ, dáre-woo-ŋai ká ŋí è mòi.
2M̀ɛni-ŋûŋ-ŋai dáre-woo-ŋai ŋí sui ƃa dí kpɔŋ-maa tɛɛ núu pɔ́ a gɛɛ é táre kɔ́lɔŋ, teniŋ-tɔɔ da ŋ̀óo su-siŋɔɔ-ŋai dísu-kulai. 3Dáre-woo-ŋai ŋí da pâi táre lɛ̂i yâ, teniŋ ƃô-laa, tɔ̃yâ-tua kɛ́ɛ da núu kélee mɛni siɣeɛ a bɔriɛɛ. 4Da pâi táre lɛ̂i nûa dîa dítarei láa fé fɛ́ɛ nii, dí gɛ́ ǹyáŋkpa-ŋai dí mɛni ŋá-kaa, dí kɛ́ pɔ̀ri mɛni kpɛtɛɛ kɛ̂i díkpîŋ mɛni ma. 5Tɔɔ dáre-nuui máŋ é ŋ̀óli tɔɔ dîa a gɛɛ ŋɔtárei su é kɛ́tɛ. Tɔɔ zɛŋ-kɔlɔŋ-nuui é dília-wooi síɣe, 6a gɛɛ dí dáre-woo-ŋai ŋá káa da m̀ɛni-kɔɔŋ-ma-ŋai, é pɛ́lɛ dáre-ƃelai díwoo-ŋai dîa da dí-kuleŋ-kee-woo-ŋai.
Ǹia-wooi gáa ǹyáŋkpa-ŋai mɛni ma
7Ǹúui ŋ̀wɛ̂lii é tárei, fɛ̂ɛ é yao Ɣâla Yâwɛɛ ma a maa-ŋuŋ, kɛ́lɛ ǹûai dífa mɛni ŋá kàa a ǹɛ́lɛɛi da táre da lia-woo maa mɛ̂ni sìɣe nɔ́ kpɛ́ni-kpɛni.
8Ńoŋ, íwoli tɔ́ɔ ínâŋ ŋɔsɛŋ-lɛɛi ma. Ífe ílee ŋɔlia-wooi pîli 9kpɛ́ni fêi, dísɛŋ-lɛɛi a pâi ítûa-perei kɛ̂i é lɛ́lɛ yɛ̂ɛ berei núu ŋûa ƃɔrɔ da kɔŋ-ma-kɔyɛŋ da núu maa ɣîri la a ǹɛ́lɛɛi. 10Ńoŋ, à kɛ̀ sɔnyɔ̂ŋ-ƃela da díyee làa yâ, ífe fàa ma. 11À kɛ̀ da mò dîyɛɛ, “Pá kwáa lí kú núu kɔ́ri kú baa. Kwaa kúloo kwaa núu sóŋ nyii vé mɛni nyɔ́mɔɔ kɛ́ níi. 12Berei máŋ díkaa la ɣele ma díkɔlɔi ponoɔɔi, kwaa dí páa kú nia dímɛni ma. 13Kwa pâi tɔɔ-sãa sii támaa sɔlɔ ƃôi, kú kúpɛrɛ-ŋai láa fɛ̀ɛ a dia. 14Pá kú kɛ́ zu tɔnɔɔ, sɛŋ kélee kwa ŋùmai, kwa pâi íwɔ̂i tɛɛ̂i.”
15Ńoŋ, ífe lɛ̂ɛ núu kɛ́ɛ-ŋai tí pôlu. Ímaa kula dîa. 16Díkpɛtɛ̂ɛi mɛni nyɔ́mɔɔ kɛ́-mɛni ma. Díkɔɔ maa felâai a gɛɛ dí núu páa. 17Ve lɛ́lɛɛ-ni í ƃáre tɛ́ ŋɔni ŋɛ́i ƃa ŋ̀wɛ̂lii í gulai. 18Kpɛ́ni fei núu kɛ́ɛ-ŋai tí da ƃáre tɛ̀ díkpîŋ mɛni ma, ǹyaŋ m̀aa ƃârei tí ƃé pâi dífulu-laai su karâi. 19Ǹúui a sɛŋ kɔ̂ri ŋwana-lɔ̂ɔ-pere sui, a ŋɔfúlu-laai su kàra.
Táre káa yɛ̂ɛ núu nyii a nûa tòlii
20Ka káwoli tɔɔ. Táre káa yɛ̂ɛ núu nyii tóli ƃôi berei ma da ǹɔ́ɔ-kpalaŋ-ŋai ŋái. 21A tóli ƃôi a ŋ̀óo su kɛ́tɛ daa-leei ŋɔsiɣãŋ-ŋai lá da ƃɛ́i kélee nûa da díŋa tɛ̀ naa gîe ma ǹyɛɛi,
22“Káai káfa mɛni ŋá kàa a ǹɛ́lɛɛi, ka pâi lɛ̂ɛi m̀ɛnii ŋí su a tãi ɣɛɛlu? Káai a ŋ̀ɛ́lɛ-maa-kula-ƃelai, lé-tãi ƃé ka pâi kperâi la kánîa-kɛɛ ma ɣɛlɛ-maa kuláa sui? Káai táre fé káŋuŋ sui, káfe pâi wɔ́lɔ mɛni maa kɔ̂rii? 23À kɛ̀ kà káwolii tɔ̀ɔ ŋália-wooi ma, gɛ̀ ní ŋa pâi ŋámɔ̂leŋ ŋɔtárei kélee tɛɛ̂i kápɔ, ŋa ŋɔ́nɔ ŋ́oo-ŋai su-kulâi lɛ́ kâa. 24Tãi ŋá wɔ́lɔ ƃɛlɛ tôli ƃò la a káa a gɛɛ ká pái, káfe káwoli tɔɔ ni. Tãi ŋá wɔ́lɔ ńyee sã̀a lai, káfe ǹaa káa ni. 25Ka wɔ́lɔ ŋália-woo-ŋai kélee pìli, ka ŋásɛŋ-lɛɛ-ŋai síɣe nɔ́ kpɛ́ni-kpɛni. 26M̀ɛni ma, tãi mɛni kpɔ̂lu a kûla la kâai, ńyãa máŋ ŋa pâi ɣɛ́lɛ-maa kulâi kákponôi. Tãi mɛni maa pɔlɔ-pɔlɔ a kûla la kâai, ŋa pâi ɣɛ̂lɛi kâa. 27Tãi màa yâo mɛni-ŋa da pâi pâi la kápɔ yɛ̂ɛ tuna kpînii, da mɛni kpânaŋ-ŋa yɛ̂ɛ fãa kɛ́tɛi, tãi ka pâi mɔ̃lɛ̂i la mɛni-sôli sui, 28m̀aa tãi tí ƃé ka pâi táre maa mare-kɛɛ kɛ̂i la, kɛ́lɛ fé pâi káwoo su toôi. Ka pâi ŋ́gɔ̂rii kwaa kélee mà, kɛ́lɛ káfe pâi ŋ́gâai. 29Ká táre kpɔ̀ara káfe gbɛtɛ ní kákili ŋá a gɛɛ ká yáo Ɣâla Yâwɛɛ ma. 30Káfe ŋália-wooi siɣe ní, ká káŋɛi nàɣiŋ ŋáteniŋ-tɔɔ-woo-ŋai mɛi. 31M̀ɛni ma zɛŋ ka zii, ka pâi m̀á kulâi, ǹyaŋ kákpɔɔi kɛ́-mɛni-ŋai tí ƃé pâi kákɛ̂i ká kɔ́lɛ. 32Diai dífa mɛni ŋá kàa a ǹɛ́lɛɛi, da pâi saâi kpɛ́ni fêi, da dípôlu tɔ̀ɔ táre ma. Diai dífa mɛni ŋá kàa a ǹɛ́lɛɛi, dítûa-perei ƃé pâi dísu karâi. 33Kɛ́lɛ núui a ŋ̀óli tɔ̀ɔ ḿâi, lii-see a pâi kɛ̂i ǹyêei. Lii-sɛlɛŋ fé pâi kɛ̂i ma da yao.”
Currently Selected:
Táre-woo-ŋa 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia